2 कुरिन्थि 7 - नोयरी नोवलू नियम

¹ कोईत ऐ प्रीयांनो, जर आमाहा ए प्रतिज्ञा जोड़ी होय ताहा आव, आपु स्वतःहा डील अने आत्माआ आखे अशुद्धते पासून शुद्ध कोईलो अने परमेश्वरोओ बिक मेकीत पवित्रतेला पुरो कोईलो.

आनंद अने पच्चाताप

² आमाहा आपाआ मोनामेहे जागू दया, आमाहा कोडाआरी अन्याय कोअयु नाहा कोडाआ बिघडावीत्लो नाहा अने कोडाआ फोसाड्यू नाहा.

³ आय तुमामे दोषी ठरविलाकोता कोयु नाहा, काहाके आय पहिलुच कोयु होय का तुमु माआ मोनामेहे एहलो बोह्ये होय का आमाहा तुमा कोअता मोहुहू जीवोन जीवूहु तीयार होय.

⁴ आय तुमामे जास्तीज हिमंत तोईत कोयु होय का माहु तुमापो वोडू गर्व होय, आय शांतीई सी पुआत गोल्यो होय आपाआ आखे संकटामे आय आनंदावाही जाअखो रोतलू.

⁵ काहाके जाहा आमू मकिदुनिया आव्ये, तेहलाम पण आमा डीला आराम जोड़ी नाहा पोन आमू चारही ईवोल संकट सहन कोअत्लू, बारथे झगडा, अने विसमे जाहके गोठी कोयु.

⁶ तेबी पोन बेनुहू शांती आपनाऱ्या परमेश्वराने तीतुसच्या आवता आमाहा शांती आप्यी,

⁷ अने तियाआ आविलो नाहा पण तियाआ शांतीई पण जी शांती तियाहा तुमापोरोत जोड़ी ओती तिये तुमाआ इच्छा, तुमाआ दुख अने माकोअता तुमाआ आस्थेचा खोबोर आमाहा होमलावल्यो, याकोअता माहु फासी पण आनंद ओवयू.

⁸ काहाके जर आय आपाआ पत्राने तुमामे नाराज कोल्यु पण तीयावाही माहु वाईट वाटत नाहा जेहलो पहीले वाईट वाटत ओते कोईत आय पालत्लू का तिया पत्राने तुमु नाराज ताहा उवे पण ते थोडो टाइमाकोता ओते.

⁹ ओमे आय आनंदाम होय पण यकोअता नाहा का तुमामे दुख जोड्यू पण यकोअता का तुमु तियाअ खोतालो मोन फिरीविलो, काहाके तुमाआ दुख परमेश्वरोओ इच्छेवही ओतु का आमापोरोत तुमामे कोड्लाज गोठीमे नुकसान ओतगोयु कायना.

¹⁰ काहाके परमेश्वर भोगीत दुख एहेलू पश्चाताप निर्माण कोअत्लू, तिया परिणाम तारण होय अने फासाडी त्यावाईही फोसि गोल्यो कोईत काम नाहा पण जगाआ दुख मरण निर्माण कोअते.

¹¹ कोईत पाला, आव गाठीवाईही का तुमामे परमेश्वरोओ भक्तीमेहे दुख उवे तुमामे केतो किईमाय अने दोष निवारण अने खोतलाघी, अने बित, अने उत्कंठा, अने आशा अने बदलू आपलो विचार निर्माण उवे? तुमु आखे प्रकारे देखाडीत आप्लु का तुमु आव गोठीमे निर्दोष होय.

¹² फासाडी आय जे तुमापोओ लेखिलो ओते, ते त्यावाईही लेखिलो नाहा, जीआ अन्याय कोअयु अने याकोअता पण नाहा ज्यापो अन्याय कोअयु पण यकोअता का तुमाआ किईमाय जी आमा कोअता होय ती परमेश्वरा आगाडीही तुमापो उघड ओत जानारू.

¹³ त्यापोत आमाहा शांती जोड़ी, आमा आव शांतीमुळे तीतुसाच्या खुसिमे फासी पोन आनंद ओवयू काहाके तियाआ जीवोन तुमु आखाज आखाहा स्वस्थता जोड़ी.

¹⁴ काहाके जर आय आगाडी तुमा बारामे किबी गर्व देखाल्यु ताहा लाजावालो नाहा पण जेहलो आमाहा तुमामे आखे गोठी खोरो कोत आप्या कोयु, तेहलूज आमाआ गर्व देखाडिलो तीतुसा आगाड़ी खोरो निकलीलू.

¹⁵ जाहा तियाहा तुम्हाआ आखाआ आज्ञाकारी ओनारो ओर येत का केहलो तुमु बित कापीत पाअये ओते ताहा तिया प्रेम तुमाही फासी वोदतो जात्लू.

¹⁶ आय आनंदाम होय काहाके माहु हर एक गोठीमे तुमापो पुरो भोरुसो होय.