2 कुरिन्थि 4 - नोयरी नोवलू नियम

सुसमाचारोओ प्रकाश

¹ त्यापोत जर आपापो एहली दया उवी का आमाहा ए सेवा जोड़ी होय ताहा आमाहा हिमंत सोडीत नाहा.

² पोन आमू लाज गुप्त धन सोडीत आप्लु, अने आमाहा कपटाने सालते नाहा, अने परमेश्वरोओ वाचनामे मिशर पोन कोईत नाहा पण सत्याहा प्रकट कोईत परमेश्वरा आगाडीही हर एक मांहाहा विवेकात आपाआ हाजी गोठी बाहाडत्लू.

³ पोन जर आमू सुवार्ते वाही पडदू पोडीत होय ताहा ओ नाश होणारा कोता पोडीत होय.

⁴ अने तिया अविश्वासी कोअता ज्याआ बुद्धी आव जुगाआ ईश्वर आंदले कोईत आप्यी होय म्हणजे ख्रिस्त जो परमेश्वर प्रतिरूप होय तिया तेजाचा सुवार्तेए प्रकाश तियापो सोमकूहु नाहा.

⁵ काहाके आमू स्वतःहा नाहा पण ख्रिस्त येशुहू प्रचार कोअत्लू का आमू येशु कोअता तुमाआ सेवक होय.

⁶ त्यापोत का परमेश्वरोओ होय जीआ कोयु, अंधरा मेहे प्रकाश चमकाडी, अने तोज आमा मोनामेहे चमकाडी का परमेश्वरोओ गौरवाच्या प्रकाश येशु ख्रिस्ताच्या सोबेपो ओवे.

कादवोओ बासनामेहे धन

⁷ पोन आमू जागे ते धन कादूवो बासनाम मेक्ल्ये होय का ओ असीमित सामर्थ्य आमापोरोत नाहा पण परमेश्वरोहो देखुहू रोंहु जोवे.

⁸ आमू चारही दिशांनी संकट ताहा सहन कोअत्लू पोन संकटाम पोडीत नाहा आमाहा घोटाळा पडिलो पण नाराज उवनारा नाहा,

⁹ छळ कोअयु जात्लू पोन आमाआ त्याग कोअयु जात नाहा, पाडिलो ताहा जात्लू पण नाश उवनारा नाहा.

¹⁰ आमू येशुउ मोईलाकाजे आपाआ डीलोम हरेक टेमे घेऊन फिरत्लो का येशुउ जीवोन पण आमा डीलोम प्रकट उवे.

¹¹ काहाके आमू जिवंत ओतलू हरेक टेमे येशु कोअता मोईला आथोमेहे होपण्ये जात्लू, का येशु तियाआ जीवोन पोन आमू रण पाविल्यो डीलोम प्रकट उवे.

¹² यावाही मरण ताहा आमू उपो प्रभाव टाकत्लू अने जीवोन तुमापो.

¹³ यकोअता आमामेरोत तोज विश्वासाआ आत्माआ होय ज्याआ विषयाम लेखिलो होय, आय विश्वास कोअयु, त्यापोत आय बूल्यू, कोईत आमाहा पण विश्वास कोअत्लू, अने गोगत्लू.

¹⁴ काहाके आमाहा मालुम होय का जीआ प्रभू येशुहू जिवंत कोल्यु तोज आमाहा पण येशुमेहे गोवाद्या होमजीत जिवंत कोअनारू, अने तुमाआरी आपाआ आगाडी उपस्थित कोअही.

¹⁵ काहाके आखे वस्तु तुमा कोअता होय म्हणजे कृपा पुष्कळाद्वारे जाखो ओत परमेश्वरोओ गौरव कोअता धन्यवाद पण कोअला जोवे.

¹⁶ त्यापोत आमाहा हिमंत सोडीत नाहा म्हणजे आमाआ बारथे माहुमे नाश उवनारा जात्लू तेबी पोन आमाआ मायतो माहुमे हर एक तेदीही नवो उवनारा जात्लू.

¹⁷ काहाके आमाआ छळ भारातला फोवरोजे संकट आमा कोअता जास्तीज महत्व पुरो अने सार्वकालिक गौरव उत्पन्न कोईत जात्लू,

¹⁸ अने आमू देखल्यू वस्तूऊ नाहा पण न देखानारो वस्तु पालीत रोतलू काहाके पालो वस्तु कोम दिहोकोअता होय, पोन न देखानारो वस्तु कायम बोणीत रोत्ले.