2 कुरिन्थि 3 - नोयरी नोवलू नियम

मसीही जीवते पत्र

¹ की आपु फासी आपाआ प्रशंसा कोइलाआ? किंवा आपु दिहरे माहुकोता शिफारासची पत्रे तुमाही लावूलो किंवा तुमापोरोत लेआलो होय? जेहलो किबी मांहे कोअता, नकीच नाहा?

² आमाआ पत्रे तुमुज होय जे आमा मोनामेहे लेखित मेकल्ये होय अने तियाहा आखे मांहु ओलखीत अने वाचतलो

³ ओ उघड होय का तुमु ख्रिस्ताची पत्रे होय ज्याहा आमाहा सेवा होस लेखिलो अने जे सहीवाही नाहा ताहा जिवंत परमेश्वरोओ आत्मावांहि, डोळा डीलोपो नाहा पण मोनाआ मासरूपी पाटळापो लेखिलो होय.

पौलुसोओ क्षमता

⁴ आमू ख्रिस्ताद्वारे परमेश्वरोओ भोरुसो मेकोहो.

⁵ एहलो नाहा का आमू स्वतःहा याआ लायकी होय का आपु कोडला गोठीई विचार कोहू सेकेहे पण आमाआं लायकी परमेश्वारापो रोत होय,

⁶ जीआ आमाहा नव्यो कराराआ सेवक ओनारो लायक पण कोल्यु शब्दाचे सेवक नाहा पण आत्माआ, काहाके शब्द माअत्लू पण आत्माआ जिवंत कोअत्लू.

नवला वाचाआ महिमा

⁷ जर तो मोईला करार ज्याआ अक्षर दोणोपो खोवूला गोये ओते इहिंजा प्रकाशाम उवी का मोशेए सुबी तेज उजवोडोओ कारनोवाही जो कोम उवनारा जात ओतु इस्राएल मांहे तियाआ सोबी पाल्हू सेकेले निमिले,

⁸ ताहा आत्माआ करार फासी प्रकाशाम काहा रोही नाहा?

⁹ काहाके जाहा दोषी ठोरावनारो करार प्रकाशाम ओतुताहा धोर्मी ठेरविनारू करार फासी प्रकाशाम काहा नाहा रोही?

¹⁰ आपु जे प्रकाशाम ओते ते पण तियाअ दिहरारी जे फासी जाखो प्रकाशाम ओते किबी प्रकाशाम ठरव्येहे नाहा.

¹¹ काहाके जाहा ते कोम उवनारा जात ओते तेहलाम ते स्थिर रोही फासी जाखो-जाखो प्रकाशाम काहा रोही नाहा?

¹² त्यापोत एहली आशा मेकीत आमाहा हीमतवाही गोगत्लू.

¹³ अने मोशे सारखे नाहा जीआ आपाआ सुबीपो पडदू टाक्यू ओतु म्हणजे इस्राएली तिया कोम उवनारू उजवोडोओ शेवट परंत पाल्ये नाहा.

¹⁴ पोन तियाआ मने कठीण उवे काहाके ओमेजा जुनो करार वासत्लू ताहा आपाआ मोनापोओ तोज पडदू पोडीत रोतलू पोन आय मसीही मेहे जीवीत गोल्यू.

¹⁵ आज पर्यंत जांहा केधी मोशेच्या पुस्तक वचल्लू जात्लू ताहा तियाआ मोनापोओ पडदू पोडीत रोतलू.

¹⁶ पोन जाहा केधी तियाआ मोन प्रभू जागे फिरीही तेहलाम पडदू फाडल्यो जाअलो.

¹⁷ प्रभू ताहा आत्माआ होय अने जीही का प्रभूआ आत्माआ होय तीही स्वतंत्रता होय.

¹⁸ पोन जाहा आमू आखाआ उघडावल्यो सोबेपो प्रभूऊ वैभव यावाही प्रकट ओतू ज्यपोरोत आरशात तो प्रभूउ त्यापोरत जो आत्माआ होय आमाहा तियाआ तेजस्वी रुपात अंश-अंश कोईत बदलीलो जात्लू.