2 कुरिन्थि 2 - नोयरी नोवलू नियम

खोदोओ प्रेमोओ पुष्टि कोअलो

¹ आय आपाआ मोनामे ओ ठेरवीही ओते का फासी तुमापोओ दुख दयाआ आविलो नाहा.

² काहाके जर आय तुमामे दुखी कोअनारू, ताहा माहु आनंद आपणारे कोडू रोही? फक्त तोज ज्याहा आय नाराज कोल्यु?

³ अने आय ए गोठी यकोअता लेखी का एहलो उवूंहू नाहा का आय आवेताहा याहीरोते माहु आनंद मिलूहु जोवे त्याआरोत आय नाराज ओवुहू; कारण माहु तुमु आव आखे गोठीई भोरुसो होय का जो माआ आनंद होय तोज तुम्हाआ आखाआ पण होय.

⁴ वोडो संकटामें अने मोनोमेहे काम कोईते आहवे काडीत-काडीत तुमामे लेखत्लू ओते यकोअता नाहा का तुमु नाराज उवे पण यकोअता का तुमु तिया वोडो प्रेमाहा होमजीत लेई जोवे जे माआ तुमापो होय.

पापीही माफी

⁵ जर कोडु नाराज कोल्यु होय ताहा माहुंज नाहा पण (त्याआरी जाखो वाईट कोअनारू नाहा) किबी-किबी ताहा तुम्हाआ आखाहा पण नाराज कोल्यु.

⁶ एहलो माहुकोता ओ शिक्षण जे पाहीआरी पुष्कळांना आप्लु होय जास्तीज होय.

⁷ त्याकोता यापोरोत हाजो ओ होय का तियाआ अपराध क्षमा को अने शांती आपीद्या उवूंहू नाहा का एहलो माअहु फासी जाखो नाराजोमे पोडीत जानारू.

⁸ यी वजेसी आय तुमामे विनंती कोअत्लू का तियाहा आपाआ प्रेमाची खात्री आपा.

⁹ काहाके आय यकोअता पण लेखिलो ओते का तुमामे पारखिल्यु लेऊ का तुमु माआ आखे गोठी मानिलो तीयार होय का नाहा.

¹⁰ ज्याआ कोडाआ तुमु क्षमा कोअता तियाहा आय पण क्षमा कोअत्लू काहाके आय पोन जे किबी क्षमा कोल्यु होय, जर कोल्यु होय ताहा तुमा कोअता ख्रिस्ताजागी ओत क्षमा कोल्यु होय

¹¹ का शैतानोहो आमापो दावा चालुला कोअता नाहा, काहाके आमाहा तियाआ युक्तीपासून अनजान नाहा.

मकुदुनियाआ कोअता यात्रा

¹² जाहा ओ आय ख्रिस्ताची सुवार्ता कोहू त्रोआस माय आवयू, अने प्रभूऊ माकोअता एक दरवाजू उगडालू,

¹³ ताहा माआ मोनुमे चैन जोड़ी नाहा यकोअता नाहा का आय आपाआ पायहोहो तीतूस ला मिलायु नाहा यकोअता का त्यापोरोत खोबोर घेऊन आय मकिदुनिया निहित गोल्यो.

मसीह सेवकोओ जीवनोंओ सुगंध

¹⁴ पोन परमेश्वरो धन्यवाद होय, जो ख्रिस्तामध्ये हरेक टेमे आमाहा विजयो उत्सवात घेऊन फिरत्लो अने आपाआ ज्ञानाचा सुगंध आमापोरोत हर एक जाग्तली वेरायो.

¹⁵ काहाके आमू पर्मेश्वरारी तारण मेलविल्यो अने नाश उवनारू बेनु कोअता ख्रिस्ताचे सुगंध होय.

¹⁶ दिहिराकोते ताहा मोईला निमतीवाही मोईला गंध अने केताज जीवनाआ निमित्ताने जिवनाआ सुगंध हाजो आव गोठीई योग्य कोडू होय?

¹⁷ काहाके आमू तिया पुष्कळा होसे नाहीत, जे परमेश्वरोओ वाचनामे मिशर कोअता पोन मोनोमेहे खोरो डोआवाही अने परमेश्वारापो रोत ख्रिस्ताची आवीगोया होमजीत ख्रिस्तामध्ये गोगत्लू.