2 कुरिन्थि 12 - नोयरी नोवलू नियम

पौलुसोहो दिव्य दर्शन

¹ जर गर्व कोईलो माकोअता आरी नाहा तेबी पण कोईलो लागेहे, त्यापोत आय प्रभूऊ आपल्या दर्शन अने उजवाडो चर्चा कोअनारू,

² आय ख्रिस्तामध्ये होमला मांहाहा ओलखीत्लू चौदा वर्ष उवे मालुम नाहा देहिक किंवा आग ओरीजे परमेश्वरोओ मालुम होय एहेलू मांहु तिसऱ्या होर्गो पर्यंत विसात गोयू.

³ आय एहलो मांहाहा ओलखीत्लू की जाऊ डीलो सहीत की जाऊ डीलोबीना परमेश्वरोओ जाअतू होय.

⁴ का स्वर्ग लोक मेहे विसात गोयू अने एहलो गोठी होमल्याहा ज्या कोअला नाहा, अने ज्याआ सुबीपो लेतावलो मांहाहा योग्य नाहा.

⁵ एहलो मांहुंपो ताहा आय गर्व कोअनारू, पण आपापो अने आपाआ अशक्त पण सोडीत, आपाआ विषयी गर्व कोअनारू नाहा.

⁶ जर आय गर्व कोअला इच्छा कोअनारू पण तेबी मूर्ख उवे नाहा काहाके खोरो गोगनार, तेबी पण थोबिलो जात्लू एहलो उवूंहू नाहा का जेहलो कोडु माहु पालत्लू किंवा मापोरोत मानत्लू माहु त्यापोरोत जाखा सोमजा.

शरीर मेहे काटू

⁷ याकोअता का आय प्रकटी करणाच्या भरपुरीने फुलत्लू जाऊ कायना, माआ डीलोम एक काटू टोचल्यो गोल्यो म्हणजे शैतानाआ एक दूत माहु ओ देही म्हणजे आय फुलत्लू जानारू नाहा.

⁸ याविषयी आय प्रभूहु तीन टायमोआ विनंती कोअयी का मापोरोत ओ सेटे ओत जाहू जोवे.

⁹ पोन तिये माहु कोयु, “माआ कृपा ता कोअता खूप होय, काहाके माआ सामर्थ्य अशक्त पोनो मेहे सिद्ध ओते”, त्यापोत आय वोडा आनंदावाही आपाआ अशक्त पणा उपो गर्व कोअनारू, ख्रिस्ताचे सामर्थ्य मापो सावलू कोईत रोनारु.

¹⁰ यामुळे आय ख्रिस्तामध्ये अशक्त पनोमेहे, अने निंदेत, अने लुलो, अने उपद्रव मेहे, अने संकटाम खुश होय काहाके जांहा आय अशक्त उवनारा रोतो तेबी पण ताकतवान ओतू.

एक प्रेरितों लक्षण

¹¹ आय मूर्ख ताहा बनलो, पण तुमुज माहु ओ कोइलाकाजे ओ भाग पाडिलो, तुमु ताहा माआ प्रशंसा कोअला जोवे, काहाके आय जर किबी नाहा तेबी, पण तियाअ वोडा प्रेषिताहून कोडनीबि गोठीमे कोम नाहा.

¹² प्रेषितांआ चिन्ह पण तुमामे आखे प्रकारोओ धीरज प्रमाणे चिन्ह अने अदभूत कानोवाही अने सामर्थ्याआ कानोवाही देखाये गोये.

¹³ तुमु कोडला गोठीमे दिहरा मंडली कोम ओते फक्त यामेहेज का आय तुमापो आपाआ बोजो टाक्यू नाहा माआ ओ अन्याय क्षमा कोईओलो.

कलीसिया कोअता प्रेम

¹⁴ पाला, आय तिसऱ्या टायमोमें तुमापोओ आवूहू तीयार होय अने आय तुमापो किबी वोझो टाकही नाहा काहाके आय तुमाआ धनदौलत नाहा पण तुमुज माहु जोवे, काहाके पोऱ्या याह्ही बाह्हाआ धन नाहा एखटो कोअला जोवे पण याह्ही बाह्हाआ पोरयाकोता.

¹⁵ आय तुमाआ आत्मा कोइत जास्तीज आनंदावाही खोर्चू कोअनारू पण स्वतःपण खोर्चू ओत जानारू की जेवडे जाखो आय तुमापो प्रेम कोअत्लू तेवडोग कोम तुमु मापो प्रेम कोअनारू?

¹⁶ एहलो ओवुहू सेकोहो का आय तुमापो वजन टाक्यू नाहा पण चतुराईवाही तुमामे फसाविल्यो लेधलो

¹⁷ हाजो ज्याहा आय तुमापोओ मोकल्यीत की तीयामरोत कोडाआ सोबि हारकुजे आय छळ कोईत तुमापोरोत किबी लेधलो?

¹⁸ आय तीतूसोहो सोमजाडीत तियाआ पायहो की आमाहा एकाच आत्माआ नाहा चालविलो? की एकाच चिन्हावर जातले नाहा?

¹⁹ तुमामे ओमेजा वाटत होय का आमाहा तुमा आगाडी प्रत्युत्तर आपित रोल्या होय, आमाहा ताहा परमेश्वरोओ उपस्थित होमजीत ख्रिस्तात गोगीत होय अने ऐ प्रीयांनो, आखे गोठी तुमाआ उन्नति कोयु होय.

²⁰ काहाके माहु भिईलो होय का कोठे एहलो उवूंहू नाहा का आय आविलो जेहलो माआ इच्छा होय तेहलूज तुमामे पालनारू, अने तुमामे झगडू, डाह, राग, विरोध, ईर्ष्या, लागाडीलो, गर्व अने अव्यवस्था ओत जानारू,

²¹ अने एहलो उवूंहू नाहा का माआ परमेश्वर माआ फासी तुमाआ इही आविलो मापो वोझो टाकही अने माहु खूप जनासाठी दुख कोईलो लागे जिये पहीले पाप कोल्यु ओते अने वाईट काम अने व्यभिचार, जारकर्म, जो तिये कोल्यु पश्चाताप कोअयु नाहा.