2 कुरिन्थि 11 - नोयरी नोवलू नियम

तियाआ विश्वास योग्यता कोअता चिंता

¹ जर तुमु माआ थोडोज मूर्खपणा सहन कोईत लेधलो ओते ताहा केतो हाजो उवे ओते होय, माआ सहन कोईत ल्या.

² काहाके आय तुमा बारामे ईश्वरीय लागाडीत रोतलू यकोअता का एकाच माटीरी तुमाआ गोठी लागाडयी होय का तुमामे पवित्र कुवारी मसीहीई होपी देव.

³ पोन आय भिईत्लु का जेहलो हापोओ आपाआ हुशारीवाही हव्वाला फासाल्यू ओते तेहलूज तुमाआ मोनाआ तिया शरणतेने अने पवित्रतेने जे ख्रिस्ता बरोबर उवूंहू जोवे का भ्रष्ट कोल्यु जाऊ कायना.

⁴ जर कोडु त्याजागे आविलो कोडू दिहरा येशु प्रचार कोअनारू, ज्याचा प्रचार आमाहा कोअयु नाहा ताहा कोडु दिहराहा आत्माआ तुन्हाला जोडीत, जो पेल्लु मिल्यू ने ओतू अने फासी दिहरि सुवार्ता होम्लाड़नारू जीला तुमु पहीले मान्ये निमिले ताहा तियाहा तुमु सहन कोईत लत्ले.

पौलुस अने ठोग प्रेरित

⁵ आयताहा होम्जाडीलो होय का आय कोडनीबि गोठीमे वोडे-वोडे प्रेषिताहून कोम नाहा होय.

⁶ जर वास्तवामध्ये न शिकायला होय तेबी पण ज्ञाना माय नाहा आमाहा याहा हर एक गोठीमे आखे प्रकाराने तुमा कोअता प्रकट कोल्यु होय.

⁷ के यामे आय किबी पाप कोअयु का आय तुमामे परमेश्वरोओ सुवार्ता लीन होम्लाड्यू अने स्वतःहा निसे कोल्यु का उचो उवूंहू जोवे?

⁸ आय दिहरा मंडळी मेहे लुट्ये, म्हणजे आय त्यापोरोत मंजुरी लेदि म्हणजे तुमाआ सेवा कोहू.

⁹ अने जांहा आय तुमाआरी ओतू अने माहु कोम उवी ताहा आय कोडापो ए बोझ टाक्यू नाहा काहाके पाहीही मकिदुनिया रोत आविलो माआ गोरोज पुरो कोअयी अने आय हर एक गोठीमे स्वतःहा तुमापो बोझ बोनीलाकाजे उबोराखिलो अने थोबाडीत रोही.

¹⁰ जर ख्रिस्ताची खोरो पणा मामेहे होय ताहा अखया तियाहा कोडूच माहु आव गर्वा पासून उबराखील नाहा.

¹¹ काहा? की आय यकोअता आय तुमामे प्रेम कोईत नाहा? परमेश्वरोओ ओ मालुम होय का आय प्रेम कोअत्लू.

¹² पोन जे आय कोअत्लू तोज कोईत रोही काजे मांहे संधी होदतेहे तियाहा आय संधी सापडे आपी नाही म्हणजे ज्या गोठीमे ते गर्व कोअता तीयाम ते आमा होस उवूंहू जोवे.

¹³ काहाके एहलो मांहे खोटो प्रेषित अने छल काम कोअनारे अने ख्रिस्ताच्या प्रेषितांचा रूप दोनाराआ होय.

¹⁴ ए किबी आश्चर्याची गोठी नाहा काहाके शैतान स्वतःपण ज्योतीमय स्वर्गदूत रूप धारण कोअत्लू.

¹⁵ त्याकोता जर तियाआ सेवक पण धोर्मी सेवा कोअनारा कोअता रूप तोणार ताहा किबी वोडी गोठी नाहा पण तियाआ आखिर तियाआ का मापोरोत उवे.

मसीह कोअता दुःख उठावलोओ

¹⁶ आय ईजि कोत्लू का कोडु माहु मूर्ख मा सोमजाहा, निते मूर्खज सोमजित माआ सहन कोईत ल्या म्हणजे थोडोज आय पण गर्व कोहू सेकेहे.

¹⁷ आव बेधडक घमण्ड जे किबी आय कोत्लू ते प्रभूउ आज्ञेने नाहा पण सोमजा मूर्ख पणानेच कोत्लू.

¹⁸ जाहा जास्तीज होये मांहे शरीरा प्रमाणे गर्व कोअता ताहा आय पण गर्व कोअनारू.

¹⁹ तुमु ताहा समजदार ओत आनंदावाही गांडा सहन कोईत लत्ले

²⁰ काहाके जाहा तुमामे कोडु दास बोणाडीत लत्ले किंवा खात जात्लू, किंवा फसाविल्यो लेहो किंवा स्वतःहा वोडो बोणाडीत लेहो किंवा तुमाआ सुबीप थापड देत्लू ताहा तुमु सहन कोईत लत्ले.

²¹ माआ कोअलो अनादराच्या रितीवरच होय सोमजा आमाहा याकोअता अशक्तासारखे ओते पण ज्या कोडला गोठीमे कोडु हिमंत कोईत आय गांडीपनाकी कोत्लू, ताहा आय पण हिमंत कोअत्लू.

²² की ते इब्रानी होय? आय पण होय, की तोज इस्राएल होय? आय पण होय की तोज अब्राहमोओ वंश होय? आय पण होय.

²³ की तोज ख्रिस्ताचे सेवक होय आय गाडोहोस कोत्लू आय त्यापोरोत आगाडी होय जाखो परिश्रम कोअलाआ, फासी-फासी जेल होनारो, फटके खाअलो, टायमो-टायमो पोके मोईला जखमेहे.

²⁴ टायमोआ आय यहुद्यांआ आथोवाही एकोणचाळीस फटके खाले.

²⁵ तीन टायमोआ आय बेत खाले, एक टायमोआ मापो डोणो वांहि देत कोअलाआ आवयू तीन टायमोआ जहाज जियीपो आय सोढयू ओतू तुटीगोल्यो गोयी, एक रातदीही आय समुद्राम काढ्ये.

²⁶ आय वेल टायमोमें जात्रा, खाडीही दुखायलोमे, डाकुंच्या जखमेहे, आपाआ जातीई जोखिम मेहे, डोगोओ जोखिम मेहे, समुद्राआ जोखिम मेहे, झुटो पाहीमे जोखिम मेहे, रोला.

²⁷ परिश्रम अने मेहन्तिमेह टायमो-टायमो पोके जागेहे रोआलो, फुकल्यु तिह्लू, वेल टायमोमें उपास कोईलामे, थंडीमेहे, उगडे रोअलो मेहे;

²⁸ अने दिहरा गोठीही सोडीत ज्याआ वर्णन आय कोईत नाहा आखे मंडळीची चिंता आय हर एक तेदीही माहु दाबिलो ओते.

²⁹ कोडाआ अशक्त पणाने आय अशक्त उवनारा नाहा? कोडु पाप मेहे पोडे ताहा माआ जीव दुखालो नाहा?

³⁰ जर गर्व कोईत जरुडी होय ताहा आय आपाआ अशक्त पनाआ गोठीपो गर्व कोअनारू.

³¹ प्रभू येशु परमेश्वर अने जो बाह्हू कायम धन्यवादीत होय, मालुम होय का आय खोटो गोगीत नाहा.

³² दामिश्का मध्ये आरीतास राजापरत जो बळवो ओतु तिये माहु तोओला कोता दमिश्काच्या नगराउपो राखोन बोहाडीलो ओतु,

³³ अने आय टोप्ली मेहे बोहाडीत खिडकीमे रोत भितडो ओतापरोते उतरित गोल्यो अने तियाआ आथोम रोत वासित गोल्यो.