2 कुरिन्थि 10 - नोयरी नोवलू नियम

आत्मिक युद्ध

¹ आय तोज पौलुस जो तुमा आगाडी नम्र होय पण फासओ तुमाही हिमंत कोअत्लू का तुमामे ख्रिस्ताची नम्रता अने समस्यामुळ समजाडत्लो.

² आय ए विनंती कोअत्लू का तुमा आगाडी माहु निर्भय ओत हिमंत कोअला पोडहू कायना जेहलो आय किबी माहाहूपो जे आमाहा डील प्रमाणे सालणारो होमजीतेहे हिमंत देखाडीलो विचार कोअत्लू.

³ काहाके जेबी आमाहा डीलमेऱ्यो सालीलो, फिरत्लो तेबी डीलोहोसे सुलायलो नाहा.

⁴ काहाके आमू भानगडीइ हत्यार शारीरक नाहा पण किल्ले पोडीत ताकिला कोअता परमेश्वरोओ त्यापोरत सामर्थी होय.

⁵ त्यापोत आमाहा फुसिलो अने हर एक गोठी जे परमेश्वरोओ ओलखीनाऱ्या विरोधाम उभे रोनारे तियाहा खण्डन कोअत्लू अने हर एक विचारांना बंदी कोईत ख्रिस्ताचे आज्ञाकारी बनाडत्लू,

⁶ अने तीयार रोतलू का जांहा तुमाआ आज्ञा पालीत पुरोओत जानारू ताहा हर एक एहलाम आज्ञा उल्‍लंघन दण्डित कोए.

पौलुसोओ अधिकार

⁷ तुमु तियाआ गोठीही पाला ज्या डोआ आगाडी होय जर कोडाआ स्वतः उपो भोरुसो होय का आय ख्रिस्ताआ होय तियाहा पण मालुम जोवे का जेहलो तो ख्रिस्ताआ होय तेहलूज आमाहा पण होय.

⁸ काहाके जर आमू तिया अधिकारा विषयी फासी गर्व देखाडनारू जो प्रभूऊ तुमाआ बिगडाविला नाहा बोनाविलाकाजे आप्लु होय ताहा लाजवालो नाहा.

⁹ ओ तुमामे यकोअता कोत्लू का पत्राआरी तुमामे बिवाडानारू आय ओवुहू कायना.

¹⁰ काहाके ते कोअता तियाआ पत्र ताहा जाखोज अने जोरदार होय पण जांहा तो आगाडी रोतो ताहा तो डीलमेऱ्यो दुर्बळ अने तियाआ व्यक्तव्य ओलको लागेहे.

¹¹ जो एहलो कोत्लू तियाहा मालुम रोहू का एहलो आमा फासओ आमा पत्रामेह आमाहा वचने होय तेहलूज तुमा आगाडी आमाहा काम पण होय.

पौलुसोओ अधिकारोंओ सीमा

¹² काहाके आमाहा एवडी हिमंत नाहा का आमाहा स्वतः ला एहलो मांहाआरी गणतलू जानारू किंवा त्याआरी आपाहा मिलायेहे जे स्वतः ची प्रशंसा स्वतः कोअता अने स्वतःहा आपसामेहे मापोवांही तोलीत एकादिहरा मिलून फोगु ठरवील्यु.

¹³ आमू जर बाडारी बारथे गर्व कोनारू नाहा ताहा पण यता हिवाजागे जी परमेश्वराने आमा कोअता ठरविले होय अने तीयाम तुमु पण आविलो गोये होय अने त्याज प्रमाणोओ गर्व पण कोअनारू.

¹⁴ काहाके आमू आपाआ सीमा बारथे स्वतःहा वाडविनारू इच्छा कोईत नाहा जेहलो का तुमा जागेजा पुगाडलो अवस्थाम रोल्या ओते पण ख्रिस्ताची सुवार्ता होमलित तुमा जागेजा पूगी गोये ओते.

¹⁵ आमू सीमा बारथे दिहरा कष्टापो गर्व कोईत नाहा पण आमाहा आशा होय का जेहलो-जेहलो तुमाआ विश्वास वाढल्या जाइअलो तेहलूज-तेहलूज आमाहा आपाआ सीमा अनुसार तुमा कोअता फासी वोदतो जानारू,

¹⁶ म्हणजे आमाहा तुमाआ सीमा आगाडी जात सुवार्ता होम्लाड़नारू अने एहलो नाहा का आमाहा दिहीरा सिमेमेहे बनवल्या का मापो गर्व कोअनारू.

¹⁷ पोन जो गर्व कोअनारू, तिये प्रभूपो गर्व कोईओलो.

¹⁸ काहाके जो आपाआ प्रशंसा कोअत्लू तो नाहा पण तियाआ प्रशंसा प्रभू कोअत्लू, तोज ग्रहण ओवत्लु.