1 तीमुथियुस 6 - नोयरी नोवलू नियम

मसीही दासोओ आचरण

¹ जेतेहे दास जुवालाआ निसे होय, ते आपाआ मालक्याआ हा वोड़ा आदराआ योग्य जाआ काहाके परमेश्वराआ नावाआ अने उपदेशाआ निंदा ने ओवे.

² ज्याआ मालक विश्वासणारे होय तियाहा ते पाही होमजीत तुच्छ मानु कायना पोन तियाआ फासी सेवा कोईली काहाके त्यांपोरोत फायदा कोअनारे विश्वासी अने प्रेम होय आव गोठीई हिकवन आपित रो अने होमजाडीत रो.

³ जर कोडु दिहराआ प्रकाराआ हिकवन आपोहो अने खोरो गोठीकोता म्हणजे आमा प्रभू येशु ख्रिस्ताआ गोठी कोअता अने तियाअ हिकवोणीही मानीत नाहा जी भक्ती प्रमाणोओ होय,

⁴ ताहा तो गर्व कोनारू ओतगोयु अने किबी तियाहा मालुम नाहा पोन तियाहा गोठी अने शब्दाम लोढाई कोअलाआ खोत होय ज्यापोरोत डाह, झगडा अने निंदाआ गोठी अने वाईट शंका,

⁵ अने तिया मांहोम व्यर्थ झगडा निर्माण ओये जिया बुद्धी बिघडित गोयी होय अने ते सत्यापासून विहित ओत गोये होय जे होमजीतेहे भक्ती कामाविलो कोता दरवाजू होय.

⁶ खोरोज ए परमेश्वरआ सेवा भक्ती मुळे माहुहू संपन्न ओतू तीयेज माहुहू खुस ओतू.

⁷ काहाके आमू जगामे ओ किबी लेत आव्ये नाहा अने किबी लेत ने जाम नाहा.

⁸ जर आमापो खाहुं अने पीईलो होय ताहा तीयामे समाधान कोअला जोवे.

⁹ पोन जे धनवान उवूंहू ओवुहू पालल्ते ते एहली परीक्षा अने फासाम अने उपास व्यर्थ हानिकारक लालस मेहे फसीत जातेहे जी मांहाहा वाईट कोईत आपोहो अने नाशाच्या समुद्राम बुडालीत आपोहो.

¹⁰ काहाके रुपयाह लोभ आखे एहलाम आगेच जानारो मुळ होय ज्याहा मीडवीहे प्रयत्न कोईत-कोईत हर एक माहू विश्वास देखऊ भटकून अनेक दुखो मेहे खुपित लेधलो होय.

हाजो अंगीकार

¹¹ पोन ऐ परमेश्वरोओ जण तू आव गोठीपो नाहा अने धर्म, भक्ती, विश्वास, प्रेम, धीरज, अने नम्रतेहा आथ को.

¹² विश्वासाआ हाजी कुस्ती विडाआ अने तियाअ सार्वकालिक जीवनाहा तोईत ले याकोअता ताहु हाद्यूहु गोल्यो अने खुपुच साक्षीदारा आगाडी हाजू कोईत तोअले गोल्यो ओतु.

¹³ आय ताहु परमेश्वरोओ जो आखाहा जिवंत मेकोहो अने येशु ख्रिस्ताहा साक्षीदार मेकीत जीआ पुन्तियुस पिलातुस आगाडी हाजू ग्रहण कोअयु ए आज्ञा आपोहो

¹⁴ का तू आमा प्रभू येशु ख्रिस्त प्रकट ओइता आव आज्ञाहा निष्कलंक अने निर्दोष मेका,

¹⁵ जे तो योग्य टायमोमें देखाडनारू जो परम धन्य अने एकमात्र अधिपती अने राजांचा राजा अने प्रभूंचा प्रभू होय,

¹⁶ अने अमरता तीयाआज होय अने तो अगम्य उजवोडाम रोतलू अने तियाहा कोडु मांहाहा पाल्लये नाये एने पालहू पोन शकत कायने तीहा सन्मान अने राज्य युगानुयुग रोही आमेन.

धनवानोहो निर्देश

¹⁷ याआ जुगाआ धनवानांना आज्ञा आप का अभिमानी ओवुहू कायना अने चंचल धनावर आशा मुक्या कायना पण परमेश्वरोओ जो आमा हजाकोते आखे किबी भरभराटीने आपोहो.

¹⁸ तिये हाजो कोईओलो अने हाजा कामोम धनवान बोनाळीलो अने दिहरा होस अने मदत कोअलाआ तत्पर रोय,

¹⁹ आगाडी टाईमोकाजे एक हाजू पायु टाकिलो ज्यावाही खोरो जीवनाहा फेडीत लेही.

विश्वासोंओ रखवाली

²⁰ ऐ तीमुथियुस, यी धरोहरो रखवाली को अने ज्ञानाह ज्ञान कोअलो खोटो होय तियाआ अशुद्ध खराब गुठ्या सी अने विरोधाअ गोठीपो जुदो रो.

²¹ केते आव ज्ञानाह स्वीकारीत विश्वास देखऊ भटकून गोये होय तुमापो कृपा ओवती रोय.