1 तीमुथियुस 5 - नोयरी नोवलू नियम

कलीसियाआ सदस्यों सी बर्ताव

¹ एखा डायाहा मा जुरखीही पोन तियाहा बाह्हू सोमजित होमजाडीत दे अने जुवान्याहा पाही सोमजीत,

² डायु बोंई याह्ही होमजीत, अने जुवान बोंई पुरो पवित्रतेने बोईही होमजीत होमजाडीत आप.

विधवाहा मदत

³ ज्या रोंडाली बोई खरोज रोंडाली होय तियाआ सन्मान को.

⁴ जर कोडु रोडालो पोऱ्ये किंवा बेटाहाआ बेटोहो होय ताहा तीयी पहीले आपाहाज परिवारारी भक्तीमेहे वाघीविल अने आपाआ याह्ही बाह्हाहा यांहा पेल्लो तियाहा हक्क आपलो शिकायलो जोवे काहाके ओ परमेश्वरोओ गोमतो.

⁵ जी खरोज रोंडाली होय अने जीई कोडु नाहा ती परमेश्वरोप आशा मिकीत अने रातदीही विनंती अने प्रार्थनाम लक्ष्य लागाडत्ली,

⁶ पोन जी भोग विलासात पोडीत जाहो, ती जिवतु ओत मोई गोयीही.

⁷ आव गोठीई बी आज्ञा आपित रो जियासी तेए निर्दोष रोय.

⁸ पोन जर कोडु आपाआ कऱ्याआ विशेष कोईत आपाआ कोऱ्या आरिजे चिंता कोईत नाहा ताहा तो विश्वास देखऊ सेटे निहित गोल्यो होय अने तो विश्वास न मिकनारापो रोते पोन वाईट बोणीत गोल्यो होय.

⁹ अने तियाआ रोंडाली नाव लेखिलो जालो, जी साठ वर्षापोरोत कोम नाहा अने एकुच माटिई लाडी रोली होय,

¹⁰ अने हाजा कामोम हाजो नाव होय जीयी पोऱ्या पालीत पोषणाआ कोल्यु होय अने हगवाड्याआ सेवा कोअयी होय पवित्र महुअ गुडू तुवयी ओय दुखीई मदत कोअयी होय हर एक हाजा कामोम मोन लागाडले होय.

¹¹ पोन जुवान रोडालो नाव लिखेहू कायना काहाके ज्या ख्रिस्ताआ विरोध कोईत हजुहोये पोडीत जातेहे ताहा तीही वेहवाल कोईओलो गोमतो,

¹² अने दोषी ठरतलो काहाके तीही आपाआ पेल्लु विश्वास सोडीत आप्यू होय.

¹³ त्याआरी ती कोअ फिरीत आलसी बोनीला हिकाडते अने फक्त आल्युहू नाहा ताहा बडबड कोईत बहते अने दिहीरा कामोम आथे बी टाकत्लू अने कायनि हाजी गोठी कोईत रोनारे.

¹⁴ त्यापोत माहु ओ लागेहे का जुवान रोंडालाह वेहवाल कोईलो अने पोऱ्याहा जोल्मो आपित कोअबा हामबालीलो अने कोडु दुश्मनो निंदा कोअला संधी आपुहू कायना.

¹⁵ काहाके कोडु एकतर भटकून शैतानाआ फासाडी लागाडीत होय.

¹⁶ जर कोडु विश्वासणाऱ्यांच्या इही रोंडाली ओता ताहा तहाच तियाआ मदत कोईली का मंडलीपो वजन आवहू कायना म्हणजे मंडली तियाआ मदत कोहू सेकेहे ज्या खरोज रोंडाली होय.

वचनोहो हिकाडनारा प्राचीनोहो सम्मान

¹⁷ जे डाये हाजी व्यवस्था कोअता विशेष कोईत ते जे वचन होमलित अने मेहनतो कोअता बेन पट्ट जाखो सन्मानोवाही योग्य होमज्ये जालो

¹⁸ काहाके पवित्रशास्त्र कोयु होय “मोलीलो कोअनाऱ्या बोयलो सोब बांधीही मा” काहाके “मोजदुर आपाआ मोजुरी हक्कदार होय”

¹⁹ कोडु ए दोष कोडु डायाप लागाडनारू ताहा बेन किंवा तीन साक्षीदार शिवाय तियाहा होमला कायना

²⁰ पाप कोआनाराहा आखाआ आगाडी होमजाडीत आप म्हणजे फासी मांहे बिनारू

²¹ परमेश्वर अने येशु ख्रिस्त अने निवडाविले स्वर्गदूताहा हजर होमजाडीत आय ताहु चेतावणी आपोहो का तू मोन उगाडीत मानीत रो अने कोडलो काम पक्षपाताने कोहू कायना

²² कोडापो ए वेगु आथे मुक्या नाहा अने दिहरा पापाहाम सहभागी ओवुहू नाहा ताहा स्वतःहा पवित्र मेका

²³ भविष्या मेहे फक्त पाईजे पियोलो ओवुहू नाहा पोन आपाआ पेटोकोता अने टायमो-टायमो पोके मांदवाड्यू पोडीत होयकोत थोडोज द्राक्षरस बी पिईलो रो

²⁴ केते मांहाआ पाप उघड ओत जातेहे अने न्यायाकोता पहिलुच पूगी जातेहे पोन केते जोओ मागित आवत्ले

²⁵ तेहलूज किबी हाजो काम बी प्रकट ओये अने जे एहलो रोत नाहा तेबी निकाहू शकत नाहा.