1 तीमुथियुस 4 - नोयरी नोवलू नियम

ठोगोओ उपदेश सी सावधान

¹ पोन आत्मा स्पष्‍टता से कोहे का आवनारा समायाआ मेहे केते मांहे भार्मनारी आत्माआ अने दुष्टत्मा हीकाडीई लाआ पोओ मोन लागाडित विश्वासा मेहेरोत बुलवात जाणारा.

² ओ तिया खोटो मांहाहा कपटामुळे उवे ज्याआ बुद्धी जेहेका पेटात्ला लोखंडा डाग आप्यू होय,

³ जे वेहवाल कोइला कोअता उबारोहू अने रोटाआ किबी बिडारापो रोत अलग रोंहु आज्ञा आपी, ज्याहा परमेश्वराने यकोअता बोनाडल्ये का विश्वासआं अने सत्याहा ओलखीणारे तियाहा आभार माजित खानारो.

⁴ काहाके परमेश्वराने बोनावली हर एक वस्तु हाजी होय अने किबी अस्वीकार योग्य नाहा पोन याकोअता का आभार माजित खाअलो आवे

⁵ काहाके परमेश्वरोओ वचनाने अने प्रार्थने द्वारे शुद्ध ओत जालो.

मसीहाआ उत्तम सेवक

⁶ जर पायहोहो आव गोठीई चर्चा त्यापोरोत कोयु रोनारुके, ताहा येशु ख्रिस्ताआ हाजू सेवक ठराविलो अने विश्वास अने तियाआ हाजा हिकविलो गोठीपो ते मानीत आवयू होय तीयाम ताआ पालीत पोषणाआ उवनारा रोही.

⁷ पोन अशुद्ध अने डाया माहुहु गोठीपोरोत अलग रो अने हाजा भगत मेहनत कोईत रो.

⁸ काहाके डीलोओ व्यायामा पासून कोम फायदा ओतू पोन भक्ती आखे गोठीपो फायदा होय काहाके आव वेलाआ अने आवनाराआ जिवनाआ बी वचन त्याजकाजे आप्लु होय.

⁹ ओ वचन खोरो अने आखे प्रकाराने तोओनारा योग्य होय.

¹⁰ काहाके आमू मेहनतो अने प्रयत्न यकोअता कोअत्लू का आमाआ आशा तियाआ जिवंत परमेश्वरोओ होय, जो आखे माअहा अने विशेष कोईत विश्वास कोआनाराआ तारण कोअनारू होय.

¹¹ आव गोठीई आज्ञा आप अने हिकाडतो रो.

सेवकाई पोओ ध्यान मिकलोओ

¹² कोडु ताआ जुवान्यांना तुच्छ मानु कायना पोन वचनोम अने वागीलो अने प्रेम, विश्वास अने पवित्रओ विश्वासणाऱ्यां साठी नमुना बोनावोओ रो.

¹³ जो पर्यंत आय आवीत नाहा तोपोरोत वासिलो होय अने शिक्षण आपलो अने शिकाडेलो लक्ष्य मेका.

¹⁴ ज्या वरदाना बद्दल जे तुमामे होय अने भविष्यवाणी त्यापोरत डाये आथे मेकी दे जे ताहु जोडयेहे ओते नजर कायनाहा कोहू नाहा.

¹⁵ ती गोठीई विचार कोईत रो अने ती मेहे आपाआ ध्यान लागाडीत रो काहाके ताआ प्रगती आखापो प्रगट उवे.

¹⁶ स्वतःआ अने स्वतःआ लेखिलो वोले लक्ष्य मेका, आव गोठीपो स्थिर रो काहाके जर एहलो कोईत रोनारुके ताहा तू आपाआ अने आपाआ होमलीनारा कोअता पोन तू तारणाआ काहाके ठराविलो.