1 थिस्लोनी 5 - नोयरी नोवलू नियम

पुनरागमानो कोअता तियार रोजा

¹ पोन ऐ पाही याआ प्रयोजन नाहा कोअता वेल अने कालाआ विषयोमेहे तुमाआ काही लोखात जाय.

² काहाके तुमामे पक्को मालुम का जेहलो राती बांड आवत्लू तेहलूज प्रभूआ दीही आविलो होय

³ जेवी मांहे कोयु ओये का शांती इही होय, किबी बिनारा गोरोज नाहा ताहा तियापो एकाएक संकट आविलो जाण्याकोता उगलित रोईही दुख येत अने तेहलूज ते तारास ओये तियाहा सहन उवे नाहा.

⁴ पोन ऐ पाही, तुमु ताहा आंदाराम नाहा का तो दीही तुमापो चोरोहोस आविलो पोडी.

⁵ काहाके तुमु पुरो उजवाडामे पोऱ्ये अने दिहाआ पोऱ्ये होय पण आमाहा रातीही नाहा अने आधाराआ पोन नाहा.

⁶ त्यापोत आमू दिहरा सारखे निंदोम रोहू कायना अने तुमु जागतू रोत सावध रोअलो.

⁷ काहाके जे हुविलो ते रात्रीच हुविलो अने जे झिंगणार ते रात्रीच झिंगतात.

⁸ पोन आमू ज्या दिहाआ होय विश्वास अने प्रेम याहा आशा कालिते अने तारणाआ एहेज टोपी कालीत सावध रो.

⁹ काहाके परमेश्वरोओ आमाहा क्रोधा कोअता नाहा पण यकोअता नेम्युहू होय का आमाहा प्रभू येशु ख्रिस्ताद्वारे तारण मिळूहुजोवे.

¹⁰ तो आमाहा आकाता यामुळे मरण पाव्यू का आमाहा जेबी जागतू होय किंवा हुवतले होये आखे मिलून त्याआरी जिवंत रोअलो.

¹¹ याकोता तुमु एकादिहराहा सत्वाना दया अने एकादिहराहा उन्नतीचे काहाके बोनाहे तुमु कोअता.

कलिसियाहा उपदेश

¹² ऐ पाही, आमाहा तुमामे विनंती कोअत्लू काजे तुमामे मेहनतो कोअता अने ख्रीस्तात तुमाआ मार्गदर्शन कोअनारे होय अने तुमामे हिकत्ले तियाआ मान राखिलो.

¹³ अने तियाआ कामाकोता प्रेमोवाही तियाहा जास्तीज सन्मानाने योग्य माना खुद पेल मिलून मिलीलू रो.

¹⁴ ऐ पाही आमू तुमामे समजाडत्लो काजे व्यवस्थित वागिलो नाहा तियाहा समजाळेए जे धीर तोईलो कोम होय तियाहा धीर दया निर्बल ओत गोईलू हम्बालीलो आखाप रोत सहन शक्ती देखा वागीलो.

¹⁵ सावध एहेलू, कोडु कोडाआ वाईटो बद्दल वाईट कोअहू कायना पण हरेक टेमे हाजो कोअलाआ तीयार रो आपसामेहे अने आखा आरिजे हाजो कोईत चेष्टा को.

¹⁶ कायम आनंदाम रो.

¹⁷ हमेशा प्रार्थनामे रो.

¹⁸ आखी गोठीमे धन्यवाद आपा काहाके तुमा कोअता ख्रिस्तामेह परमेश्वरोओ एज इच्छा होय.

¹⁹ आत्माहा उलाड़ी देदलू नाहा

²⁰ संदेष्टाहा तुच्छ मानु नाहा.

²¹ आखे गोठीई पारख कोजे हाजो होय तियाहा तोईत रो.

²² आखे प्रकारो बुराईपो रोत सेटू रोजा.

आशीर्वाद

²³ शांतीचा परमेश्वर स्वतः तुमामे पवित्र कोये अने तुमाआ आत्माहा अने जीव अने डील आमाआ प्रभू येशु ख्रिस्त आवे ताहु पुरो पणे निर्दोष अने हाजूहोय राहो.

²⁴ तुमामे गोगाडनारा खोरो विश्वासयोग्य होय अने तो ऐहलेच कोये.

²⁵ ऐ पाही, आमा कोअता प्रार्थना को.

²⁶ आखे पायहोहो पवित्र चुंबनाने स्वागत को.

²⁷ आय तुमामे ख्रिस्ताची शपथ आपोहो का ओ पत्र आखे पायहोहो वासित होमलाडे.

²⁸ आमू प्रभू येशु ख्रिस्ताआ कृपा तुमापो आरी रोय.