1 थिस्लोनी 4 - नोयरी नोवलू नियम

पवित्रता कोअता बुलाहट

¹ याआ कोअता ऐ पाही आमू तुमाहा विनती कोअताहा अने तुमाहा प्रभु येशुमेहे होमजाते का जेहे तुमु आमू पोओ रोत हाजी चाल सालीई लो अने परमेश्वरा प्रसन कोइला हिकल्यु होय अने जेहलो तुमु चोलतेह बी तेहलोज अने वोड़ते जावा.

² काहाके तुमामे मालुम होय का आमू प्रभू येशु त्यापोरोत तुमामे कोडाकोडा आज्ञा पुगाडिही.

³ काहाके परमेश्वरोओ इच्छा ए होय का तुमु पवित्र बन्यो, म्हणजे व्याभिचारा रोत सेटा-सेटा,

⁴ अने तुमामे हर एक जण पवित्रतेने अने मानिलोओ आपाआ लाडीह जोडयो कोईत मालुम जोवे,

⁵ अने ओ काम वासनेने नाहा अने तियाअ अन्यजाति पण नाहा जे परमेश्वरोहो नि जाआत्ली,

⁶ आव गोठीमे कोडु आपाआ पायहोहो ठोगीत कायना अने तियापो गैरफायदा लेऊ कायना काहाके प्रभू आव आखे गोठीई बदलू लेही होय जेहलो का आमू तुमामे पहिलुच कोयु अने सावध पण कोल्यु ओते.

⁷ काहाके परमेश्वरोओ आमाहा अशुद्ध उविला कोअता नाहा ताहा पवित्र उविला कोअता हादिलो होय.

⁸ त्यापोत जो याहा तुच्छ ने मान्तलू तो मांहाहा नाहा पण परमेश्वरोओ तुच्छ ने मान्तलू जो आपाआ पवित्र आत्माआ तुमामे आपोहो.

प्रेम अने कार्य

⁹ पोन बंधु प्रेमाआ विषयाम आवश्यक नाहा का आय तुम्हीही कितेबी लिखेहू, काहाके आपसामेहे प्रेम कोअला तुमु स्वतः परमेश्वारापो रोत हिकल्ये होय,

¹⁰ अने आखे तुमु मकिदुनिया पाविले आरी एहलो कोअता, पोन ऐ पाही, आमाहा तुमामे संमजाडीनारू का फासी वोदिते रो,

¹¹ अने जीही आमू तुमामे आज्ञा आप्यी होय तेहलूज ठावकू पणे रोंहु अने आप आपाआ काम कोअला अने आप आपाआ आताई कामाविलो प्रयत्न कोआ,

¹² काहाके बारथेए त्यापोरोत सन्मान मिळवा अने तुमामे कोडलाज वस्तूअ कमीपणा नाहा.

मसीहाआ पुनरागमन

¹³ ऐ पाही, आमाआ एहली इच्छा नाहा का तुमु त्याविषयी जे हुवीत होय ओजान्यो रोअलो एहलो उवूंहू नाहा का तुमु दिहराकाजे दुख कोईओलो ज्याहा आशा नाहा.

¹⁴ काहाके जर आमू विश्वास कोअत्लू का येशु मोल्यु अने फासी जिवंत उठ्यू, ताहा तेहलूज परमेश्वर तियाहा पण जे येशुमेहे मोअये होय ते त्याआरी लेतजाय.

¹⁵ काहाके आमू प्रभूउ वोचाना प्रमाने तुमामे आ कोत्लू का आमू जे जिवंत होय अने प्रभू तियाआ आवेताहा वासित रोहू मोल्या केधीज आगाडी जानारू नाहा.

¹⁶ काहाके प्रभू येशु स्वतः होर्गामरोत उतरे तियाअ टायमोमें आज्ञा आपही अने प्रमुख दूतांआ शब्द होमला आविलो अने परमेश्वरोओ तुतारी फुकल्यो जानारू अने जे ख्रिस्तात मोल्या होय ते पालील्यो जिवंत उठनारू.

¹⁷ तेहलाम आमू जे जिवंत होय त्याआरी मेघाआरी उचलेले जाऊ का अंतरात प्रभूहु मिलुहु अने यावाही आपु हरेक टेमे प्रभू आरी रोहू.

¹⁸ याकोईत आव वचनाने एक दिहराहा सात्वना आपित रो.