1 थिस्लोनी 3 - नोयरी नोवलू नियम

विश्वासों कोअता चिंता

¹ याआ कोअता जाहा आमासी नाहा रोवायो ते आमू ओ थोरावल्यो का एथेंस मेहे एखले रोतजाय,

² अने आमू तीमुथियुस जो ख्रिस्त सुसमाचार तोयलो आमाआ पाही अने परमेश्वरोओ सेवक होय यामेहे मोकल्यीत का तो तुमामे मजबुते कोनारु ताहा तुमाआ विश्वासापो रोत तुमामे समजाडीलो काजे,

³ का कोडु आव खोतालो घाबरील्यो जाऊ कायना काहाके तुमु स्वतः सम्जिल्यो का आमू त्याजकाजे नियुक्त कोयु होय.

⁴ काहाके पहिलुच आमू तुमाआ ओते तेहलाम तुमामे कोयु ओतू का आमाहा दुख सोमजाला लागे, अने ऐहलेच उवे होय जेहलो तुमामे मालुम होय.

⁵ याकोता मापोरोत फासी रोवायो नाहा ताहा तुमाआ विश्वासाआ संबंधावाही विचार जाअहू आय मोकल्यीत होय का एहलो उवूंहू नाहा का परीक्षा कोनारामे तुमाआ परीक्षा कोअयी होय अने आमाहा परिश्रम व्यर्थ गोये होय.

तिमुथियुसो द्वारा उत्साहित

⁶ पोन ओमे तीमुथियुस तुमापोरोत जो आमाईही आवयू होय तुमाआ विश्वास अने प्रेमाची सुवार्ता होम्लाड्यू अने आव गोठी कोअता पण होमलावत्लू का तुमु कायम प्रेमोवाही आमाआ मुगे कोअता अने आमाहा पालीला इच्छा कोअता जेहलो आमू पोन तुमामे पालीला इच्छा कोअत्लू.

⁷ त्यापोत ऐ पाही, आमू आपाआ आखे दुखो मेहे अने छळात तुमाआ विश्वासा तुमाआ विषयी शांती जोड़ी

⁸ काहाके ओमे जर तुमु प्रभू माय स्थिर रोल्या ताहा आमाहा जिवंत होय.

⁹ अने जेहलो आनंद आमाहा तुमामे आमाहा आपाआ परमेश्वारा आगाडी होय तियाआ बोदलाम तुमा बारामे आमू कोडला प्रकारे परमेश्वोरारी आभार मानेतू?

¹⁰ आमू रातदीही जास्तीज प्रार्थना कोईत रोतलू का तुमाआ सोब पाहावे विश्वासाचे कोम पुरो कोईलो.

कलीसिया कोअता प्रार्थना

¹¹ ओमे आमाआ परमेश्वर अने बाह्हू आमुज अने आमाआ प्रभू येशु तुमाही हाजा मेहे आमाहा मार्गदर्शन कोईलो,

¹² अने प्रभू एहलो कोअला जोवे का जेहलो आमू तुमापो प्रेम कोअत्लू तेह्लुज तुमाआ प्रेम पोन आरीइ अने आखे माहुआरी वादिलोहो अने विपुल उवनारा रोअला आवे,

¹³ म्हणजे तो तुमाआ मनांना एहेलू मजबुते कोईलो का जाहा आमाआ प्रभू येशु आखे पवित्र मांहाआरी आविलो ताहा ते आमाआ परमेश्वर आपाआ बाह्हू याआ आगाडी पवित्र तेत निर्दोष रोंहु जोवे.