1 थिस्लोनी 2 - नोयरी नोवलू नियम

पौलुसोओ आचरण

¹ ऐ पाही, तुमु खुद बी जाआ ताहा का आमाआ तुमाआ ईही आविलो व्यर्थ ने गोयो,

² पोन तुमु स्वतः सम्जिल्यो सुरवातीती फिलिप्पी मेहे दुख सहन कोअला अने उपद्रव कोअत्लू तेहलाम बी परमेश्वराने आमाहा एहली हिमंत आप्यी का आमाहा परमेश्वरोओ सुवार्ता एहलो कठीण विरोध ओयताहा पण तुमामे कोयु.

³ काहाके आमाआं हिकवन धर्माने नाहा किंवा अशुद्ध तेणे नाहा अने कपट पण नाहा,

⁴ पोन जेहलो परमेश्वराने आमाहा योग्य ठेरवीत सुवार्ता आपलो होय आमू तेहलूज वर्णन कोअत्लू तीयाम मांहाहा नाहा पण परमेश्वरोओ जो आमा मनाहे होमजीत्लू तियाहा खुश कोईत रोतो.

⁵ काहाके तुमामे मालुम होय का आमू कोयो चापलुसी च्या गोठी कोईत ओतू अने न लोभासनी नाटक कोईत ओतू तिया परमेश्वर साक्षीदार होय,

⁶ अने जर आमू मसीहीई प्रेषित ओत तुमापो दबाव टाकुहू शकत ओतू अने तुमामे सन्मान नाहा ताहा दिहीराहा पण नाहा.

⁷ पोन ज्या प्रमाणोओ याह्ही आपाआ पोऱ्यो पोऱ्याहा पालीत पोषणाआ कोअते तेहलूज आमू पोन तुमामेरोत स्नेह देखाड्यो होय

⁸ अने तेहलूज आमाहा तुमाआ इच्छा कोईत ओते एवडोज नाहा ताहा परमेश्वरोओ सुवर्तेवर आपाआ जीव तुमामे आपुहू तीयार ओते त्यापोत ए तुमु आमाहा प्रिय ओतगोयु ओते.

⁹ काहाके ऐ पाही, तुमु आमा परिश्रमाहा अने मेहनत कोनारू अने मेकात्ले आमाहा यकोअता रातदीही काम धन्धा कोईत तुमाआ माय परमेश्वरोओ सुवार्ता प्रचार कोअयी का तुमा मेहेरोत पण कोडापो ए दबाव आवहू कायना.

¹⁰ तुमु स्वतःच साक्षीदार होय अने परमेश्वर पोन साक्षीदार होय का तुमु विश्वासामध्ये आमाहा वाजीलो केहलो पवित्र अने धोर्मी अने निर्दोष रोलया.

¹¹ तुमामे मालुम होय का जेहलो बाह्हू आपाआ पोर्यआरी वागीलो तेहलूज आमू पोन तुमा मेहेरोत प्रत्येकाहा शिक्षण आपोहो अने शांती आपोहो, समजाडत्लो

¹² का तुमाआ वागिलो परमेश्वरोओ योग्य होय जो तुमाआ आपाआ राज्याम अने गौरवात हादुहु होय.

थिसल्लुनिकियोओ मांहोओ रूपांतरण

¹³ त्यापोत आमू पोन परमेश्वरोओ कायम धन्यवाद कोअत्लू का जाहा आमापोरोत परमेश्वरोओ वचन तुमापोओ पोचल्यो तेहलाम तुमु तियाहा मांहाआ नाहा पण परमेश्वरोओ होमजोत अने खरोज ओ ऐहलेच होय एहलो समझून स्वीकारीत लेधलो अने तो विश्वासामध्ये जो विश्वास मेकलू तो प्रभावशाली होय.

¹⁴ त्यापोत तुमु ऐ पाही, परमेश्वरोओ तिया मंडळ्यासारखी वागणुक कोजे याहुदामेहे ख्रिस्त येशु माय होय काहाके तुमू पण आपाआ माहापो रोत तेह्लुज दुख मिलउत जेहलो तिये यहुदीया मेहे मिलउत ओतलो,

¹⁵ जिये प्रभू येशुहू अने भविष्यवकत्याहा पण माईत टाक्ये अने आमाआ छळ कोअयु अने परमेश्वर त्याईही खुश नाहा अने ते आखे मांहाआ विरोध कोअता,

¹⁶ अने ते अन्यजातिही तियाआ तारणाआ गोठी कोअलाआ आमाहा उभा राखिलो का आखे काआ आपाआ पापोओ क्षमा उवनारा रोनारु पण तियापो परमेश्वरोओ जाहके राग आविलो लाग्युहयु.

कलिसियाहा मिल्लोओ अभिलाषा

¹⁷ ऐ पाही, जोवे आमू थोडो वेळो कोअता मोनामे नाहा पण उघड पोन अलग होय ओतू ताहा आमू वोडो इच्छावाहि तुमाआ सोब पालीला कोअता फासी जाखो प्रयत्न कोअयु.

¹⁸ त्यापोत आमू (म्हणजे आय पौलाने) एकवा नाहा पण बेनवा तुमापोओ आविलो प्रयत्न कोअयु पोन शैतान आमाहा रुकित रोयलु.

¹⁹ काहाके आमू आशा किंवा आनंद किंवा गौरवो मुकुट की होय? की आमू प्रभू येशु आगाडी तियाआ आविलाआ टायमोमें तुमु रोही नाहा?

²⁰ आमाआ गौरव अने आनंद तुमुज होय.