1 पतरस 4 - नोयरी नोवलू नियम

बदलिलो जीवन

¹ याआ कोअता जाहा मसीह डीलोमेह आवित दुःख उठावयु तुमु बी तियाआ मनसा हा हत्याराहा समान कोआ काहाके जो डीलोमेहे दुःख उठावल्यु तो पापोम रोत सुटित गोयु,

² काहाके का मांहुहू आपाआ उरील्योओ देहा मेरये जीवोन मांहाहा वासना प्रमाणोओ नाहा ताहा परमेश्वरोओ इच्छेवाइहि नुसार वागीलो.

³ काहाके का अन्यजाति याआ इच्छेवाइहि नुसार काम कोअला, अने वाईट कामो शक्ती, विषय वासना मद्यसक्ती रंगेल पणा, बदफैली, अने नीषर्द मूर्ती पूजा माय जीही पर्यंत आमू पाल्या वेले वागीलो नाहा जाअखो उवे.

⁴ यावांही ते नवल कोअता का तुमु तेहलूज हाजा बेताल पाणोम तियाहा हातीरी नाहा आपित, अने याकोअता ते हाजो वाईट कोअता,

⁵ पोन ते तियाआ जो जीवंताआ अने मोल्याआ न्याय कोअला तीयार होय, हिशोब आपे.

⁶ काहाके का मोल्याहा पोन सुसमाचार याकोअता होम्लाडी गोयी का आगोमेऱ्यो ताहा माहुरी तिया न्याय ओवो, पोन आत्मा मायते परमेश्वरा नुसार जीवतु रोयो.

परमेश्वरो महिमा कोअता सेवा

⁷ आखे गोठीही आखिर उवे होय; याकोअता मर्यादेने रो प्रार्थना कोइला याकोअता सावध रो.

⁸ आखा मेहे श्रेष्ठ गोठी ए होय का एक दिहरापो जाखा प्रेम को, काहाके का प्रेम अनेक पापोहो टापीत लेहे.

⁹ विना कुरकुर कोईत एक दिहराआ होगवाड्या सत्कार कोअलो.

¹⁰ ज्याहा जे वरदान जोडयेहे होय, ते तियाहा परमेश्वरोओ आंगे आगे एहलाम कृपादाणा नुसार हाजा कारभारी प्रमाणोओ एक दिहराआ सेवा को.

¹¹ केधी कोडु बुले, ताहा एहलो गोगे सोमजा परमेश्वरोओ वचन होय; केधी कोडली सेवा मुडोपो, ताहा तिया शक्तीवांही कोजे परमेश्वर आपोहो; ज्याआ नि आखे गोठी माय येशु ख्रिस्ताआ त्यापोरत परमेश्वरोओ गौरव प्रगट ओवो महिमा अने साम्राज्य कायम तीयाआज होय आमेन.

परमेश्वरो महिमा कोअताआ दुख उठावलोओ

¹² ओ प्रियांनो, जे दु:ख रूप आग तुमामे पारखिलो याकोअता तुमापो आवयी होय, याही रोत ओ होमजीत नवल नाहा कोहू का अनोळखाती नाऐ गोठी तुमापो आरदज आवयी होय.

¹³ पोन जेहलो-जेहलो ख्रिस्ताआ दु:खा माय सहभागी ओये, आनंद को, ज्याआ नि तियाआ गौरव प्रगट उविलाआ वेले पोन तुमु खुस खुशिमेहे उवे.

¹⁴ फासाडी केधी ख्रिस्ताआ नाव याकोअता तुमाआ निंदा कोअयी जाहो ताहा तुमु धन्य होय, काहाके का गौरवोअ आत्माआ, जो परमेश्वरोओ आत्माआ होय, तुमाआ उपो आवीत रोतगोल्यु होय.

¹⁵ तुमाआ मायरोत कोडु माहहू खुनी किंवा बांड किव्हां दुष्कर्मी होय, पोन दिहीरा कामा माय आथे टाकीला कारनोवाही दु:ख पालूहु कायना.

¹⁶ केधी ख्रिस्ती उविलाआ कारनोवाही दु:ख जोडयेहे, ताहा लज्जीत नाहा व्हा, पोन आव गोठी याकोअता परमेश्वरोओ गौरव को.

¹⁷ काहाके का ती वेल आवीत गोयी होय का पोलो परमेश्वरोओ माहुहु न्याय कोअयु जावा; अने जांहा येशुनी आरंभ आमापोरोत उवेताहा तियाआ कि आखिर उवे जे परमेश्वरोओ सुवार्तेला मानीत नाहा?

¹⁸ अने “केधी धोर्मी माहहू पोल कठीण डोआवाही उद्धार पावेल ताहा अधार्मिक अने पाप्यांआ कि ठिकाण?”

¹⁹ याकोअता जे परमेश्वरोओ इच्छेवाइहि नुसार दुख ईविशीत, ते हाजो कोअते जात खुदोओ जीवोहो विश्वासयोग्यो निर्माण कोअनाराहा होपी दे.