1 पतरस 3 - नोयरी नोवलू नियम

लाड्या

¹ ऐ बोई तुमु बी आपाआ माटिई आधीन रोआ याआ कोअता का जर यामेहेरोत एकदू एहली ओय जे वचनोहो ने मानती ओय,

² तेबी पोन तुमाआ बिको आरी पवित्र चाल-चलणूकला पालीत बिना वचनो आपाआ-आपाआ लाडीई चालचलना व्दारे खेसा जाय.

³ तुमाआ होबा देखानारो कायनाहा, म्हणजे शिगया होस गोफान, अने हुनाआ समाने, किंवा अलग-अलग कापडे पेअलोओ,

⁴ पोन तुमाआ निकालो अने गुप्त मांहो कोअता, सौम्य अने मोनाआ शांतीई अविनाशी सजविलो हारकीज रोअलो, काहाके देवाआ दृष्टी मेहे तियाआ बहुमुल्य होय.

⁵ पूर्वीआ कालामे पवित्र बोई पोन जे देवापो आशा मेकीत ओती, स्वताहा या रीती सजाडत्ली अने आप आपाआ माट्योह अधीन रोत ओती.

⁶ जीही सारा आब्राहमो आज्ञाम रोत ओती अने तियाहा मालक कोयु ओती यावाही तुमु पोन जर हाजो कोईलो अने कोडलाज प्रकारोओ बित न ओवो, ताहा तियाआ पोयरयी ठेरवीही.

पति

⁷ तेहलूज ऐ माटी, तुमु पोन बुद्धीमानी सी लाडीआरी जीवोन जगा अने बुईही नाजूक पात्र होमजीत तियाआ आदर कोओ होमजीत का आपु बेन जीवोन रूप कृपादानाआ वतनदार होय, ज्याही तुमाआ प्रार्थना धाबू नाहा सेकेहे.

आशीष वारिस ओवलोओ बुलाहट

⁸ आखिर आखा आखे एक मोन अने कृपामय अने बंधू प्रेम कोअनारे, अने कीव कोअणारे, अने नम्र बन्यो.

⁹ वाईट बदली वाईट नाहा कोहू अने न शिव्याराई बदली गाई दया; पोन उलटो आशीर्वाद अपिलो काहाके तुमु आशीर्वाद तियाआ वारीस कोईलाकाजे हादाडल्यो गोये होय.

¹⁰ काहाके जो कोडु जीवनोओ इच्छा राख्नारो अने हाजो दीही पाल्हू इच्छितो, तो आपाआ जीभेहे वाईटानी, अने आपाआ ओठरी छळाची गोठी कोअनारू उबराखिन रोवाडजे.

¹¹ तिये वाइटाआ होबती सोडविलो, अने हाजो कोईओलो; तिये मिळ सुळविलोओ हाजा, अने तियाआ आज्ञेत रोअलो,

¹² काहाके देवोओ डोआं नितीमानापो रोतेहे, अने तियाआ कान तियाआ विनंती जागे रोतेहे; पोन प्रभु वाईट कओनाराआ विमुंख रोतलू.

भलाई कोअलो कारण सातव

¹³ जर तुमु हाजो कोइला कोअता आशा बोळगिनारे होय ताहा-ताहा तुमाआ वाईट कोअनारू पोन कोडू होय?

¹⁴ जर तुमु नीतीमहत्वा मुळे दु:ख पोन सोसले, ताहा धन्य होय; पोन माहु बिवडाल्या नाहा बित, अने नाहा काब्रात्लू,

¹⁵ पोन ख्रिस्ताहा प्रभू होमजीत आपाआ-आपाआ मोनामे पवित्र सोमजा जो कोडु तुमामे तुमाआ आशाआ विषयाम कोयो फ़ुस्ल्याआ, तियाहा उत्तर आपलो कोअता कायम तियार रो पोन नम्र अने बिकोरी;

¹⁶ अने बुद्धी पोन शुद्ध मेका, याकोअता का ज्या गोठी विषयी तुमाआ बदनामी ओती तियाआ विषयी ते, जे ख्रिस्ताआ तुमाआ हाजो चाल चालोनोहो अपमान कोअता, लज्जीत उवे.

¹⁷ काहाके जर देवाची एज इच्छा होय का तुमु हाजो कोइलाआ कारनो कोईत दुख सोसावे, ताहा ओ वाईट कोइलाआ कारनो कोईत दु:ख सहन कोईलावाही हाजो होय.

मसीहाआ दुख

¹⁸ याकोअता ख्रिस्ताने पोन, म्हणजे अधर्मी याकोअता नितीमानाने, पापाआ कार्नावाही एक टायमोआ दु:ख सहन कोयु, यकोअता का आमाहा देवाजागे पुगाडे, तो देह रुपात जीवे मारीलो गोल्यो, पोन आत्माआ रुपोमे जीवतो कोअयु गोल्यो.

¹⁹ त्याज तिये जात बंदि आत्माआ पोन घोषणा कोअयी,

²⁰ जिये तिया गोठी टाइमापो आज्ञा नाहा कोयु, जाहा देव नोहाआ दिहोम धीर तोईत रोल्यो, अने ते जहाज बोनावोओ ओते, ज्याम बोहित थोडो मांहे म्हणजे अने प्राणी पाअयोआ व्दारे वासित गोये.

²¹ तियाआ पाअयोओ दृष्टान्त पोन, म्हणजे बाप्तिस्मे, येशु ख्रिस्ताआ जीवतो उठीलाआ व्दारे, ओमे तुमामे वासाडे याआ डीलोओ मोयोले सेटे कोईत अर्थ होये; परंतु शुद्ध विवेकवांही देवाआ वंशामेह उवनारा जाअला अर्थ होय.

²² तो होर्गापोरोत जात देवाआ हाजाडी जागे बोहयु अने स्वर्गदूत अने अधिपती अने सत्ताधीश तियाआ आधीन मेकल्ये.