1 पतरस 2 - नोयरी नोवलू नियम

निवडिलू दगडू अने तियाआ निवडीले मांहे

¹ याकोअता आखा प्रकाराआ बैरभाव अने छल अने कपट अने डाह अने निंदा सेटे कोईत,

² नवो जोल्मो ओवल्यु पोऱ्या सारखो निर्मळ आत्मिक दुधाआ लालसा कोआ, म्हणजे तियाआ व्दारे तारण मिलीविलोकाजे वोडता जावा,

³ काहाके तुमु प्रभूउ कृपे वाइहि चव चाक्खो होय.

⁴ तियाआ जागे आवीत, ज्याहा मांहे बेकार ठेरव्ये परंतु देवाआ नोजरेवाही निवडील्ये अने मूल्यवान जिवंत डोणो होय,

⁵ तुमु पोन खुद जिवतो डोनोओ सारखो आत्मिक को बोनावोओ जायलो, ज्याहीरोते याजक गणआ पवित्र समाज बोणीत, एहलो आत्मिक अर्पण सोडावा जे येशु ख्रिस्ताआ व्दारे देवोहो पोटनारु ग्राष्य होय.

⁶ याआ प्रकारे पवित्र शास्त्रामेहे पोन आव्ये होय “पाला, आय सियोना मेह कोनशील निवडीलो अने मूल्यवान डोणो तोयलो अने जो कोडु तियापो विश्वास मेकतुल्यो, तो कोडलाज प्रकारे ठोगायु नाहा उवे”

⁷ आखिर तुमा कोअता जे विश्वास कोअता ते ताहा मूल्यवान होय, पोन जे विश्वास नाहाकोईत त्याकोअता “ज्या डोणुहु राजमिस्त्रीयांनी बेकार कोओ ओतु, तोज कोनशिला ओवयू,”

⁸ अने “ठोकर लागनार डोणो अने ओटकनारू खोड्को एहेलू ओवयू,” काहाके ते ताहा वचनाआ नाहा होमजीत ओत किलू अने याज याकोअता ते ठरव्येहे पोन गोये,

⁹ पोन तू एक निवाडल्यु वंश, अने याजकिय याजकगण, अने पवित्र मांहे अने देवाआ प्रजा होय, यकोअता का जिये तुमामे अंधारामे आपाआ अदभूत उजवोडाम हादिलो होय, तियाआ गुण प्रगट को.

¹⁰ तुमु पोयले ताहा किबी नाहा ओते पोन ओमे देवाआ प्रजा होय; तुमापो दया नाहा उवी ओती पोन ओमे तुमापो दया उवी होय.

परमेश्वरो कोअता जीवलोओ

¹¹ ऐ प्रियजन, आय तुमामे विनंती कोत्लू का तुमु आपाआ स्वताला परदेशवाशी अने प्रवासी होमजीत तिया सांसारीक जल्मामेहे आवली जी आत्माहा लोढाई कोअता, साभालीलो रोविलो.

¹² अन्यजाति तुमाआ चाल-चलाविलो हाजो जाहा म्हणजे ज्या-त्या गोठीमेहे ते तुमामे दुष्कर्मी होमजीत बदनामी कोअता, ते तुमाआ हाजो कामा कोअता पालीत तियाआ कारनो कोईत कृपा-दृष्टीई तेदीही देवोओ गौरव कोईलो.

अधिकारीई आधीन रोअलोओ

¹³ प्रभु कोअता माहुहीई ठेरविल्ये हर एक व्यवस्थेआ आधीन रोयलो राज्याआ याकोअता का तो आखा उपो श्रेष्ठ होय,

¹⁴ अने सुभेदार, काहाके ते वाईट कोअनाराआ दण्ड कोईलाकाजे अने हाजो कोअनाराआ प्रशंसा याकोअता तिये मोक्लील्यो होय.

¹⁵ काहाके देवाआ इच्छा ए होय का तुमु हाजो काम कोइलाआ व्दारे निर्बुद्ध माहुहु अज्ञानाआ गोठी कोअता बंद कोईत दया.

¹⁶ आपाआ माह स्वतंत्र सोमजा, पोन आपाआ आव स्वतंत्रेला खाराब कोअता आड नाहा बोनहू; पोन आपाआ माह देवाआ दास होमजीत ल्या.

¹⁷ आखाआ मान मेक, पाहीपो प्रेम मेका, देवोहो बिह, राज्याआ मान राखिलो.

मसीह दुखोओ उदाहरन

¹⁸ ऐ सेवको, हर एक प्रकारोओ बिखीकी आपाआ मालख्यो अधीन रोयलो, न फक्त तियाआ जे हाजो अने सौम्य होय पोन तियाआ जे कडक होय.

¹⁹ काहाके जर कोडु देवाआ विचार कोईत अन्ययांनी दुख उठवीत त्रस सहन कोअत्लू ताहा ओ उचित होय.

²⁰ काहाके जर तुमु पाप कोईत ठोकर खात अने धीर तोआ, ताहा यामे कि वोडी गोठी होय? पोन जर हाजो काम कोईत दु:ख सहन कोअता अने धीर तअत्ले ताहा देवोहो उचो होय.

²¹ अने तुमु याकोअता हादिलो पोन गोये होय, काहाके ख्रिस्त पोन तुमा कोअता दुख सहित तुमामे एक कित्ता कालविनारु आप्यू होय का तुमु पोन तियाआ पद चिन्होपो साला.

²² न ताहा तिये पाप कोल्यु अने न ताहा तियाआ सोबिवाही छळआ कोडली गोठी निहथी.

²³ तो गाई होमलित गाई नाहा आपित ओतू ऐन दु:ख सहित कोडाआ हा धमकी नाहा आपित ओतु, पोन आपाआ माह खोरो न्याय कोनाराईही होपी देतु ओतु.

²⁴ तो स्वता आमा पाप आपाआ डिलोपो लेत वधस्तंभपे सोडवीत गोल्यो, ज्याही आमू पापो कोअता मोईत धार्मिकता याकोअता जिविलो तियाआ माआदे खालोओ तुमु हाजो उवे.

²⁵ काहाके तुमु पहीले फिरनारो मेंडाहोस ओते, पोन ओमे आपाआ जीविलो पालनारू अने अध्यक्ष तिया जागे फिरीत आव्ये होय.