1 यूहन्ना 3 - नोयरी नोवलू नियम

¹ पाला बाह्हू आमूउ आरी केहलो प्रेम मेकल्यो होय का आमू परमेश्वरोओ सोए कोवाया अने आमू होय बी या कारणों वाई संसार आमाहा नाहा उल्खीतू काहाके तेए बी तियाआ नाहा उलख्ये.

² ऐ प्रीयांनो, ओमे आमू देवोओ पोऱ्ये होय, अने ओमेजा ओ प्रगट नाहा उवे आमू कि किबी लेही येतेहे होमजीत्लू का ओमे ते प्रगट उवेताहा आमू तियाआ होस होय, काहाके तियाहा तेहलूज पालनारू जेहलो तो होय.

³ अने जो कोडु तियापो आशा मेकोहो, तो आपाआ स्वताहा तेहलूज पवित्र कोअत्लू जेहलो तो पवित्र होय.

पाप अने परमेश्वरोओ सन्तान

⁴ जो कोडु पाप कोअत्लू, तो व्यवस्थाआ विरोध कोअत्लू; अने पाप ते व्यवस्थाआ विरोध होय.

⁵ तुमाहा मालुम होय का ते याकोअता प्रगट ओवयू का पाप हरिन कोईली; अने तियाआ स्वभावोमे पाप नाहा.

⁶ जो कोडू तीयाम बोणीत रोतलू, तो पाप नाहाकोईत जो कोडू पाप कोअत्लू, तिये न ताहा तियाहा पालील्यो अने न तियाहा ओलखे.

⁷ ऐ पोऱ्या, कोडाआ बहकलामेह नाहा आवी जो नीतीई काम कोअत्लू, तोज तियाआ सारखू नीतिमान होय.

⁸ जो कोडु पाप कोअत्लू तो शैतान त्यापोरोत होय, कोडु सौतान पेलरोत पाप कोईत आवयू होय परमेश्वरोओ पोऱ्या याकोअता प्रगट ओवयू का सौताणा काम नाश कोइला कोअता.

⁹ जो कोडु देवाआ जन्म उवलू होय, तो पाप नाहाकोईत; काहाके तियाआ बीज तियाआ बोणीत रोतलू, अने तो पाप कोअतुज नाहा काहाके देवो मेहे जन्म उवलू होय.

¹⁰ याज त्यापोरोत देवोओ पोऱ्ये अने शैतानो पोऱ्ये होमज्ये जातेहे; जो कोडु नीतीचे काम नाहाकोईत तो देवापो नाहा, अने न तो जो आपाआ पाहीपो प्रेम नाहा कोतु.

आपस मेहे प्रेम सी रोवा

¹¹ काहाके जो खोबोर तुमु पेलुजरोत होमलित, ते ओ होय का आमू एक दिहरापो प्रेम कोईओलो;

¹² अने कैन सारखो न बोनाडहि जो तियाअ दृष्टांत ओतु, अने जिये आपाआ पाहीई वध कोअयु अने तियाहा कोडला प्रकारे वध कोअयु? हारके कारनो कोईत का तियाआ काम वाईट ओते, अने तियाआ पाहोअ काम नीतीने ओते.

¹³ ऐ पाही, जर जग तुमामे वैर मेकीत होय ताहा आचर्य नाहा कोहू.

¹⁴ आमाहा मालुम होय का आमू मरणो पार कोईत जीवनामे पुग्या होय; काहाके आमू पायहोप प्रेम कोअत्लू, जे प्रेम नाहाकोईत ते मोअल्य देशोमे रोत्ले.

¹⁵ जो कोडु आपाआ पायहोरी वैर मेकोहो, तो खुनी होय; अने तुमामे मालुम होय का कोड़ा खुनी मेहे सार्वकालिक जीवोन नाहा रोत.

¹⁶ आमू प्रेम याआ होमज्ये का तिये आमा कोअता आपाआ जीव आपित आप्यू; अने आमाहा पोन पायहो कोअता जीव आप्लु जोवे.

¹⁷ पोन आ कोडापरोत जगोआ धनदौलत होय अने तो आपाआ पायहोहो गरीब पालीत तियापो दया आवयी न जोवे, ताहा तीयाम देवोओ प्रेम केहलो बोणीत रोते सेकतलो?

¹⁸ ऐ पोऱ्या, पोन काम अने सत्त्याआ व्दारे पोन प्रेम मेका.

परमेश्वरो सम्मुख साहस

¹⁹ त्यावाहिज आमू होमजुत्लू का आमू खोरेजे होय; अने ज्या गोठीमेहे आमाहा मोन आमाहा दोषी ठेरवीही, तिया विषयी आमू तियाआ आगाडी आपाआ-आपाआ मनाहे ढाष्य आपुहू सेकतेहे;

²⁰ काहाके देव आमा मोनाप रोत वोडो होय, अने आखे किबी होमजीत्लू.

²¹ ऐ प्रीयांनो, जर आपाआ मोन आपुद्र दोषी ठहरावतो ने ओयताहा आपाहा परमेश्वरो सामने हिमत ओवत्ली,

²² अने जे किबी आमू मागोहो, ते आमाहा त्यापोरोत जोळे, काहाके आमू तियाआ आज्ञा मोनोहो अने जे तियाहा जोवे ते कोत्लू.

²³ तियाआ आज्ञा ए होय का आमू तिया पुत्र येशु ख्रिस्ताआ नावापो विश्वास मेकिलो, अने जेहलो तिये आमाहा आज्ञा आप्यी होय तियाआ नुसार आपसामेहे प्रेम कोईलो.

²⁴ जो तियाआ आज्ञा मोनोहो, तो तीयाम अने तो तीयाम बोणीत रोहो अने त्याआरी, म्हणजे तियाअ आत्मा आरी जो तिये आमाहा आप्यू होय, आमाहा मालुम होय का तो आमापो बोणीत रोहे.