1 यूहन्ना 2 - नोयरी नोवलू नियम

येशु आमाआ साहयक

¹ हे माआ पोर्या आय ते गुठ्या तुमाहा याआ कोअता लेखहो का तुमु पाप ने कोये अने जर कोडू पाप कोआ ते बाह्हाआ ईही आमाआ एक सहायक होय म्हणजे धोर्मी येशु ख्रिस्त होय,

² अने तोज आमा पापाआ प्रायश्चित होय, अने फक्त आमाहीजे नाहा ताहा आखे जुगाआ पापाहा पण.

परमेश्वरोओ आज्ञा

³ केधी आमू आज्ञाहा मोनोहो, ताहा ह्याआ आमू ओलखीत लेऊ का आमू याहा ओलखीत लेधलो होय

⁴ जो कोडु ओ कोत्लू, आय तियाहा ओलखीत लेधलो होय अने तियाआ आज्ञा नाहा मानीत, तो ठोग होय अने तीयाम खोरो नाहा;

⁵ पोन जो कोडु तियाआ वचना पोअं आप चाले तीयाम खरोज परमेश्वरोओ प्रेम सिद्ध उवे होय यावांही आमू ओलखीत्लू का आमाहा तीयाम होय

⁶ जो कोडु आ कोत्लू का आय तीयाम रोतलू, तियाहा जोवे का तुमु बी ऐहलोच साले तेहलूज तो इच्छित ओतु.

आखापो प्रेम कोआ

⁷ ओ प्रिय, आय तुमामे कोडली नवो आज्ञा नाहा लेखत्लू, पोन ती जुनो आज्ञा जी आरंभा पासून तुमामे जोड़ी ओती, ती जुनो आज्ञा ते वचन होय ज्याहा तुमु होमल्यु होय.

⁸ तेबी पोन आय तुमामे नवो आज्ञा लेखोहो, अने ओ त्याज अने तुमामे खोरो ठरतलो काहाके का आंदारो मिटतो जात्लो अने खराआ उजालो ओमे सोमकूहु लाग्यू होय.

⁹ जो कोडु ओ इच्छितो का आय प्रकाश होय तिये आपाआ पायहोपो रोत दुश्मोनी मेकोहो, तो ओमे पर्यंत आंदाराम होय.

¹⁰ जो कोडु आपाआ पाहीपो प्रेम मेकोहो तो उजवोडाम रोतलू अने ठोकर खाही नाहा.

¹¹ पोन जो कोडु आपाआ पाहीपो दुश्मोनी मेकोहो तो आंदाराम होय अने आंदाराम सालत्लु अने उलखित्लू नाहा काहाके आंदारो तियाआ डोआं आंदले कोईत आप्लु होय.

पत्री लेखलोओ कारन

¹² ऐ पोर्या आय तुमामे याकोअता लेखत्लू होय का तियाआ नावामेहे तुमाआ पाप क्षमा ओत जाई.

¹³ ऐ डाया माहु आय तुमामे याकोअता लेखत्लू होय का जो पेलरोत होय तुमु तियाहा ओलखित्लू, ओ जुवान्या, आय तुमामे त्याकाजे लेखत्लू होय का आव तुमु तियाअ वाईटवर जय मिलन्ये होय ऐ पोरयां आय तुमामे याकोअता लेखिलो होय का तुमु बाह्हाहा ओलखे होय.

¹⁴ ऐ डाया माहू आय तुमामे याकोअता लेखिलो होय जे पेलरोत होय तुमु तियाहा ओलखे होय ऐ जुवान्या, आय तुमामे याकोअता लेखिलो होय का तुमु बोनावत्लू ओवो, अने परमेश्वरोओ वचन तुमामे बोणीत रोनारे, अने तुमु तियाअ वाईटवर जय मिलन्ये होय.

संसारो विषय मेहे चेतावनी

¹⁵ तुमु नहाते जुगोपो अने नाहा जगमेहे बिडारापो प्रेम मेके कोडु जुगोपो प्रेम मेकोहो ताहा तीयाम बाह्हाआ प्रेम नाहा होय.

¹⁶ काहाके काजे कोयो किबी जगुमे होय, अर्थात डीलाआ अभिलाषा अने डोआआ अभिलाषा अने जिवनाआ खत, ते बाहाआ त्यापोरोत नाहा परंतु जगोआ होय.

¹⁷ जगोआ अने तियाआ अभिलाषा बेनु नाहा एहली ओत जातेहे पोन जो परमेश्वरोओ इच्चेप चालीलो तो कायम बोणीत रोही.

आखरी टायमोओ धोका

¹⁸ ऐ पोरयां, एज वेल होय; अने जेहलो तुमु होमल्यु होय का ख्रिस्ताआ विरोध कोनारो आविलो होय तियाआ नुसार ओमे पोन जाअखो जोओ ख्रिस्त विरोध कोनारो उठित उभे रोल्या होय; याकोअता आमू ओलखीत्लू का एए आखरी वेल होय.

¹⁹ ते निहित जातेहे ताहा आमाज त्यापोरोत, पोन आमा मेरयो नाहा ओते; काहाके का केधी ते आमू मायते रोल्या ओते ताहा आमा आरी रोल्या ओते पोन निहित याकोअता गोये का ओ प्रकट उवे का आखे आमा मेर्यो नाहा होय.

²⁰ पोने तुमाआ ताहा तिया पवित्र माहु त्यापोरोत अभिषेक ओवयू होय अने तुमु आखे किबी ओलखीत.

²¹ आय तुमामे याकोअता नाहा लेख्योके तुमु सत्याहा नाहा उलखित्लू, पोन याकोअता का तीयाहा ओकाख्तात अने याकोअता का कोडु खोटो, सत्त्याआ त्यापोरोत होय.

²² ठोग कोडू होय? फक्त तो जो येशु ख्रिस्त उविला कोअता नाकारत्लू; अने ख्रिस्त विरोध कोनारो तोज होय, जो बाह्हा अने पोऱ्याआ नकार कोअत्लू.

²³ जो कोडु पोऱ्याआ नकार कोअत्लू त्याजागे बाह्हू पोन नाहा जो पोऱ्याहा मानीत लेहो तियाआ जागे बाह्हू पण होय.

²⁴ जे किबी तुमु आरंभामे रोत होमल्यु होय, तोज तुमामे बोणीत रोही ताहा तुमु पण पुत्रा मेहे अने बाह्हाम बोणीत रोही.

अनंतो जीवनोंओ प्रतिज्ञा

²⁵ अने ज्याआ तिये आमा आरी प्रतिज्ञा कोअयी होय ते अनंत जीवोन होय.

²⁶ आय ऐ गोठी तुमामे तियाआ विषय माय लेखिलो होय जे तुमामे बहकाडीलो,

²⁷ पोन तुमाआ ते अभिषेक जे त्यापोरोत कोयो गोये होय, तुमामे बोणीत रोतलू; अने तुमामे याआ योजना नाहा का कोडु तुमामे हिकाडही नहाते जेहलो ते आशीर्वाद जो त्यापोरोत कोअयु गोल्यो होय तुमामे आखे गोठी हिकाडीलो अने तो खोरो होय ठोग नाहा अने जेहलो तिये तुमामे हिकाडये होय तेहलूज तुमु तीयाम रोत्ले.

परमेश्वरोओ सन्तान

²⁸ आखिर ऐ पोर्या, तीयाम रो का जायो तो प्रकट उवेताहा आमाहा धैर्य होय अने आमू तियाआ आविलो वेले तियाआ आगाडी लाजआली न ओवो.

²⁹ केधी तुमु ओलखीत का तो धोर्मी होय, ताहा ओ पोन ओलखीत का जो कोडु धर्माआ काम कोअत्लू तो त्याजे जन्मला होय.