1 कुरिन्थि 9 - नोयरी नोवलू नियम

प्रेरितोंओ उदाहरन

¹ काय आय स्वतंत्र नाहा? काय आय प्रेषित नाहा? काय आय येशुहु जो आमाआ प्रभु होय नाहा पाल्यु? काय तुमु प्रभु मेहे माहू बोलाव्ल्यु नाहा?

² जर आय दिहराकाजे प्रेषित नाहा तेबी पण तुमा कोअता तेबी होय; काहाके तुमु प्रभूमे माआ प्रेरणेवर छाप होय.

³ जे माहु पारखिलो, त्याकोअता ओच माआ उत्तर होय.

⁴ की आमाहा खालोपिलो अधिकार नाहा?

⁵ की आमाहा ओ अधिकार नाहा, का कोडु ख्रिस्ती बोईहही आरी वेहवाल कोईत तीयीरी जिविलो जेहलो दिहरे प्रेषित अने प्रभूऊ पाही अने कैफा कोअता?

⁶ किंवा फक्त माहु अने बरनबासलाच अधिकार नाहा का कामावलू सोडीत आपलो?

⁷ कोडू कोयो आपाहाज पोस्याआ शिपाया काम कोअत्लू? कोडू द्राक्षवाडी लागाडी फोल खायलो नाहा? कोडू मेंडाओ राखिलोओ कोईत त्याआं दुध पीत नाहा?

⁸ की आय आव गोठी माअहा रितीपो गोगीत होय?

⁹ नाहाकोत नियामशास्त्र ओ कोयु नाहा? काहाके मूसाच्या नियामशास्त्रात लेखिलो होय का, “मोलीलो कोअत्लू तेहलाम बोयलो सोब बांधीही मा” की परमेश्वर बोलदलो जे चिंता कोअत्लू?

¹⁰ किंवा हाजो कोइलो आमा कोअता कोयु होय ओ आपाआ कोअता लेखिलो गोये, काहाके योग्य होय का जुपिलो कोनाराकोता आशेने जुपिलो कोईली अने मोलीलो कोनाराकोता सहभागी उविला आशेने मोलीलो कोईओलो.

¹¹ कोईत जांहा आमाहा तुमा कोअता आत्मिक वस्तु पेईल्या, ताहा नाहाकोत वोडी गोठी होय का तुमु शारीरिक वस्तूची ओन वाडीलोओ.

¹² जाहा दिहराहा तुमापोओ अधिकार होय ताहा नाहाकोत आमाआ यापोरोत जाखो रोही नाहा? पोन आमू ओ अधिकार कामोम लाविलो नाहा; पोन आखे किबी सहन कोअत्लू का आमा त्यापोरत ख्रिस्ताच्या सुवार्ता तोयलो किबी रुकावट आविलो नाहा.

¹³ की तुमामे मालुम नाहा काजे मंदिरोम सेवा कोअता, ते मंदिरामरोत खातले अने जे वेदीई सेवा कोअता ते वेदीपरत गोवाद्या ओये;

¹⁴ यावाही प्रभूऊ पण ठेरव्यो काजे मांहे सुवार्ता होमलित तियाआ उपजीविका सेवेमे रोंहु जोवे.

¹⁵ पोन आय यामोरोत कोड्लीस गोठी कामोम तेत आवयी नाये एने आय आव गोठी यकोअता लेखाल्यो का माकोअता एहलो कोल्यु जालो, काहाके यापोरोत ताहा माहु मोईलो हाजो होय का कोडु माआ गर्वाला व्यर्थ ठेरवीही.

¹⁶ जर आय सुवार्ता होमलीनारू, ताहा माकोते किबी गर्वाची गोठी नाहा; काहाके ओ ताहा माकोअता जरुरी होय जर आय सुवार्ता होम्लाड़नारू नाहा ताहा मापो हाय

¹⁷ काहाके जर आपाआ इच्छावाहि ओ कोअत्लू ताहा माहु मोजरी जोळे अने जर आपाआ इच्छावाहि कोईत नाहा तेबी पण कारभारी माहु होपण्ये जाहो.

¹⁸ ताहा माआ कोडली मोजरी होय? ओ का आय सुवार्ता होमलाडतलु आय ख्रिस्ताची सुवार्ता फुकुट कोईत आपुहू इहिंजा का सुवर्तेमध्ये जो माआ अधिकार होय तियाहा पण आय पुरो कोए देदो कामोम घेऊन आविलो नाहा.

आखाआ सेवा

¹⁹ काहाके आखाप रोत हाजो ओयताहा पण आय स्वतःहा आखाआ पावर बोणाडीत आप्यू होय का जाखो माहुंहु ख्रिस्ताकडे घेऊन आवहू.

²⁰ आय यहुद्यांसाठी यहुदी बोल्यू म्हणजे ख्रिस्ताकडे घेऊन आविलोकोता जे मांहे ख्रिस्ताच्या आर्दामेहे होय त्याकोअता आय नियमशास्त्राआ आधीनता नसताना पण नियमशास्त्राआ आधीन होय का तियाहा जे नियमशास्त्राआ आधीनता मेहे होय ख्रिस्तामध्ये घेऊन आवहू.

²¹ नियमशास्त्राआ गोठिही न मानणाराकाजे आय जे परमेश्वरोओ होमजीलो नाहा पण ख्रिस्ताच्या नियमशास्त्राआ आधीन होय, नियमशास्त्राआ गोठिही न मानाराकोते, नियमशास्त्राआ न कोणाऱ्या कोअता होय म्हणजे नियमशास्त्राआ न माननाराह ख्रिस्ताकडे घेऊन आवहू.

²² आय दुर्बळांसाठी पातलो बोल्यू यकोअता का ख्रिस्ताकडे घेऊन आवहू आय आखे माहुकोता आखे किबी बनलो, म्हणजे कोडला न कोडला प्रकारे कोडु एकाहा तारण मिलवीत आपुहू.

²³ आय ओ आखे सुवार्तेकाजे कोअत्लू का दिहीरा आरी सहभागी ओतगोयु जाऊ.

मसीह दोव्ड

²⁴ की तुमामे मालुम नाहा का गुगदिलो ताहा आखेज गूगदितला पण बक्षीस एकुच घेऊन जात्लू? तुमु तियाअ प्रकारेच गुगदा

²⁵ हर एक ताकतवालो आखे प्रकारोओ संयम कोअत्लू ते ताहा एक नाश उवानारो मुकुटाला मिलविला कोअता कोअत्ले पोन आमाहा ताहा तियाअ मुकुटाकाजे कोअत्लू जो केधी नाश उवे नाहा

²⁶ त्यापोत आय पण तियाआ प्रकारे गुगदीतलो; जे लक्ष्य एक होय, आय पण याज प्रकारे माहूचुलात्ले सुलात्लू पण वारामेह त्यासारखो नाहा

²⁷ पोन आय आपाआ डीला मोतुलो, चेदिलो अने काबुमेहे लेत आवलू, एहलो उवूंहू नाहा का दिहराहा प्रचार कोईत आय खुद कोडला प्रकारचा बेन कामोओ ठराविलो.