1 कुरिन्थि 8 - नोयरी नोवलू नियम

सोडावाआ खाणों

¹ ओमे मूर्ती आगाडी अर्पण वली वास्तु ई विश्वमेहे आमू जाअत्ले होय का आमू आखाआ ज्ञान होय अने ज्ञान घमंड तीयार कोत्लू होय पोन प्रेमोमेहे उन्नति ओवत्ली होय.

² जर कोडाआ लागेहे का माहु कितेबी मालुम होय जर जेहलो मालुम जोवे जेहलो अमेजाआ तियाहा मालुम नाहा.

³ जर कोडु परमेश्वरोओ प्रेम कोअत्लू ताहा परमेश्वर तियाहा ओलखीत्लू.

⁴ कोईत मूर्ती आगाडी बली सोडावली वस्तूआ विषयामे आमाहा मालुम होय का मूर्ती जगुमे किबी वस्तु नाहा अने एकाहा सोडीत दिहरु कोडु परमेश्वर नाहा.

⁵ जर जुगोम अने धोरतीपो केते परमेश्वर कोयु जातला जेहलो जास्तीज ईश्वर अने जास्तीज प्रभू होय

⁶ तेबी आमा कोअता एकुच परमेश्वर होय म्हणजे बाह्हू याहीरोते आखे वस्तु होय, अने आमाहा त्यांकोअता होय अने एकुच प्रभू होय, म्हणजे येशु ख्रिस्त ज्यावाही आखे वस्तु ओवल्यु, अने आमाहा पण त्याज त्यापोरत होय.

⁷ पोन आखाहा ओ ज्ञान नाहा, पण कितेबी ओमेजा मूर्तींना किबी संमजाडलो काजे मूर्ती आगाडी बली सामानोअ कितेबी होमजीत खायलो रोतेहे अने तियाआ बुद्धी कोम होयकोत अशुद्ध ओत जाहो.

⁸ रोटू आपाहा परमेश्वरोओ जागे घेऊन जात नाहा अने जर आमाहा खाले नाहा तेबी किबी नुकसान उवनारा नाहा अने जर खाले ताहा किबी फायदा उवनारा नाहा.

⁹ पोन सावधान एहलो उवूंहू नाहा का तुमा आगाडी ए स्वतंत्रता का निर्बलांसाठी ठोकर काहाके ओतगोयु.

¹⁰ काहाके जर कोडु ताहु मूर्तीच्या मंदिरोम रोटू कोअत्लू तेहलाम पालनारू अने तो निर्बल जण होय, ताहा की तियाआ बुद्धी बुद्धीला मूर्ती आगाडी चढवओल्य वस्तु खाअला हीमत ओत जानारू नाहा?

¹¹ याकोईत ताआ बुध्दीपरत निर्बल पायहोहो तीयाकोता ख्रिस्त मोल्यु, नाश ओतगोयु जानारू.

¹² याकोईत पाहीही विरोधाम अपराध कोलाकोता अने तियाआ निर्बल बुद्धीला पेलरोत ठोकोर खावाडुहु, तुमु ख्रिस्ताच्या विरोधाम अपराध कोअता.

¹³ एहलो प्रकारे जर ओन माआ पायहोहो ठोकर खावाड़े, ताहा आय केधीज कोडनीबि प्रकारोओ माहा खाही नाहा अने एहलो उवूंहू नाहा का आय आपाआ पाहि कोअता ठोकरो कारण काहा बोनो.