1 कुरिन्थि 7 - नोयरी नोवलू नियम

वेहवालोओ सिद्धांत

¹ ती गोठीई विशयामेहे जी तुमा लीखली ओ हाजो होय का माटी बाईही ने सीबे.

² पोन व्याभिचाराच्या बिखीकी हर एक माट्योओ लाडी अने हर एक बोहई माटी रोहूजवे.

³ माटी आपाआ बोहई हक्क पुरो कोईओलो; अने तेहलूज लाड़ी पोन आपाआ पतीचा.

⁴ लाडीई डीलोपो अधिकार नाहा पण तिया पतीचा अधिकार होय तेहलूज डोहाआ पण आपाआ डीलोपो अधिकार नाहा, पण बोहई होय.

⁵ तुमु एका दिहरारी अलग रोहू नाहा पण फक्त किबी टायमोपो रोत परस्पर सम्मति कोअली प्रार्थनासाठी समय मिळवा, अने फासाडी एकठे रो एहलो उवूंहू नाहा का तुमाआ असयंमाच्या कारनोवाही शैतान तुमामे पारखे.

⁶ पोन आय जोओ कोत्लू ते आज्ञा कोईत नाहा ताहा सवलत कोईत कोत्लू.

⁷ माआ ए इच्छा होय जेहलो आय होय तेहलूज आखे मांहु रोहू पोन प्रत्येकाहा परमेश्वारापो रोत अलग-अलग वरदान जोडयेहे होय कोडाआ कोडला प्रकारचा अने कोडाआ दिहरा प्रकारचा.

नि वेहवाल वालाहा सलाह

⁸ पोन आय वेहवाल नाह कोईली अने रोंडाली विषयी कोत्लू का त्याकोअता ऐहलेच रोलो हाजो होय जेहलो आय होय.

⁹ पोन ते स्वतः संयम ओवुहू शकत नाहा ताहा वेहवाल कोईत लेदलेए काहाके वेहवाल कोअला कामातूर रोहोलो हाजो होय.

वेहवाल वालाहा सलाह

¹⁰ ज्याआ वेहवाल उवे होय तियाहा आय नाहा पण प्रभू आज्ञा आपोहो का लाडी लेतजा आपाआ माटिप रोत अलग रोहू नाहा

¹¹ अने जर अलग पण उवेताहा दिहरे वेहवाल न कोअता रोअलो किंवा आपाआ डोहा आरी फासी समेट कोईत लेवा अने माटी पण आपाआ लाडीही सोडीत कायना.

¹² दिहरा मुळे प्रभू नाहा पण आयुज कोत्लू जर पाही लाडी विश्वास कोईत नाहा अने त्याआरी रोंहु खुश होय ताहा तीही सोडीत कायना.

¹³ ज्या बईइ माटी विश्वास कोईत नाहा अने तीआरी रोंहु खुश होय ताहा तीही डोहाहा सोडीत कायना.

¹⁴ काहाके एहेलू जो माटी विश्वास कोईत नाहा तो लाडी सी पवित्र ओलखिणारा; नाहा ताहा तुमाआ पोऱ्ये अशुद्ध रोल्या ओते पण ओमे ताहा पवित्र होय.

¹⁵ पोन जो माहु विश्वास कोईत नाहा जर तो जुदो ओतू ताहा जुदो ओवुहू दया एहलो अवस्थाम कोडु पाही किंवा बोईही बंधनात नाहा परमेश्वराने आपाहा मिलून बालीन रोअलाकाजे हादाडये होय.

¹⁶ काहाके ऐ बुई ताहु नाहाकोत मालुम होय का तू आपाआ डोहाआ तारण कोईत लेही? अने ऐ माटी, ताहु की मालुम का तू आपाआ लाडीई तारण कोईत लेही?

परमेश्वरोओ बुलाहटो होस साला

¹⁷ जेहलो प्रभूऊ प्रत्येकाहा वाटीत आप्लु होय अने परमेश्वाराहा प्रत्येकाहा जेहलो हादाडये होय तेहलूज तिये सालीलो आय आखे मंडली ऐहलेच नियुक्त कोअत्लू.

¹⁸ जो सुंता कोअल्यू गोगाडेंए गोल्यो होय तो सुंता न उवलो बोनहू कायना जो सुंता न उवलो हाद्यु होय तिये सुंता न कोईली.

¹⁹ नाहा सुंता किबी होय अने नाहा सुंता न उवलो पण परमेश्वरोओ आज्ञाहा कोत्लू आखे किबी होय.

²⁰ हर एक जोओ ज्या अवस्थाम गोगाडेंए गोल्यो होय तियाआ मायज रोअलो

²¹ जर तू दासो अवस्थाम हाद्यु गोल्यो होय ताहा चिंता कोहू नाहा; पण जर तू मुक्त ओवुहू शकतो ताहा तेहलूज काम को.

²² काहाके जो नोकोराहा अवस्थाम हादाडल्यु गोल्यो होय ताहा-ताहा तो प्रभूआ मुक्त कोअल्यू होय तेहलूज जो हाजो अवस्थाम हाद्यु गोल्यो होय ताहा तो ख्रिस्ताआ सेवक होय.

²³ तुमु किंमत आपित वेसातो लेद्लो होय तुमु मांहाआ सेवक बोनहू नाहा

²⁴ ऐ पाही, जो कोडु ज्या अवस्थाम हाद्यु गोल्यो होय तिये तियाहा परमेश्वरा बरोबर रोअलो.

वेहवाल समन्धित प्रश्नोंओ उत्तर

²⁵ जुवान पोयरी बद्दल प्रभूऊ कोडलीस आज्ञा माहु जोड़ी नाहा, पण विश्वासयोग्य रोअलाकाजे जीही दया प्रभूऊ मापो कोअयी होय तियाआ प्रकारे सहमती आपोहो.

²⁶ माआ विचारोम ओ हाजो होय आजे परीस्थीतीम खोतालो मांहु जेहलो होय तेहलूज रोअलो.

²⁷ जर तुमु लाडी होय ताहा त्यापोरोत अलग रोईला प्रयत्न कोहू नाहा अने जर ताआ लाडी नाहा, ताहा बोहई होद कोहू नाहा.

²⁸ पोन जर तू वेहवाल कोअनारू पोन ताहा पाप नाहा अने कुवारीने वेहवाल कोल्यु ताहा पाप नाहा पोन एहलाहा शारीरिक दुख उवे अने माहु वासाडीतो होय.

²⁹ ऐ पाहीही, आय एहलो कोत्लू का वेल कोम कोअयु गोल्यो होय त्यापोत जिया लाडी होय ते एहलो रोंहु जोवे का जेहेकाय तियाआ लाडी नाहा,

³⁰ अने रोडनारे एहलो रोडहू जोवे का जणूकाही रडीत नाहा अने आनंद कोनारामे एहेलू आनंद को का जेहलो का आनंद कोईत नाहा अने वेसातो लेनारा एहलो रोंहु जोवे का त्याजागे जणू किबी-किबी नाहा.

³¹ अने जगाआरी एहलो रोंहु जोवे का हाहराआरी रोत जीवनरे नाहा काहाके आव जुगाआ रिती अने व्यवहार बद्लीलो जातेहे.

³² सासोल्यू माआ एह्ली इच्छा होय का तुमामे चिंता ओवुहू कायना, वेहवाल नाह कोईली प्रभूउ गोठीइ चिंतेमध्ये रोतलू का प्रभूहु केहलो खुश मेकीला.

³³ पोन वाजेवाले मांहु, जो जुगाआ गोठीइ चिंतेमध्ये रोतलू का आपाआ लाडीही कोडला प्रकारे खुश मेकीला.

³⁴ वेहवाल कोयु अने वेहवाल न कामकोल्यो पण भेद होय वेहवाल कोयु प्रभूउ चिंतेमध्ये रोत्ले का तो देहिक संसारो चिंता मेहे रोतलेअने आत्माआ बेनुमे पवित्र रोंहु जोवे.

³⁵ आय ए गोठी तुमाआ फायदाकोता फोसिवालाकोता नाहा, पण यकोअता का हाजो लागेहे तेहलूज कोल्यु जाहो का तुमु एक मन लागाडीलो ओतगोयु प्रभूउ सेवा बोणीत रोअलो.

³⁶ जर कोडु ओ होमजुत्लू आय आपाआ तियाअ कुवारी हक्क देत होयतीया जुवान पंजालो रोल्यो होय अने जरुरी पोन होय ताहा जेहलो जोवे तेहलूज कोईओलो यामे पाप नाहा ताहा तीई वेहवाल ओवुहू आपलो.

³⁷ पोन जो मोनुमे स्थिर रोतलू अने तियाहा आवश्यक नाहा पण आपाआ इच्चेप अधिकार मेकोहो अने आपाआ मोनुमे ए गोठी ठेरवीत लेदि होय का तो आपाआ जुवान पोरीही वेहवाल नाह कोईली मेकही, ताहा तो हाजो कोअत्लू.

³⁸ त्याकोता जो आपाआ कुवारी वेहवाल कोईत आपोहो, तो हाजो कोअत्लू अने जो आपाआ जुवान्याहा वेहवाल कोईत आपित नाहा तो फासी जाखो हाजो कोअत्लू.

³⁹ जोपोरोत कोडा बईइ माहु जिवंत रोतलू तोपोरोत ती त्याआरी बांधीत मेकली होय; पोन जर तीई माटी मोल्यु होय ताहा जे तीही गोमे वेहवाल कोहू सेकोहो पण फक्त प्रभूमध्येच.

⁴⁰ पोन जीही होय जर तेहलीज रोहुताहा माआ विचारोम फासी धन्य होय; अने आय होमजीत्लू का परमेश्वरोओ आत्माआ मामेह पण होय.