1 कुरिन्थि 6 - नोयरी नोवलू नियम

खुदो विवादोहों निपटा

¹ के तुमा मेह रोत कोड़ाआ वाद होय का जाहा दिहराआरी सुलाया होय ते फैसलू कोइला कोअता अधर्मी वालाआ ईही जातले अने पवित्र माहाआ जागे ने जाय?

² तुमामे मालुम नाहा का पवित्र मांहे जगाआ न्याय कोअनारू? यकोअता जाहा तुमामे जगाआ न्याय कोअला होय ताहा की तुमु हाणाम हानू सुलातले न्यायनिवाडा कोईत योग्य नाहा?

³ की तुमामे मालुम नाहा का आमू स्वर्गदूतो न्याय कोअनारू? ताहा कि सांसारीक गोठीई न्याय कोअला नाहा?

⁴ जर तुमामे संसारीक गोठीई न्यायनिवाडा कोअला ताहा की तियाच बोहाडीलो जे मंडली किबी होमज्ये जात नाहा?

⁵ आय तुमाहा लाजआली कोइला कोअता ओ कोत्लू की खरोज तुमामे एक पोन बुद्धिमान मिलीअलो नाहा जो आपाआ पाहीइओ न्यायनिवाडा कोहू गोयो?

⁶ तुमामे पाही पाहीपो मुकद्दमा कोअत्लू ते अविश्वासी माअहाआ आगाडी.

⁷ पोन खरोखरेज तुमामे वोडू दोष ओ होय का आपसामेहे फिर्याद कोअता अन्याय काहा सहन कोईत नाहा? आपाआ नुकसान काहा सहन कोईत नाहा?

⁸ पोन तुमु ताहा स्वतः अन्याय कोअता अने नुकसान कोत्ल्यो अने ते पोन पायहोहो.

⁹ नाहाकोत तुमामे मालुम नाहा का जुलूम कोअनारो मांहे परमेश्वरोओ राज्याम वारीस उवे नाहा? फसुस नाहा; जारकर्मी व्यभिचारी, मूर्ती पूजा, बुई सारखू सभोंग आपणारो, माटि हारखो सभोंग लेणारू,

¹⁰ बांड, लोभी, दारकुटी, लुसडूहाये अने वित्त हरिन कोअनारू परमेश्वरोओ राज्याआ वारीस उवे नाहा.

¹¹ अने तुमा मेहेरोत केते जोओ ऐहलेच ओते पोन तुमु प्रभू येशु ख्रिस्ताच्या नावामेहे अने आमू परमेश्वरोओ आत्मावांहि तुण्यो गोयल्यु अने पवित्र ओवल्यु धर्मीक ठरव्येहे.

शरीर अने आत्मा मेहे परमेश्वरोओ महिमा

¹² आखे वस्तु माकोअता योग्य ताहा होय पोन आखे वस्तु फायद्याच्या नाहा; आखे वस्तु माकोअता योग्य ताहा होय पोन आय कोड्लाज गोठीइ अधीन उवे नाहा.

¹³ ओन पेटोकोता अने पेट अन्न कोअता पण परमेश्वर याहा अने तियाहा बेनुहू नाश कोअनारू पण डील व्यभिचारा साठी नाहा पोन प्रभू याकोअता होय अने प्रभू डीलाकोता होय.

¹⁴ परमेश्वराने आपाआ सामर्थ्यावाही प्रभूहु जीवतु कोल्यु अने आमाहा पोन जिवंत कोअनारू.

¹⁵ नाहाकोत तुमामे मालुम नाहा का तुमाआ डील ख्रिस्ताचे अवयव होय ताहा आय ख्रिस्ताच्या अवयवहो घेऊन तियाहा वेश्यांचे अवयव बानडह? मुळीच नाहा.

¹⁶ की तुमामे मालुम नाहा का जो कोडु वेश्यांबरोबर होबती कोअत्लू तीआरी एक डील ओत जात्लू काहाके लेखिलो होय, “ते बेन एक तन उवे”

¹⁷ अने जो प्रभूऊ सहभागीता माय रोतलू तो त्याआरी एक आत्माआ ओतगोयु जात्लू.

¹⁸ व्याभिचारा पासून सेटे रो; जेवडे दिहरे पाप मांहु कोअत्लू ते डीलोओ बारथेए होय पोन व्यभिचार कोअनारू आपाहाज डीलोओ विरोधाम पाप कोअत्लू.

¹⁹ काहाके नाहाकोत तुमामे मालुम नाहा का तुमाआ डील पवित्र आत्माआ मंदिर होय जो तुमामे होय अने तुमामे परमेश्वारापो रोत मिल्यू होय; अने तुमु तुमाआ नाहा?

²⁰ काहाके किमोत आपित वेसातो लेधलो होय त्यापोत आपाआ देह परमेश्वरोओ गौरव को.