1 कुरिन्थि 4 - नोयरी नोवलू नियम

मसीहाआ विश्वासयोग्य भंडारी

¹ माहू आमुह मसीही आ सेवक अने परमेश्वराआ भेदोओ कारभारी सोमजे.

² फासाडी ते कारभारी मध्ये ए गोठी देखल्यी जाहो का तो विश्वासयोग्य जोवे.

³ पोन माआ नजरोम ए जास्तीज हानू गोठी होय का तुमु किंवा माअहा कोडु न्याय कोअनारू माहु पारखुनारू, पण आय स्वतःहा फारखील्यू नाहा.

⁴ काहाके माआ मोन माहु कोडनीबि गोठीमे दोषी ठरावीत नाहा पण यावांही आय निर्दोष ठरव्ये नाहा काहाके हु पारखिनारु प्रभू होय,

⁵ त्याकोता जो पर्यंत प्रभू आवीत नाहा वेलाआ आगाडी कोडलाज गोठीई न्याय उवे नाहा; तेहलाम आंदाराम निकाली गोठी उजवोडाम देखाळीत अने मोनोमेहे पुसिलो उघड कोअनारू, तेहलाम परमेश्वारापोरोत आखाकाजे प्रशंसा कोअयी जाइअलो.

मसीह कोअता मुर्ख

⁶ ऐ पाही, आय आव गोठी तुमा कोअता आपीही अप्पुलोसोओ चर्चा दाखलाआ रुपात कोअयी होय यकोअता का तुमु आमापोरोत ओ शिकजीव का लेखणारा आगाडी जाऊ नाहा अने एकाच पक्षा मेहे अने दिहरा विरोधाम गर्व कोहू नाहा.

⁷ काहाके तांआम अने दिहरा कोडू भेद कोअत्लू? अने तापो की होय जे तू दिहरापोरेत जुळाविते नाहा अने जांहा तू दिहरापोरेत जुळाविते ताहा एहलो गर्व काहा कोअत्लू जेहलो की जुळाविते नाहा?

⁸ तुमु ताहा तृप्त ओतगोयु होय, तुमु श्रीमंत उवे होय, तुमु आमाहा नसताना राज्य कोल्यु पण एहलो हाजो उवे ओते का तुमु राज्य कोईत ओतुताहा आमाहा पण तुमाआरी रोत राज्य कोल्यु ओते.

⁹ माआ ध्यानाम परमेश्वराने आमाहा प्रेषितांहा आखाआ नंतर एहलो माहुकोता ठेरव्यो होय जिया मोईला आज्ञा ओतगोयु गोयी होय; काहाके आमाहा जुगोवोले स्वर्गदूत अने मांहाकोअता तमाशा ठरविल्यो होय.

¹⁰ आमू ख्रिस्तासाठी फोगु होय पण तुमु ख्रीस्तात बुद्धिमान होय; आमाहा अशक्त होय पण तुमु बलवान होय तुमु मानपान मेलविला पण आमाहा अपमान ओतू.

¹¹ आमू आव टायमोपो रोत फुकल्यो अने तोरह्यु अने उगडे होय अने ठोसकात्लू खायलो होये अने बारथे-बारथे फिरत्लो,

¹² अने आपाहाज आताई परिश्रम कोअत्लू मांहे आमाहा वाईट कोते ऐ अने आमाहा तियाहा आशीर्वाद आपोहो ते छळ कोअता आमाहा ते सहन कोअत्लू.

¹³ ते आमाआं निंदा कोअता आमू विनंती कोअत्लू आमाहा ओमेजा जगोआ गाळ अने आखे वस्तूंचे पापडू सारखो उवे होय.

मसीहाआ अनुसरण कोअलोओ पौलुसोओ सलाह

¹⁴ आय तुमामे लाज आवे कोइला कोअता लेखत्लू नाहा पण आपाआ प्रिय पोऱ्यो होमजीत तुमामे बोध कोअत्लू.

¹⁵ काहाके ख्रीस्तात तुमाआ शिकाडणारे दहा हजार पण रोल्या ओते तेबी पण तुमाआ बाह्हू जाखो नाहा यकोअता का ख्रिस्त येशुमेहे सुवार्ताआ त्यापोरत आय तुमाआ बाह्हू होय.

¹⁶ यकोअता आय तुमामे विनंती कोअत्लू का माआ सारखो वागणुक को

¹⁷ तीयाकोता आय तीमुथियुस जो प्रभूमे माआ प्रिय अने विश्वासयोग्य पोऱ्या होय कोईत तुमापोओ मोकोल्या होय तो तुमामे ख्रिस्तात माआ वागणुक ओर कोईत आपी जेहलो हर एक जागापो हर एक मंडलीम हिकवन आपोहो.

¹⁸ किबी ताहा एहलो फुलत्लू गोये होय जणू आय तुमाही आवेहेज नाहा.

¹⁹ पोन प्रभूऊ इच्छा होय ताहा आय वेगुज आविलो अने तियाअ फुग्विलयो गोठीहि नाहा पण तियाआ सामर्थ्याआ होमजीत लेही.

²⁰ काहाके परमेश्वरोओ राज्य गोठीमेहे नाहा पण सामर्थ्याआ माय होय.

²¹ तुमामे की जोवे? के काठी घेऊन तुमापोओ आवहू किंवा प्रेम अने नम्र तियाआ आत्माआ घेऊन आवहू?