1 कुरिन्थि 16 - नोयरी नोवलू नियम

यरूशलेमोओ कलीसिया कोअता दान

¹ ओमे त्या दानाआ विषयामेहे जो पवित्र माहाआ कोअता कोल्यु जातलू होय जेहली आज्ञा आय गलतियाआ मंडली आव्यी ओती तेहलो तुमु बी कोआ.

² हर एक हाप्ताम आपाआ कमाईमे रोत किबी न किबी आपाआ कोओ कोअता पण एखटो कोईत रो याकोअता का जांहा आय आविलो तहलाज मेहे दान एखटो कोअला वेल आविलो नाहा.

³ माआ तियाअ जागापो पुगित कोईत ज्या कोडाआ तुमु कोइलो आय तियाहा माहो पत्र आपित तुमाआ दान यरुशलेम माय घेऊन जाअला मोकलित आपी.

⁴ अने माआ जाअलो योग्य रोल्या तेबी पण ते माआआरी जाय.

यात्राआ कार्यक्रम

⁵ आय जांहा मकिदुनिया त्यापोरोत जानारू तेहलाम तुमाआ जागे पण आविलो काहाके मकिदुनिया त्यापोरोत जायलो आय निच्छित कोल्यु होय.

⁶ एहलो ओवुहू सेकोहो का आय तुमाआ आरी किबी दीही रोहू शकतो किंवा हियालू तुमापोओ रोहू याकोअता का त्याजमेहे माहु जायलो होय तुमु माहु खोबोर आपुहू शकहू.

⁷ आय एहलो कोयु नाहा का तेहरोत जाआत्लू फक्त तुमामे मिलून लेऊ परंतु माहु आशा होय का जेबी प्रभूऊ इच्छा होय ताहा आय तुमाआ जागे किबी दीही रोही पण.

⁸ आय पन्नास व्या तेदीही च्या तीवर पर्यंत इफिस मायज रोहू,

⁹ काहाके योग्य काम कोइला कोअता शक्यता त्याजागे वोडो द्वार उगडे होय अने फासाडी त्याजागे माआ विरोध कोनारो पण जास्तीज होय.

¹⁰ जर तीमुथियुस आवयू ताहा ध्यानाम मेका का तियाहा तुमाआ आरी मेहनत न उवे काहाके माझ्या सारखा तो पण प्रभूऊ काम कोईत होय.

¹¹ त्याकोता कोडोबी तियाहा हानू मानु कायना तियाहा तियाआ प्रवास कोईलो शांतीई खोबोर आपा याकोअता का तियाहा यीवोल पुगाडी देजा आय दिहरा पाहीआरी तियाआ आविलाआ वाट जुविही.

¹² ओमे आमाआ पाही अप्पुलोसचे ओ कोअलो होय का आय तियाहा दिहरा पाहीआरी तुमापोओ जाहु जाखा प्रोत्साहन कोल्यु होय परंतु परमेश्वरोओ ए इच्छा नाहा का तो ओमे तुमापोओ आवे तो संधी साधून तुमापोओ आवे.

आखरी आदेश

¹³ सावधान रो, दृढवाही आपाआ विश्वासामेहे अटल बोणीत रो.

¹⁴ साहसी बन्यो, ताकतवालू बन्यो, तुमु जे किबी कोअहा प्रेमोवाही कोआ.

¹⁵ तुमु स्तिफुनुसच्या कोओहो ओलखीत का ते अखयाचे पेल्लू फोल होय तीयाहा परमेश्वरोओ पवित्र माट्याहां सेवा विशिलो होय तेबी पाहीही तुमामे निवेदन कोअत्लू का.

¹⁶ तुमु पण स्वतः ला एहलो माहुहु अने हर एक तियाअ व्यक्तीई आधीन होपित दयाजे याआ कामोम जोडल्यो होये आने प्रभून याकोअता काम कोईत होय.

¹⁷ स्तेफन, फर्तुनात, अने आखियक च्या हजर आय संतोष होय काहाके माकोअता तुमु जे किबी कोहू सेकेले नाहा ते तिये कोईत देखाडीलाआ.

¹⁸ तिये माआ तेहलूज तुमाआ आत्माहा कोल्यु होय याकोअता एहलो माहुहु सन्मान को.

निष्कर्ष

¹⁹ आशिया भागुम मंडळ्याम रोत तुमाहा प्रभूमे नमस्कार अक्वीला अने प्रिस्काला तियाआ कोअमे एकठे आवनाराआ मंडली त्यापोरोत तुमामे सलाम

²⁰ आखा पायहोहो नमस्कार पवित्र चुंबनाने तुमु एक दिहराआ स्वागत को.

²¹ आय पौलुस तुमामे आपाआ आथोवाही सलाम लेखोहो

²² जर कोडु प्रभू माय प्रेम कोईत नाहा ताहा तियाहा शापभ्रष्ट जोळे, ओ आमाआ प्रभू आव

²³ प्रभू येशुउ अनुग्रह तुमापो ओवतो रोय.

²⁴ येशु ख्रिस्तामध्ये माआ प्रेम तुमा आखा आरी ओवे.