1 कुरिन्थि 15 - नोयरी नोवलू नियम

पौलुसोओ सुसमाचार अने मसीह पुनरुस्थान

¹ ऐ पाही ओमे आय तुमाहा तोज सुसमाचार कोत्लू जो पेल्लू बी आय होमलाडीत देदुहु जीही स्थिर बी होय.

² अने ज्यावाही तुमाआ तारण पण उवनारा होय तिया रोत तू तिया सुसमाचार ज्याआ आय तुमामे आज्ञा कोअयी ओती आपाआ मजबुते तोईत रो नहाते ताआ विश्वास कोअही बेन कामोओ उवे.

³ जी आखाम पोहेली गोठी माहु जोड़ी ओती तियाहा आय तुमा जागेजा पुगाडी देदु का शास्त्रानुसार ख्रिस्त आमा पापो कोअता मोल्यु,

⁴ अने तियाहा गाड्या अने शास्त्र कोत्लू फासी तियाहा जिवंत कोईत उठावलो गोल्यो,

⁵ अने फासी तो कैफा अने बारा समोर प्रकट ओवयो ताहा तियाआ फासाडी तिये दर्शन आप्लु.

⁶ फासी तो पास होव पेक्षा जाखो पायहोहो एकठे देखायू त्यामेरोत खूप जोओ ओमेजा जिवंत होय अने केतेक मरण पण उवे होय.

⁷ तिया फासाडी तो याकोबा आगाडी प्रकट ओवयू अने तेहलाम तिये प्रेषितांहा फासी दर्शन आप्लु.

⁸ अने आखाआ आखरी तिये माहु पण दर्शन आप्लु आयताहा टाईमो पहीले हारकोज जन्मा आपलू सात मोहिनाआ पोऱ्याहरके होय.

⁹ काहाके आयताहा प्रेषितामध्ये आखाम हानू होय अहिजा का आयताहा प्रेषित कोअलो योग्य नाहा होय काहाके आयताहा परमेश्वरोओ मंडली छळ कोईत नाहा.

¹⁰ काहाके परमेश्वरोओ कृपेणे आय तेह्लू बोल्यू होय आज होय मापो तियाआ व्यर्थ कृपा कोअयी गोयी नाहा आयताहा तियाअ आखे पेक्षा आखाप रोत जाखो परिश्रम कोअयु होय पण तो परिश्रम कोअनारू आय नाहा ओतू, पण ती परमेश्वरोओ कृपा ओती जी माआरी रोत ओती.

¹¹ पोन जेबी आय तुमामे आय हिकवन आप्यी ओती, जेबी तिये आमू आखे ओच उपदेश आपित रोतो अने यापोरोत तुमु विश्वास कोअयु.

मोअलाआ पुनरुस्थान

¹² कोईत जाहा ख्रिस्ता प्रचार मोल्यामरोत फासी जिवंत कोअयु गोल्यो ताहा तुमा मेहेरोत किबी जोओ एहलो काहा कोतेहे का मोअला फासाडी फासी जिवंत उठीलो शक्य नाहा?

¹³ अने जर मोईतगोल्यू फासाडी जिवंत उठीलो होय नाहा ताहा फासाडी ख्रिस्तपण मोअला फासाडी जिवंत कोअयु गोल्यो नाहा,

¹⁴ अने जर ख्रिस्ताहा जिवंत कोअयु गोल्यो नाहा ताहा आमाहा प्रचार आपलो व्यर्थ होय अने तुमाआ विश्वास पण व्यर्थ होय.

¹⁵ अने आमाहा पण फासाडी परमेश्वरा विषयी खोटो साक्षीदार ओलखिणारा काहाके आमाहा पण परमेश्वरा आगाडीही शपथ घेऊन ए साक्ष आप्यी होय का तिये ख्रिस्ताहा मोईतगोल्यू मायरोत जिवंत कोल्यु होय पण तियाआ विषय मेहे जर मोल्याम जिवंत उवनारा नाहा ताहा परमेश्वराने ख्रिस्ताहा पण जिवंत कोल्यु नाहा.

¹⁶ काहाके मोल्या जिवंत कोल्यु जात नाहा ताहा ख्रिस्ताहा पण जिवंत कोल्यु नाहा,

¹⁷ अने जर ख्रिस्ताहा जिवंत कोल्यु नाहा ताहा फासाडी तुमाआ विश्वास व्यर्थ होय अने तुमु ओमे पण पापामेहे फोसित रोयाहा.

¹⁸ ताहा फासाडी जिये ख्रिस्तासाठी आपाआ जीव आप्यू ते ऐहलेच नाश उवे.

¹⁹ जर आमाहा आपाआ आव भौतिक जीविलो काजे येशु ख्रिस्तात आपाआ आशा मेकल्यी होय ताहा फासाडी आमाहा आखे मांहुपोरोत लाचार होय.

²⁰ पोन ओमे वास्तविक ओ होय का ख्रिस्ताहा मोल्यामरोत जिवंत कोअयु गोल्यो, तो मोल्या पहीले फोल होय

²¹ काहाके जाहा होमला मनुष्या द्वारे मरण आव्ये ताहा होमला माहूपो रोते मोअनारापो रोत फासी जिवंत उठीलो आव्ये होय.

²² काहाके तेहलूज जेहलो आदमच्या कामामुळे आखाकाजे मरण आव्ये तेहलूज ख्रिस्ताद्वारे आखाहा फासी जिवंत कोल्यु जाइअलो,

²³ पोन प्रत्येकाहा तियाआ स्वतःआ का मापोरोत आखाहा पहीले ख्रिस्ताहा जो फसाहाचा पेल्लु फोल होय अने फासाडी तियाआ आगमनाच्या टायमोमें तियाहा जे ख्रिस्ताआ होय.

²⁴ तिया फासाडी जांहा ख्रिस्त आखे न्याय कोअनारा, अधिपती, आखे एहलाम शक्ती नाश कोईत राजाहा परम बाह्हू परमेश्वरोओ आथोमेहे होफहोपिन आपी जानारू.

²⁵ कोईत जांहा पर्यंत परमेश्वर ख्रिस्ताच्या शत्रूहू तियाआ गुडानिसे कोईत देय नाहा तोपोरोत तियाआ राज्य कोअला आवश्यक होय.

²⁶ आखाआ शेवटच्या शत्रूच्या जो मृत्यु नाश कोल्यु जाइअलो.

²⁷ काहाके “परमेश्वराने प्रत्येकाहा ख्रिस्ताच्या चरणाओ अधीन मेकल्ये होय, पोन जांहा शास्त्र कोत्लू” आखे किबी तियाआ आधीन कोईत आप्लु होय ताहा जीआ आखे किबी तियाआ आधीन गूडाम कोल्यु होय तो स्वतः त्यापोरोत आंगे होय.

²⁸ अने आखे किबी ख्रिस्ताच्या अधीन कोईत आप्लु होय ताहा इहिंजा का स्वतः पोऱ्याहा पण तियाअ परमेश्वरोओ आधीन कोईत आप्लु जीआ आखे किबी ख्रिस्ताच्या आधीन कोल्यु होय म्हणजे आखापो पुरो पणे देवो मेहे राज्य रोंहु जोवे.

²⁹ नाहा ताहा जिये आपाआ जीव आप्यू होय याकोअता जिये बाप्तिस्मे लेदो होय ते की कोअनारू जर मोल्या फासी जिवंत होय नाहा ताहा माहुंहु त्याकोअता बाप्तिस्मे काहा लेत्ले?

³⁰ अने आमू पोन हर एक टायमोमें संकट काहा सहन कोईत रोतलू?

³¹ ओ पाही, तुमा कोअता माआ तो घमंड ज्याहा आय आमाआ प्रभू येशु ख्रिस्तामध्ये स्थित उविला कोअता मेकोहो तियाहा साक्ष कोईत शपथ पुर्वोज कोयु होय का हर एक तेदीही मोओलो.

³² जरी आय इफिसुस माय जंगली जनावरोरी मानवीय खुद्पो धन्यावादीत ओतू त्यावाईही माहु की मिल्ये? जर मोल्या जिवंत कोल्यु जात नाहा ताहा खा, पिवा अने माजे को काहाके उद्या ताहा मोयलो होय.

³³ फिरनारो बंद को, वाईट होबती लेतजा हाजी वागणुक नष्ट ओत जाहो.

³⁴ शुद्धीपो आव, हाजो जीवोन जागे ल्या जेहलो तुमामे उवूंहू जोवे पाप कोअला बंद को काहाके तुमाआ मायरोत कितेबी एहलो होय जे परमेश्वराबद्दल किबी मालुम नाहा आय ओ याकोअता कोयु होय का तुमामे लाज आविलो जोवे.

आपाहा केहलो शरीर जोड़े

³⁵ कोईत कोडुबी फुसिलो शकतो, “मोल्या केहलो जिवंत कोहू सेकतेहे? अने ते फासी केहलो डील कालीत आवत्ले?”

³⁶ तुमु केतो फोगु होय तुमु जे पेर्त्लू ते जोपोरोत मोईत जात नाहा, तो पर्यंत जिवंत उगनारु नाहा.

³⁷ अने जीही जाआ तुमु जे पेर्त्लू तिया प्रश्न होय तो जे साड पासिरीनारू होय तुमु तियाअ बोल्या सोडोहो तोर्तीम पेउतलु नाहा फक्त बी पेअत्लू जेबी तो गवोओ दाणु होय किंवा दिहरु कोडूबी.

³⁸ फासाडी परमेश्वरोओ जेहलो वाटत तेहलो रूप तियाहा आपोहो हर एक बी ला तो तियाआ स्वतः तियाआ डील प्रदान कोअत्लू.

³⁹ आखे जिवंत जोनावारा डील एकहारकाज उवनारा नाहा मांहाआ डील एकहारकाज रोनारे पण जनावरा डील दिहरा प्रकारोओ, सिडाआ डील अलग ओते अने माहाआ अलग.

⁴⁰ कीबी डीले होर्गाआ रोतेहे अने किबी नाश उवानारो रोतेहे अने किबी पार्थिव पण होर्गाआ डीलाआ तेज एक प्रकारोओ रोतेहे अने पार्थिव डीलोओ दिहरे प्रकार.

⁴¹ दिहाआ तेज एक प्रकारचा रोतो अने सांदोओ दिहरा प्रकारचा तारामे पण एक जुदो प्रकार रोतलू.

⁴² पोन मोल्या जिवंत उठनारू तेहलाम पण ऐहलेच उवे ते डील ज्याहा धरतिमेहे पुरीत पेहे गोये होय नाश उवानारो होय पण जे डील ज्याआ पुनरुस्थान उवे होय अविनाशी होय.

⁴³ ती जी पृथ्विपो पुरीत गोयी होय अनादर पुरो होय पण ती तेजोरी फासी जिवंत उवी होय ती गौरवाने जाअखो होय ती जी पृथ्वीम पुरीतगोल्यो गोयी होय दुर्बळ होय पण ती सामर्थजी फासी जिवंत कोअयी गोयी ताकतवालू होय.

⁴⁴ ती का या जी धरतिमेहे पुरीतगोल्यो गोयी होय पण ज्याहा फासी जीवतो कोल्यु गोये ते आत्मिक डील होय जर शारीरिक डील रोत्ले ताहा आत्मिक डीलोओ पण अस्तित्व होय.

⁴⁵ शास्त्र कोयु होय, पेल्लु मांहु (आदम) एक सजीव प्राणी बोन्यू पण आखा फासाडी आदम (ख्रिस्त) जीवोन आपणारो आत्माआ बोन्यू.

⁴⁶ आत्मिक पहीले आवीत नाहा पण स्वाभाविक तिया फासाडी आत्मिक.

⁴⁷ पेल्लू मांहाहा धरतीई कादवो वांही बोनाड्यू गोल्यो अने दिहरु मांहु (ख्रिस्त) होर्गामरोत आवयू.

⁴⁸ जेहलो तियाअ माहांआ रचना तुला वाईही उवी, तेहलूज आखे मांहे कादोमेहे बोन्यो अने तियाअ होर्गाआ माटी होसे दिहरे माहु पण होर्गाआ होय.

⁴⁹ तेबी जेहलो आमाहा तियाअ काद्वो रूप धारण कोयु तेहलूज तियाअ होर्गाआ रुपये धारण कोअनारू.

⁵⁰ ऐ पाही, आय तुमामे कोहू रोयोजे होय का माहा अने रक्त (आमाहा ओ नाश उवानारो डील) परमेश्वरोओ राज्याआ उतराधिकारी मेलवूहु शकत नाहा जे नाश होनारोजे होय ते अविनाशाचे अधिकार जोडयो कोहू शकत नाहा.

⁵¹ देखा, आय तुमामे एक गूढ पुरो खोरो कोत्लू, आमाहा आखे मोअनारू नाहा पण आमाहा आखे बोदलीत जानारू,

⁵² जांहा फासाडी तेहा तुरही वाजिजाऐ तेहलाम क्षणोम एहलो ओत जानारू काहाके तेहा तुरही वाजिजाऐ अने मोल्या अमर ओतगोयु जिवंत उठनारू अने आमाहा जे ओमे जीवतु होय, बोदलीत जानारू

⁵³ काहाके आव नाश उवानारो डीला अविनाशी चाल जोडयो कोअला आवश्यक होय अने मरण शील कायाला अमर चाल जोडयो कोअला आवश्यक होय.

⁵⁴ कोईत जांहा ओ नाश होनारोजे डील अविनाशी चाल सालनुक जोडयो कोईत लेही ताहा शास्त्रलेख ओ पुरो उवे, “विजया मोईलाकाजे गीतीते लेधलो होय”

⁵⁵ “ऐ मरण ताआ, विजय कोठे होय? ऐ मरण, ताआ डंक कोठे होय?”

⁵⁶ पाप मोईला डंक होय अने पाप शक्ती जोळे ती व्यवस्थामुळे,

⁵⁷ पोन परमेश्वरोओ धन्यवाद होय जे प्रभू येशु ख्रिस्ता वाईही आमाहा विजय मिलवीत आपोहो.

⁵⁸ तेबी माआ प्रिय पाहीही, न तुटणारो बोणीत पुरल्यो रो प्रभू कार्या प्रती स्वतःहा हरेक टेमे पुरो होतगोयो कोईत काहाके तुमामे मालुम होय का प्रभूमे कोल्यु गोयल्यु तुमाआ काम व्यर्थ नाहा.