1 कुरिन्थि 14 - नोयरी नोवलू नियम

अन्य-अन्य भाषा अने भविष्यवाणी

¹ प्रेमाआ तुमु अनुकरण कोआ अने आत्मिक वारदानाआ बी घुनोमेहे रोआ विशेष कोईत ऐ भविष्यवाणी कोआ.

² काहाके ज्याहा दिहरा भाषाम गोगीला वरदान जोडयेहे होय ते वास्तव्याम मांहाआरी नाहा, ताहा परमेश्वरा बरोबर गोठी कोईत होय काहाके तियाहा कोडु होमज्यू शकत नाहा तो ताहा आत्मा शक्तीवांही गूढ गोठी कोयु होय.

³ पोन तो ज्याहा परमेश्वारापो रोत भविष्यद्वाणी वरदान जोडयेहे होय तो माहुंहु आत्माम, मजबुते, उत्तेजन, अने शांती गुठ्या गोगीत होय.

⁴ ज्याहा जुदेजुदे भाषांमेहे गोगीलाआ वरदान जोडयेहे होय तो ताहा बोह आपाहाज आत्माहा सुदृढ कोअत्लू पोन ज्याहा परमेश्वारापो रोत भविष्यद्वाणी सामर्थ्य जोडयेहे होय तो आखे मंडली आत्मिक रुपोमे सुदृढ बोनातलू.

⁵ ओमे माआ इच्छा होय का, तुमु आखे दिहरा भाषा गोगे पण यापोरोत जाखो माआ इच्छा होय का तुमु परमेश्वारापो रोत गोगे काहाके मंडली आत्मिक उन्नति कोअता व्याख्या कोआनाराहा सोडवीत दिहरा भाषा गोगीलोकोता परमेश्वारापोरोत भविष्यद्वाणी वोडू होय.

अन्य भाषाआ व्याख्या कोअहू जुवे

⁶ ऐ पाही, जर आय आविलो दिहरा भाषामेहे रोतेहे गोगीत होय ताहा याकोईत तुमाआ की हाजो उवे जो पर्यंत तुमा कोअता आय कोडु गूढ उद्घाटक, दिव्यज्ञान, परमेश्वरोओ संदेष्टा किंवा कोडूबी मास्तर इये गोगनारू नाहा?

⁷ ओ गोग्या ताहा एहलो रोही जेहलो निर्जीव वाद्यांचा आवाज जर कोडनीबि शील परस्पर अंतर होय ताहा कोडु केहलो की होदहू सेकेहे का पावी किंवा सारंगीपो कोडली चाल वाजाळतले रोल्या होय?

⁸ अने जर कान अस्पष्ट आवाज काडनारू ताहा फासाडी लोढाई याकोअता कोडू तीयार उवे?

⁹ याकोईत कोडु दिहरा भाषांमेहे जोपोरोत तुमु साफ-साफ गोगीत नाहा तोपोरोत कोडु केहलो होमज्यू गोयो का तुमु नाहाकोत कोयु होय काहाके एहलामेहे तुमु ताहा बोह हवेस गोगनारे ओत जानारू.

¹⁰ यामे किबी शंका नाहा का जगुमे जुदेजुदे भाषा गोगल्या जातेहे अने तीयाम कोडूबी अर्थ रोत्लू नाहा.

¹¹ तेबी जोपोरोत आय तियाअ भाषाविषयी मालुम कोअनारू नाहा तोपोरोत गोगनाराकोते आय एक बर्बर एहेलू होय तो गोगाड्नारु माकोअता एक बर्बर एहेलू उवे.

¹² तुमापो एज गोठी लागणारच ओते काहाके तुमु आत्मिक वरदानोहो मिलविला कोअता उत्सुक होय कोईत तीयाम जाअखो उविला प्रयत्न को, याकोअता मंडली आत्मिक सुज्ञता जोडयो उवे.

¹³ परिणाम स्वरूपामध्ये जो दिहरा भाषम गोगत्लू तियाहा प्रार्थना कोअला जोवे का तो आत्मावांहि कोयु गोठीई अर्थ पण कोहू सेकेहे.

¹⁴ काहाके जर आय कोडला दिहरा भाषांमेहे गोगीत प्रार्थना कोअनारू ताहा माआ आत्माआ ताहा प्रार्थना कोईत होय पण माआ बुद्धी व्यर्थ रोनारे

¹⁵ ताहा फासाडी की कोअला जोवे आय आपाआ आत्मावांहि ताहा प्रार्थना कोनारू पण आरी बुद्धी वांही भी प्रार्थना कोअनारू, आपाआ आत्मावांहि ताहा स्तुती कोनारू पण आपाआ ओक्कल पण तियाआ स्तुती कोअनारू.

¹⁶ काहाके जर तू फक्त आपाआ आत्मावांहि ताहा आशीर्वाद आपी पण तीइही बोहीतरोल्यु माहहू फक्त एखलुज होय पण ताआ धन्यवाद को आमेन केहलु कोअही काहाके जे तू कोयु होय तियाहा तो होमजाडीत नाहा?

¹⁷ ओमे पाला तू जर हाजो धन्यवाद आपित होय परंतु दिहरा माहांआ ताहा तीयावाही किबी आत्मिक मजबूत उवनारा नाहा.

¹⁸ आय परमेश्वरोओ धन्यवाद आपोहो का आय तुमामेरोत जास्ती भाषा गोगीत शकतो.

¹⁹ पोन मंडलीम कोडनीबि दिहरा भाषाम दहा हजार शब्द गोगीला अपेक्षा आपाआ बुद्धीचा वाप्रिलो कोईत पाच शब्द गोगीला हाजो होमजीत्लू म्हणजे दिहराहा पण शिक्षण आपुहू सेकेहे.

अन्य भाषा अविश्वासी कोअता चिन्ह

²⁰ ऐ पाही, आपाआ विचारोम पोऱ्यो बुद्धी सारखो ओवुहू नाहा पोन वाईट कोई देदू हानू पोऱ्याहरके बोणीत रो पण आपाआ समज मेहे डाया सारखू बिनित रो.

²¹ नियमशास्त्राम लेखिलो होय का, “तिया वाप्रिलो अतांवाही जे दिहरि भाषा गोगत्ले, तियाआ सोबीही वाप्रिलो कोईत ओतलू जे पार्के होय त्याआरी न गोगनारू, पण तेहलाम पण ओ माआ होमलीनारू नाहा” प्रभू ऐहलेच कोयु होय.

²² तेबी दिहरि भाषा गोगीलाआ वरदान विश्वासी मांहो कोअता चिन्ह होय एहलो नाहा ताहा अविश्वासी मांहो कोअता जांहा परमेश्वारापो रोत गोगीला अविश्वासी मांहो कोअता नाहा, ताहा विश्वासी मांहो कोअता होय.

²³ परंतु आखी मंडली एकठे उवे अने हर एक जोओ दिहरि भाषा माय गोगीत होय तेबी पण बारथेए मांहे किंवा अविश्वासी माय आविलो जानारू ताहा की ते तुमाहा गांडे कोअही नाहा?

²⁴ परंतु जर हर एक जोओ परमेश्वारापो रोत भविष्यद्वाणी होय अने तो पर्यंत किबी जोओ अविश्वासी किंवा बारथेए आविलो जानारू ताहा की आखे मांहे तियाहा तियाआ पापापो सावध कोअनारू नाहा? आखे मांहे जे कोयु होय त्यापोओ तियाआ न्याय उवे नाहा?

²⁵ जांहा तियाआ मोनामे निकालो भेद उगाडीत जानारू तेहलाम, “खरोज परमेश्वर तुमामे होय” नमन कोईत परमेश्वरोओ सेवा कोअनारू.

उपासना मेहे अनुशासन

²⁶ ऐ पाही, ताहा फासाडी की कोअला जोवे? तुमु जांहा एकठे ओये ताहा तुमा मेहेरोत कोडु रोटू, कोडु हिकवन अने कोडु आत्मिक रहस्याचे सालू कोअत्लू कोडु कोडनीबि दिहरे भाषांमेहे गोगीत रोतो ताहा कोडु तिया अर्थ कोत्लू, आव आखे गोठी मंडली उन्नति कोता ओवुहु जोवे.

²⁷ जर कोडनीबि दिहरा भाषम गोगीला होय ताहा जाह्खो जाखो बेन किंवा तीन जोआहा गोगीला जोवे पाळी-पाळी, एक-एक कोईत अने जे किबी कोयु गोये एकाने तिया अर्थ कोहू जोवे.

²⁸ जर तिया अर्थ कोअनारो कोडु ने ओयताहा अन्य भाषा गोगनारू मंडली ठावकू रोअलो अने फासाडी तियाहा स्वतः आरी अने परमेश्वरा बरोबर गोगीला जोवे.

²⁹ परमेश्वारापो रोत तियाआ दूताआ रुपात गोगीलाआ ज्याहा वरदान जोडयेहे होय, एहलो बेन किंवा तीन माहुअज गोगीला जोवे अने दिहरावाही जोवे का किबी तिये कोयु होय ते तिये विचार कोईओलो.

³⁰ जर तीही बोहितरोलो कोडनीबि गोठीई निकाडीत सुरवात उवनारा होय ताहा परमेश्वारापो रोत गोगणारा पेल्लूउ ठावकू ओत जाहू जोवे.

³¹ काहाके तुमु एक-एक कोईत परमेश्वारापो रोत भविष्यद्वाणी कोइत सेकतेहे म्हणजे आखे मांहे हिकीही अने उत्तेजित उवे

³² काहाके संदेष्टांचे आत्मा संदेष्टाआ काबुमेहे रोनारे.

³³ काहाके परमेश्वर गड़बड़ी नाहा, शांती आपोहो, जेहलो पवित्र भक्तांच्या मिटीग, मंडली ओये.

³⁴ बोईही जोवे का ते मंडली मिटीग माय ठावकु रोअलो काहाके तियाहा गोगीला परवानगी नाहा, पण जेहलो का नियम शस्त्रामेहे पण कोयु होय तिये आपाआ मर्यादेत रोंहु जोवे.

³⁵ जर तियाहा किबी मालुम कोईलो होय ताहा तिये कोअमेहे आप आपाआ डोहाहा फुसुहू जोवे काहाके बोहीकाजे ओ होबा आपित नाहा का ती मंडली मिटींगोमे गोगनारू.

³⁶ की परमेश्वरोओ वचन तुमाआ त्यापोरोत निर्माण उवे? किंवा ते पोन तुमा जागेजा पुग्या? खरोज नाहा?

³⁷ जर कोडु विचार कोअत्लू का तो भविष्यवक्ता होय म्हणजे तियाअ आत्मिक वरदान जोडयेहे होय तियाहा ओलखीत लेई जोवे का आय तुमामे जे किबी लेखत्लू होय ते प्रभूऊ आज्ञा होय.

³⁸ जर कोडु याहा उलखित्लू नाहा ताहा तियाहा पण ओलखिलो जानारू नाहा.

³⁹ याकोअता ऐ माआ पाहीही, परमेश्वारापो रोत भविष्यद्वाणी तत्पर रो अने दिहरा भाषांमेहे बुलुहु मना मा कोअही,

⁴⁰ पोन आखे गोठी योग्य प्रकारे अने व्यवस्था नुसार कोअयी गोयी जोवे.