1 कुरिन्थि 12 - नोयरी नोवलू नियम

पवित्र आत्माआ वरदान

¹ ऐ पाही माआ इच्छा नाहा का तुमु आत्मिक वारदानाआ विषयामेहे ओंनजानल्या रोवा.

² तुमामे मालुम होय का जांहा तुमु अन्यजाति ओते तेहलाम मुक्यो मूर्तीच्या फासाडी जात ओते, जेहलो तुमामे चालविलो जात ओते तेहलूज तुमु चालते ओते.

³ त्यापोत आय तुमामे चेतावणी आपोहो का जो कोडु परमेश्वरोओ आत्माआ मार्गदर्शनाने गोगत्लू, तो एहलो कोयु नाहा का येशु शापित होय, अने कोडु पवित्र आत्माआ बिगुर कोहू सेकेहे नाहा का येशु ओच प्रभू होय.

⁴ प्रत्येकाहा आत्माआ अलग-अलग वरदान जोडयेहे होय पण ओ आखे वरदान आपणारो आत्माआ ओ एकुच होय,

⁵ सेवांहा प्रकार जुदेजुदे प्रकारे ठेरवीही गोये होय पण आमाहा ज्याआ सेवा कोअत्लू तो प्रभू ताहा एकुच होय,

⁶ काम ताहा जास्तीज कोयु गोये होय पण आखे माय आखे काम कोअनारू तो परमेश्वर एकुच होय.

⁷ आखा मेहे आत्माआ कोडला न कोडला प्रकाराने प्रकट ओतू जे प्रत्येकाआ हाजाकोता ओते.

⁸ कोडाआ आत्माआ त्यापोरत परमेश्वरोओ ज्ञानाने जाअखो ओतगोयु गोगीला हाजू आप्यी गोयी होय ताहा कोडाआ तियाआ अत्म्याच्याद्वारे विद्येचे वचन जोळे.

⁹ अने कोडाआ तियाआ आत्माद्वारे विश्वासाआ वरदान आप्लु गोये होय ताहा कोडाआ हाजो कोअला क्षमता आप्यी गोयी होय तियाआ आत्माद्वारे.

¹⁰ अने कोडु दिहरा माअहुहू आश्चर्यपुरो शक्ती आप्या गोयी होय ताहा कोडाआ दिहीराहा परमेश्वारा कडून गोगीला शक्ती आप्यी गोयी होय अने कोडाआ हाजो वाईट हारखील्यु शक्ती आप्यी होय, कोडाआ जुदेजुदे भाषा गोगीला शक्ती आप्यी होय ताहा कोडाआ भाषामेहे अर्थ कोत व्याख्या काडीलाओ शक्ती आप्यी होय.

¹¹ पोन ओतो एकुच आत्माआ होय जो ज्याहा-ज्याहा योग्य होमजीत्लू, आपित ओतलू आव आखे गोठीही पुरो कोअत्लू.

डील एक अंग इस्ताज

¹² जेहलो आमामेरोत आखाआ डील ताहा एक होय पण तीयाम अलग होय अने जर अवयव अनेक ओयताहा पण त्यामेरोत डील एकुच बोनावली, तेहलूज ख्रिस्त होय.

¹³ काहाके जेबी आमाहा यहुदी रोल्या होय जेबी यूनानी सेवक रोल्या होय किंवा हाजो एकुच डीलोओ अलग-अलग अवयव बोनाडीला कोअता आपु आखाआ एकाच आत्माद्वारे बाप्तिस्मे आप्लु गोल्यो होय अने तीह आमू आखाहा एकुच आत्माआ आप्यू गोल्यो होय.

¹⁴ ओमे पाला, माहुऊ डील कोडनीबि एकुच अवयवांनी बोणावले कायना ओतो पण तीयाम जास्तीज अवयव रोतेहे.

¹⁵ जेबी गुडू कोअही आय आथे नाहा तेबी त्यापोत माआ शरीरोरी कीबी संबध नाहा ताहा नाहाकोत तो डीलाआ अवयव रोही नाहा?

¹⁶ याच प्रकारे जेबी कान कोअही आय डोउ नाहा त्यापोत आय डीलाआ नाहा ताहा की यामुळे तो डीलाआ नाहा?

¹⁷ जर एक डोआं आखे डील रोल्या ओते ताहा कोरात होमल्यु ओते? जर कान ओच आखे डील रोल्या ओते ताहा कोरात श्वास लेदो ओतलू?

¹⁸ कोईत वास्तव्याम परमेश्वरोओ जेहलो योग्य होमज्ये तेहलूज हर एक अवयवहो डीलोम तेहलीज जागू आप्यी.

¹⁹ जर आगोमेऱ्यो आखे अवयव एकहारकाज उवे ओते ताहा डील कोठे रोल्या ओते?

²⁰ पोन परिस्थिती एहली होय का अवयव अलग-अलग रोतेहे पण डील एकुच ओते.

²¹ डोउ आथ ओ कोहू शकत नाहा का माहु डोंआ गोरोज नाहा, किंवा ऐहलेच मुंडको गुडाहा ओ कोहू शकत नाहा का माहु तुमाआ गोरोज नाहा.

²² याआ वेगडो डीलोओ ज्या अवयवओ आपु दुर्बळ होमजीत्लू ते जास्तीज गरजेए रोतेहे,

²³ अने डीलोओ ज्या अवयवांना आपु कोम मानपानाचे होमजीत्लू तिया जागे आपु जाखो लक्ष्य आपोहो अने आपाआ गुप्त अवयव जाखो शालीनता मिलवीत लेत्ले,

²⁴ कोईत आमा प्रर्दशनीय अवयवांना आव एहलाम उपचाराची गोरोज रोत नाहा, पण परमेश्वराने आमा डीलाआ रचना याकोईत कोअयी होय ज्यावाही तियाअ अवयवांना जे कोम हाजी होय ते जाखो मानपान मेलविलो.

²⁵ म्हणजे आगोमेऱ्यो का काहीही कोम हुदवळीत नाहा पण डीलोओ अवयव परस्पर एकमेकाआ एकहरको रुपोमे लक्ष्य मेकुहू जोवे.

²⁶ जर डीलोओ होमला अवयवहो दु:ख ओते ताहा त्याआरी डीलोओ दिहरे अवयव पण दु:खी ओये जर कोडनीबि होमला अवयव गौरव अवत्लू ताहा तियाआ खुशीमे आखे अवयव आनंद कोअता.

²⁷ याकोईत तुमु आखे मांहे ख्रिस्ताचे डील होय अने जुदेजुदे रुपोमे तियाआ अवयव होय,

²⁸ एवडोज नाहा ताहा परमेश्वराने मंडलीम पहीले प्रेषिताना, दिहरे भविष्यवक्ता, तिसरे मास्तर, फासाडी आश्चर्य काम कोआनाराहा फासाडी हाजो कोआनाराहा अने आभार माननारा फासाडी व्यवस्था कोअनाराहा अने जुदेजुदे भाषा गोगनारू.

²⁹ की आखे प्रेषित होय? की आखे भविष्यवक्ता होय? की आखे मास्तर होय? की आखे सामर्थ्याचे काम कोअनारे होय?

³⁰ की आखाहा हाजो कोअनारे वरदान जोडयेहे होय? की आखे प्रकाराआ भाषा गोगत्ले?

³¹ की आखे भाषांतर कोअता? तुमु वोडावीत वोडो वरदानोओ इच्छेमध्ये रो पण आय तुमामे फासी पण आखे पेक्षा हाजू मार्ग कोत्लू.