1 कुरिन्थि 11 - नोयरी नोवलू नियम

मुनको टापलो समन्धित निर्देश

¹ तुमु माआ चाल जेहे आय मसीहाआ चाल चालो हो.

² ऐ पाही, आय तुमाआ वाहवा कोअत्लू का आखे गोठीमेहे तुमु माहु ओर कोअता; अने जी परंपरा आय तुमामे आप्यी होय त्याआं पालीत कोअता.

³ पोन माआ इच्छा होय का तुमु ओ जाईत ल्या का हर एक अदमी मुंडको ख्रिस्त होय, अने बुई तियाआ मुंडको माटीई होय अने ख्रिस्ताचे मुंडको परमेश्वर होय.

⁴ जो माहु मुंडको टापीत प्रार्थना किंवा भविष्यवाणी कोअत्लू तो आपाआ मुंडकाआ अपमान कोअत्लू.

⁵ पोन जी बुई उगडो मुड़ोवाही प्रार्थना किंवा भविष्यवाणी कोअते, ती आपाआ मुंडकाआ अपमान कोअत्लूके ती टालगी कोईली होनारो तेहेजे होय.

⁶ जर बुई ओढणी फागेरोओ नाहा ताहा सिंज्ये पण वाडीत लेई जोवे जर बुई याकोअता सिंज्ये वाडाआ किंवा टालगी कोईली कोअला लाज गोठी होय ताहा ओढणी फांग्रित लेय.

⁷ हां, माहु आपाआ मुंडको तापनारो योग्य नाहा काहाके तो परमेश्वरोओ स्वरूप अने गौरव होय; पण बुई अदमी गौरव होय.

⁸ काहाके माहु बोअया ओवयू नाहा ताहा बुई माटिप रोत ओवयी,

⁹ अने माहु बोइकोता बोन्यू नाहा ताहा बुई मांहांकोअता बोनाडी गोयी होय.

¹⁰ त्यापोत स्वर्गदूतामुळे बोंई योग्य होय का अधिकार आपाआ मुंडकापो मेकीलू.

¹¹ तेबी पण प्रभू माय न बुई डोहारी अने माहु तीवाही होय

¹² काहाके जीही बुई माटी सी होय, तेह्लुज माटी बी बुईपो रोत होय पण आखे वस्तु परमेश्वारापो रोत होय.

¹³ तुमु खुद विचार को, की बोंई उगडे मुंडको मेकीत परमेश्वरोओ प्रार्थना कोअला होपतलो?

¹⁴ की सोभाहारकोजे तुमामे मालुम होय का जर माहु सेटू सिंज्ये मेकही ताहा त्यांकोअता अपमानाची गोठी होय.

¹⁵ पोन जर बुई सेटू सिंज्ये मेकही ताहा तीयीकाजे होबा होय काहाके तीही सिंज्ये ओढ़नीकाजे आप्लु होय.

¹⁶ पोन कोडाआ चर्चा कोइलाआ होय ताहा ओ जाईत लेअलो का आमाआं अने परमेश्वरोओ मंडळीची पण एहली रिती नाहा.

प्रभु भोजो विषय मेहे

¹⁷ पोन ए आज्ञा आपित ओतलू आय तुमाआ वाहवा कोईत नाहा, यावाही का तुमाआ एकठे उवे हाजो नाहा पण नुकसान ओते.

¹⁸ काहाके पहीले ताहा ओ मानत्लू का जांहा तुमु मंडलीम एकठे ओये तेहलाम तूमामेहे फुट ओते अने आय योपो किबी-किबी विश्वास पण कोअत्लू.

¹⁹ काहाके भेधभाव पण आवश्यक होय तीयाकोता काजे मांहे तुमामे खोरो होय ते प्रगट ओतगोयु जानारू.

²⁰ आखरी तुमु जे होमला जागापो एकठे ओये ताहा ओ प्रभू रोटूखालो खाअलाकोता नाहा,

²¹ काहाके खाअलोओ टायमोमें एक दिहरा पहीले आपाआ रोटूखालो खात जातेहे यावाही कोडूबी बुख्यो रोतलू अने कोडु होरोपिनारो ओतगोयु जात्लू.

²² की खाहुं अने पीईलो आपाआ को नाहा? किंवा परमेश्वरोओ मंडली तुच्छ मानतेहे अने ज्यापो नाहा तियाहा लाजआली कोअता? आय तुमामे की कोहू? की आव गोठीमेहे तुमाआ प्रशंसा कोहू? नाहा, आय प्रशंसा कोईत नाहा.

²³ काहाके ए गोठी माहु प्रभूकडून जोड़ी होय अने आय तुमा जागेजा पोताडीन आप्यी का प्रभू येशुहू ज्या राती तोईत आप्यू गोल्यो, रोटा लेदि,

²⁴ अने धन्यवाद आपित ती तोडीअते अने कोयु, “ओ माआ डील होय, जे तुमा कोअता होय, माआ ओर कोइला कोता ओ कोईत रो”

²⁵ तिया फासाडी तिये रोटाफासाडी पिदो पोन लेदो अने कोयु, “ओ पिदो माआ रक्ताम नवो करार होय, जांहा-जांहा ओ पीही, तेहलाम माआ ओर कोइला कोता ओ कोईत रो”

²⁶ काहाके जाहा तुमु ए भाकर खातले अने ओ पिदो पियलू तेहलाम प्रभूउ मोईलाकाजे जांहा पर्यंत तो आवीत नाहा तोपोरोत प्रचार कोईत रोतेहे.

²⁷ त्यापोत जो कोडु कायनयहाजो रीतीवाही प्रभूऊ भाकर खाही किंवा तियाअ पिदो मायरोत पीही तो प्रभूऊ डीले अने रक्ताबद्दल अपराधी ठराविलो.

²⁸ त्यापोत मांहुहू स्वतःहा पारखिल्यु लेई जोवे अने आव प्रकारे आव रोटामेहेरोते खालोताहा आव पिदो मायरोत पिवा.

²⁹ काहाके जो खाअलो पिअलो टायमे प्रभूउ डीला उलखित्लू नाहा तो खायलो अने पीत ओतलू मापो जे दंड लेत आवलू.

³⁰ त्यापोत तुमामे खूप जोओ दुर्बल अने मांदवाड्यू होय अने खूप जोओ निंदेम पण गोये

³¹ जर आमाहा स्वतःहा पाखुलो ओते ताहा दंड जोड़ी नाहा ओते.

³² पोन प्रभू आमाहा दंड आपित आमाआं शिक्षाम कोअत्लू यावाही का आमाहा जगाआरी दोषी ठरू कायना.

³³ त्याकोता ऐ माआ पाही, जांहा तुमु खाअलाकोता एकठे ओये ताहा एक दिहरा कोअता वात पाला.

³⁴ जर कोडु फुक लागीही होय ताहा आपाआ कोआत खावा याकोअता तुमाआ एकठे उवे दंड काहाके उवे नाहा बाकी गोठी आय आविलो कोअनारू.