1 कुरिन्थि 10 - नोयरी नोवलू नियम

इस्राएलोओ इतिहास सी चेतावनी

¹ ऐ पाही माआ इच्छा नाहा का तुमु ई गोठीमेहे ओंजान्या बोना की आमाआ आखे डाये-डाये वादलाआ निचे ओते अने आखे समुद्राआ विच मेहेरोत पार ओत गोए

² अने आखाहा वादलामे अने समुद्राम, मोशेच्या बाप्तिस्मे लेदो;

³ अने आखे एकुच आत्मिक रोटू खाद्लू;

⁴ अने आखाहा एकुच आत्मिक पाई पिदो; काहाके ते तियाअ आत्मिक दोगाडा मेहेरोत पीत ओते जे तियाआ आरी चालते ओते, अने तो डोणो येशु मसीही ओतु

⁵ पोन परमेश्वर त्यामेरोत खूप जनांनी खुश ओवयू नाहा; त्यापोत ते जंगलूम ढेर ओतगोयु.

⁶ आव गोठी आमा कोअता उदाहरण ठरल्या होय का जेहलो तिये लोभ कोअयु तेहलूज आपु वाईट वस्तूऊ लोभ कोहू कायना,

⁷ अने तुमु मूर्ती पूजा कोअनारे ओवुहू नाहेते केते जण बोन्यो ओते जेहलो लेखिलो होय, “मांहे खाहुं पीईलो बोह्ये अने खेलत्लू उठे होय.”

⁸ अने आमू व्यभिचार कोईओलो जेहलो तीयाम केताहा कोल्यु अने होमला दिहोम तेवीस हजार मोईत गोये.

⁹ अने आमू प्रभूऊ परीक्षा काआडीलू जेहलो तीयामरोत केताहा कोल्यु अने हापाहा त्यापोरत नाश कोल्यु गोये.

¹⁰ अने तुमु बडबड कोहू नाहा त्याप्रकारो त्यामेरोत केताहा बडबड कोअयी अने नाश कोअनाराआ त्यापोरत नाश कोल्यु गोये.

¹¹ पोन आव आखे गोठी ज्या तियापो आव्या उदाहरण हारको कोयु; अने ते आमा चेतांवणीसाठी जुगाआ शेवटच्या टाईमोम आविलो रोतलू ओ आपाआ बोधासाठी लेखिलो गोये होय.

¹² त्यापोत ज्याहा लागेहे, “आय स्थिर होय” तिये सावध रोअलो का नाहीत जाऊ कायना.

¹³ तुमु कोडला एहलो परीक्षा माय पोडये नाहा जे मांहाहा सहन कोइलाआ तिवोल होय परमेश्वर खोरो विश्वासी होय अने तो तुमामे शक्तीचे बारथे परिक्षामेहे पोडहू आपी नाहा पण परीक्षा आरी उपाय पण कोअनारू का तुमु सहन कोहू सेकेहे.

मूर्ति पूजा वर्जित

¹⁴ यामुळे ऐ माआ प्रीयांनो मूर्ती उपासना सी सेटे रो.

¹⁵ आय बुद्धिमान होमजीत तुमामे कोत्लू; जे आय कोयु होय तियाहा तुमु पारखत्लू.

¹⁶ तो आजोहीके पिदो ज्याहा आमाहा धन्यवाद आपोहो की ख्रिस्ताआ रक्ताआ गोवाद्या नाहा? ती भाकर जीही आमाहा मुडीदेदलो की ती ख्रिस्ताच्या डीलोओ सहभागीता नाहा?

¹⁷ त्यापोत एकुच डील सेटू होय ताहा आमाहा पण जे जाखो जण होय एकुच डील होय; काहाके आमाहा आखे तिया एकुच रोटामेहे सहभागी ओतू

¹⁸ जे डीलोओ पायाहोवांही इस्राएली होय तियाहा पाला की अर्पण खानाराहा वेदीचे सहभागी नाहा?

¹⁹ फासाडी ती की कोयु होय की ओ का मुर्तीही चळविल्यो अर्पण किबी होय याआ मूर्ती की होय?

²⁰ नाहा, पोन ऐका अन्यजाति अर्पण कोईत रोतेहे ते परमेश्वरा कोअता नाहा पण दुष्टात्मा साठी अर्पण कोअता अने माआ इच्छा नाहा का तुमु दुष्टात्मा सहभागी उवे.

²¹ तुमु प्रभूआ पिदो दुष्टात्मा पिदो बेनोमरोत पीईअलो शकत नाहा, तुमु प्रभूउ मेजाचे अने दुष्टात्मा मेजाचे बेनुअजा सहभागी ओवुहू शकत नाहा.

²² की आमाहा प्रभूहु क्रोधीत कोअत्लू? की आमाहा त्यापोरोते शक्तिवान होय?

मसीह स्वतंत्रता

²³ आखे वस्तु माकोअता योग्य ताहा होय पण आखे पायदा नाहा; आखे वस्तु माकोअता योग्य ताहा होय पण आखे वस्तु लेतजा विकास उवनारा नाहा

²⁴ कोडु आपाज हाजो ओनारो पाल्हू कायना ताहा दिहराआ हाजो ओनारो हाजा

²⁵ जे किबी खाटिक बाजारामे वेचीअलो जाहो ते न शंका कोईत खा अने बुद्धी करणावाही किबी फुसिलो नाहा

²⁶ काहाके धरती अने तियाआ भरपूर होये प्रभूऊ होय

²⁷ जर अविश्वासी महुमेहे तुमामे कोडु तुमामे आमंत्रण आपी अने तुमाआ जालो इच्छा होय ताहा जे किबी तुमा आगाडी मेक्ल्ये जाइअलो ते खा; अने बुद्धी मुळे किबी फुसिलो नाहा

²⁸ पोन जर कोडु तुमामे कोअही, “ओ ताहा मुर्तीही बली वस्तू होय”, तेहलाम तिया कोनाराकोअता अने बुद्धी कारनोवाही खाऊ नाहा

²⁹ माआ कोअलाआ अर्थ एहेलू नाहा का ताआ बुद्धी, पोन तिया बदिहराआ हाजो, माआ स्वतंत्रता दिहरा विचाराआ काहा पारखिलो जाहू जोवे?

³⁰ जर आय धन्यवाद आपित रोटामेह सहभागी ओतू ताहा ज्याहा आय धन्यवाद आपोहो तियाआ मुळे माआ बदनामी काहा ओते?

³¹ त्याकोता जर तुमु खाही, जर पीही, जे किबी कोअनारू आखे किबी परमेश्वरोओ गौरव कोअता को

³² तुम्ही यहुद्यांसाठी नाहा, यूनानी याकोअता नाहा अने परमेश्वरोओ मंडलीकोता पण पेलरोत पोताडीलो काहाके बोनहू नाहा

³³ जेहलो आय आखाहा आखे गोठीमे खुश मेकोहो अने आपाआ नाहा पण दिहराहा फायदाकोता होदत्ले का त्याआं तारण उवे.