Яхья 7 - Инжил

Иса кос курув байрамына барады

¹ Оннан сонъ Иса Галилеяда окытып айланды, Юдеяда кезбеге суьймеди, неге десе ювыт басшылары Оны оьлтиреек болатаган эдилер.

² Ювыт кос курув байрамы ювыклаганда,

³ кардашлары Исага айттылар: «Муннан кет, Сен этетаган ислерди сокталарынъ коьргендей этип, Юдеяга бар.

⁴ Белгили болмага шалысканлардынъ эш биреви де ясыртыннан ислемейди. Эгер Сен бу ислерди эте болсанъ, Оьзинъди дуныяга коьрсет».

⁵ Кардашлары да Ога ынанмай эдилер.

⁶ Иса яваплап: «Меним заманым энди де етпеген, сизге аьр вакыт та келисли.

⁷ Сизди дуныя коьрип болалмаяк тувыл, а Мени коьрип болмайды, неге десе Мен дуныя ислери яман экенине шаат боламан.

⁸ Байрамга сиз барынъыз. Мен бу йол бармайман, неге десе заманым энди де толмаган», – деди.

⁹ Муны айтканнан сонъ, Иса Галилеяда калды.

¹⁰ Ама кардашлары кеткенде, Ол байрамга, тек ашык болмай, эш бирев де билместей этип, барды.

¹¹ Ювытлар Оны байрамда излестирип: «Ол кайда экен?» – деп сорастыра эдилер.

¹² Халк арасында Исадынъ уьстиннен коьп соьзлер сыбырданып юре эдилер. Бир кесеклери – «Ол яхшы аьдем», баскалары, «Йок, Ол халкты алдайды» деп, айта эдилер.

¹³ Аман да ювыт басшыларыннан коркканыннан эш бирев Онынъ уьстиннен ашык этип айтпай эди.

¹⁴ Иса Алла уьйининъ каралдысына кирип, окытып баслаганда, байрамнынъ энди яртысы озган эди.

¹⁵ Ювыт басшылары сейирсиндилер, сорастырдылар: «Бу аьдем окымаганлай, Кие Язувларды калай биледи экен?»

¹⁶ Иса явап берди: «Меним окувым Меннен тувыл, а Сол Мени йибергеннен.

¹⁷ Ким Онынъ ыхтыярын толтыраяк болса, сол Меним окувым Алладан ма яде Мен оьз эрким мен айтатаганымды билер.

¹⁸ Ким оьз эрки мен айтады, сол оьзи оьзине данъкты излейди; ким Оны йибергенге данъкты излейтаган болса, сол акыйкатты айтады эм Онда эш бир оьтирик те йок.

¹⁹ Аьше, сизге Муса Тауратты бермегенме? Ама сизинъ эш биревинъиз Таураттынъ айтканларын этпейсиз. Сиз Мени неге оьлтиреек боласыз?»

²⁰ Халк: «Ваа, Сени йин бийлеген экен! Сени ким оьлтиреек болады?» – деп яваплады.

²¹ Иса явапка: «Мен бир аьжейип ис эттим, сиз баьринъиз сейирсинесиз.

²² Муса сизге суьннетлев аьдетин калдырган. Уьшинимен бу аьдет, Мусадан тувыл, ата-бабаларынъыздан. Сонынъ уьшин сиз аьдемлерди шабат куьн суьннетлейсиз.

²³ Эгер Мусага буйырылган Таурат бузылмас уьшин балады шабат куьн суьннетлесенъиз, сиз Мага, Мен шабат куьн бир аьдемнинъ буьтин суьегин эмлегеним уьшин, неге ашувланасыз?

²⁴ Тысыннан карап этпей, аьдиллик пен шуьшленъиз», – деди.

Иса акында туьрли ойлар

²⁵ Сол заманда Ерусалимнинъ бирер яшавшылары: «Бу – Сол, олар оьлтиреек болатаган, тувылма экен? – деп, сорастырып басладылар. –

²⁶ Мине Ол халк алдында ашык соьйлейди, а Ога бир зат та айтпайдылар. Белким, аькимлер уьшини мен де, Ол – Масих деп, кабыл эткен боларма?

²⁷ Ама биз Онынъ кайдан келгенин билемиз, а Масих келсе, Онынъ кайдан келгенин эш бирев де билмеек».

²⁸ Сонда Алла уьйининъ каралдысында окытып турган Иса кышкырып айтты: «Мени таныйсыз, Меним кайдан экенимди де билесиз! Мен булайга оьз эрким мен келмегенмен. Мени Йиберген акыйкат, тек сиз Оны танымайсыз.

²⁹ Мен Оны таныйман, неге десе Оннан келгенмен, Ол Мени йиберген!»

³⁰ Исады ыслаяк болдылар, ама эш бирев Ога колын коьтермеди, неге десе вакыты энди де етпеген эди.

³¹ Халктан коьплер Ога ынандылар: «Эгер дейим Масих келсе, Сосыннан коьп аьлемет нышанлар коьрсетерме экен?» – дедилер.

³² Парисейлер халктынъ Иса акында булай сыбырдасканларын эситтилер эм Алла уьйининъ саклавшыларын, Оны ыслатаяк болып, йибердилер.

³³ Иса: «Мага сиз бен турмага энди коьп калмаган, тезден Мени йибергенге кайтаякпан.

³⁴ Мени излеексиз, ама табалмаяксыз эм Мен болаяк ерге келалмаяксыз», – деди.

³⁵ Ювыт басшылары бир бирлериннен: «Ол, биз барып болмаяктай, кайсы ерге аьзирленеди экен? Белким, Ол греклер арасында шашырап яшайтаган халкымызга, греклерди окытарман деп, бармага суьетаган болса ша?

³⁶ „Мени излеексиз, ама табалмаяксыз“, „Мен болаяк ерге келалмаяксыз“ деген соьздинъ маьнеси не экен?» – деп сорастырдылар.

³⁷ Байрамнынъ сонъгы эм энъ маьнели куьнинде Иса турды да кышкырып айтты: «Ким сувсаган, сол Мага сув ишпеге келсин.

³⁸ Ким Мага ынанады, Кие Язувда айтылгандай, сонынъ ишиннен яшав беруьвши сув тасып шыгаяк».

³⁹ Иса муны айтканда, Ога ынанганлардынъ сонъында алаяк Алла Рухы акында ойлай эди. Рух энди де ишлеринде болмаган, неге десе Иса аьли данъкланмаган эди.

⁴⁰ Халктан коьплер, Исадынъ соьзин эситип, айттылыр: «Ол – акыйкатлай да (биз саклайтаган) пайхамбар!»

⁴¹ Баскалары: «Ол – Масих!» – дедилер. Оьзгелери болса айттылар: «Масих Галилеядан келип болмайды, сайсы!

⁴² Кие Язувларда: „Масих Даут тукымыннан эм Бетлехемнен, Даут яшаган авылдан келеек“, – деп, айтылмаганма, аьше?»

⁴³ Соьйтип, Иса акында халктынъ ойлары боьлинди.

⁴⁴ Бирерлери Оны ыслаяк болдылар, ама эш бирев де Исага колын тийдирмеди.

Ювыт басшыларынынъ ынанмавы

⁴⁵ Сонъында Алла уьйининъ саклавшылары бас дин куллыкшыларга эм парисейлерге кайттылар. Олардан: «Сиз Оны неге етип аькелмединъиз?» – деп сораганда,

⁴⁶ саклавшылар: «Эш бирев де соьлеге дейим соьйтип, бу Аьдемдей, соьйлемеген», – деп явапладылар.

⁴⁷ «Энди сиз де алдандынъызба? – дедилер парисейлер. –

⁴⁸ Аькимлердинъ яде парисейлердинъ биреви болса да Ога ынандыма?

⁴⁹ Тауратты анъламаган бу халк наьлет!»

⁵⁰ Оьзи парисейлердинъ бириси болып, кеше Исага келген Никодим:

⁵¹ «Таураттынъ аьдемди, басында тынъламай эм де ол не зат этетаганын анъламай, шуьшлемеге амалы барма экен?» – деди.

⁵² Ога: «Сен де Галилеядансынъма? Кара эм коьрерсинъ, Галилеядан эш бир пайхамбар да келмейди», – деп явапладылар. [

⁵³ Баьриси де уьйлерине кайттылар.