Яхья 21 - Инжил

Иса Тиберия коьлдинъ ягасында

¹ Муннан сонъ Тиберия коьлдинъ ягасында Иса сокталарына тагы да коьринди. Коьрингени де булай болды:

² Шимон Петер, Эгиз деп аталган Тома, Галилеядынъ Кана авылыннан Натанел, Зебедей уллары эм Исадынъ сокталарыннан тагы да экеви бирге йыйылдылар.

³ Шимон Петер: «Мен балык ысламага бараман», – деди. Йолдаслары: «Биз де сени мен барамыз», – деп токтастылар. Соьйтип тыска шыгып, кайыкка миндилер, ама сол кеше бир зат та ыслаялмадылар.

⁴ Танъ атканнан сонъ Иса коьл ягасында турды, тек сокталар Онынъ Иса болганын билмедилер.

⁵ Ол: «Балаларым, калайды, азык барым?» – деп сокталарыннан сорады. «Йок», – деп явап бердилер.

⁶ Сол заманда Иса: «Йылымды кайыктынъ онъ ягыннан тасланъыз эм ысларсыз», – деди. Олар йылымды тасладылар, балык коьп болганнан себеп, сувдан шыгараялмадылар.

⁷ Сонда Исадынъ айлак суьйген соктасы Петерге: «Бу – Раббий!» – деди. Петер тыскы кийимин шешкен эди. «Бу – Раббий!» дегенди эситкенлей, ол, тыскы кийимин кийип, коьлге каткыды.

⁸ Баска сокталар балыкка толган йылымды тартып, кайык пан юздилер. Олар ягадан узак болмай, эки юз кары шаклы алыста эдилер.

⁹ Ягага шыкканда янып турган коьмир отты эм онынъ уьстинде пискен балык пан оьтпекти коьрдилер.

¹⁰ Иса: «Энди ыслаган балыкларынъыздан бир нешев аькелинъиз», – деди.

¹¹ Шимон Петер кайыкка минип уьйкен балыклардан толган йылымды ягага шыгарды. Юз элли уьш балык бар эди. Сол кадер балык болганлай да, йылым йыртылмаган эди.

¹² Иса оларга: «Келинъиз эм ашанъыз!» – деди. Сокталардан биреви де, «Сен кимсинъ?» деп, сорамага батпады. Неге десе Онынъ Раббий экенин билдилер.

¹³ Иса барып, оьтпекти алды эм оларга берди. Сонъ балыкты да берди.

¹⁴ Соьйтип Иса, оьлип тирилгеннен сонъ, сокталарына уьшинши кере коьринди.

Иса эм Петер

¹⁵ Олар ас ишип болганнан сонъ, Иса Шимон Петерге: «Юнус улы Шимон! Буларга караганда Мени бек суьесинъме?» – деди. Петер: «Аьше, Раббий! Меним Сени ярататаганымды билесинъ де!» – деди. Иса: «Козыларымды бак», – деди.

¹⁶ Иса экинши кере: «Юнус улы Шимон, Мени суьесинъме?» – деди. Петер: «Аьше, Раббий! Сени ярататаганымды билесинъ де!» – деди. Иса: «Койларыма суьруьвши бол», – деди.

¹⁷ Уьшинши кайта Иса: «Юнус улы Шимон! Мени яратасынъма?» – деди. Петер: «Мени яратасынъма?» – деп уьшинши кере соравына мыдахланып, айтты: «Раббий! Сен баьри затты билесинъ. Сени ярататаганымды да билесинъ». Иса: «Койларымды бак.

¹⁸ Сага дурысын айтаман: сен яс заманынъда оьз кайысынъды оьзинъ байлап, кайда суьйсенъ, сонда бара эдинъ, а картайсанъ, баска бирев сени байлап, сен унамаган орынга аькетер», – деди.

¹⁹ Иса муны Петердинъ Аллады не туьрли оьлим мен данъклаягын анълатар уьшин айтты. Сонъ: «Меним артымнан кел», – деди.

²⁰ Петер артына бурылып караганда, ызыннан Исадынъ айлак суьетаган соктасы келеятканын коьрди. Ол кешки аста Исадынъ коькирегине ийилип: «Раббий, Сени ким сатаяк?» – деп, сораган сокта эди.

²¹ Петер оны коьргенде Исага: «Раббий! Оны ман кайтип болаяк?» – деди.

²² Иса: «Мен келгенге дейим онынъ сав болып турувын тилесем де мунда сенинъ не ишинъ бар? Сен Меним артымнан кел», – деди.

²³ Соннан сонъ иман кардашларынынъ арасында ол сокта оьлеек тувыл деген соьз яйылды. Ама Иса: «Ол оьлеек тувыл», – демеген эди, тек: «Мен келгенге дейим онынъ сав болып турувын тилесем де мунда сенинъ не ишинъ бар?» – деген эди.

²⁴ Бу ислерге шаатлык берген эм буларды язган сол сокта болады, биз онынъ шаатлыгы дурыс экенин билемиз.

²⁵ Иса булардан баска да коьп туьрли ислер этти. Эгер олар акында бир-бирлеп язылса, язылган китаплар дуныяга да сыймас эди деп, ойлайман.