Яхья 20 - Инжил

Исадынъ тирилуьви

¹ Юмадынъ биринши куьнинде танъда, аьли де каранъа болган вакытта, магдалашы Марьем кабырга барды эм онынъ алдыннан тас шетке тасланганын коьрди.

² Ол Шимон Петерге эм Исадынъ суьйген баска соктасына шабып барды: «Раббийди кабырдан алып кеткенлер, Оны кайда салганларын билмеймиз!» – деди.

³ Сонда Петер эм баска сокта кабырга йоьнедилер.

⁴ Олар экеви де шаптылар, тек экинши сокта Петерди озып, кабырга биринши келди.

⁵ Ол ийилип кабырдынъ ишине карады, Иса оралган кебинди коьрди, тек кабырга кирмеди.

^6-7 Сонъ онынъ артында калган Петер келип кабырга кирди. Ол да сонда турган кебинди эм Исадынъ басына байланган явлыкты коьрди. Явлык, кебин турган ерде болмай, баска бир ерде оьз алдына буькленип ятыр эди.

⁸ Сол заманда биринши болып келген баска сокта да кабырдынъ ишине кирди. Ол коьрди эм ынанды.

⁹ Олар, Иса оьлилерден тирилип турмага керек деген Кие Язувды, энди де анъламайтаган эдилер.

Иса магдалашы Марьемге коьринеди

¹⁰ Сонъ сокталар уьйге кайтып келдилер.

¹¹ Марьем кабырдынъ тысында йылап турды. Йылай, ийилип, кабыр ишине карады

¹² эм ак кийген эки маьлекти коьрди. Олардынъ бириси Исадынъ илеси яткан ерде бас янында, экиншиси аяк бетинде олтыра эди.

¹³ Маьлеклер ога: «Хатын! Неге йылайсынъ? Кимди излейсинъ?» – дедилер. Ол: «Раббийимди алып кеткенлер, Оны кайда салганларын билмеймен», – деди.

¹⁴ Муны айтып, айланып артына караганда, Исадынъ турганын коьрди, ама Онынъ Иса экенин анълалмады.

¹⁵ Иса: «Хатын! Неге йылайсынъ? Кимди излейсинъ?» – деди. Марьем Оны бавшы деп ойлап: «Бийим! Сен Оны шыгарган болсанъ, кайда салганынъды айт, мен Оны алып кетермен», – деди.

¹⁶ Иса: «Марьем!» – деди. Ол артына айланып, еврейше: «Раббуни!» – деди. Раббуни «устаз» деген маьнеде.

¹⁷ Иса: «Мени ыслама, Мен аьли де Атам янына коьтерилмегенмен, а сен кардашларыма барып, оларга айт: „Оьзимнинъ Атам эм сизинъ Атанъыз янына, Оьзимнинъ Аллам эм сизинъ Алланъыз янына коьтерилемен“», – деди.

¹⁸ Магдалашы Марьем кетти эм сокталарга: «Мен Раббийди коьрдим, Ол мага мине сосыларды айтты», – деп билдирди.

Иса сокталары ман йолыгады

¹⁹ Юмадынъ биринши куьнининъ кешесинде сокталар ювыт басшыларыннан коркып, эсиклерди киртлеп, йыйылып турган вакытта, Иса келип кирди; ортага шыгып, оларга: «Сизге тынышлык!» – деди.

²⁰ Муны айтканнан сонъ, Ол оларга колларын эм янбасын коьрсетти. Сокталар Раббийди коьрип кувандылар.

²¹ Сонъ Иса оларга тагы да бир айтты: «Тынышлык сизге! Атам Мени йибергендей этип, Мен де сизди йиберемен».

²² Муны айтып, Иса олардынъ уьстине солык берип: «Кие Рухты кабыл этинъиз.

²³ Кимнинъ куьналарын кеширсенъиз, соныкы кеширилер, кимдикин кеширмесенъиз, соныкы кеширилмеген болып калар», – деп косты.

Иса эм Тома

²⁴ Он экидинъ бириси Эгиз деп аталатаган Тома, Иса келгенде, сол ерде олардынъ арасында йок эди.

²⁵ Баска сокталар ога: «Биз Раббийди коьрдик!» – дедилер. А Тома: «Онынъ колларындагы шуьй яраларын коьрмей, шуьй яраларына бармагымды тыгып, янбасына колымды тийдирип карамай, ынанмам», – деди.

²⁶ Бир юмадан сонъ Исадынъ сокталары тагы да уьйге йыйылдылар, Тома да олар ман эди. Эсиклер киртли эди, ама Иса кирип келди, олардынъ ортасына шыгып: «Тынышлык сизге!» – деди.

²⁷ Сонъ Томага айтты: «Бармагынъды мунда соз эм меним колларымды кара, колынъды соз да Меним янбасыма тийдир. Имансыз болмай, иманлы бол!»

²⁸ Тома явапка: «Раббийим эм Аллам!» – деди.

²⁹ Иса: «Сен мени коьргенинъ уьшин ынандынъ, коьрмей ынанганлар – бактылы!» – деди.

³⁰ Иса сокталары алдында бу китапта язылмаган баска бек коьп аьлемет нышанлар коьрсетти.

³¹ Ама бу затлар, сиз Исадынъ Алла Улы Масих болганына ынанар уьшин эм, ынанып, Онынъ аты ман яшав алар уьшин язылганлар.