Яхья 19 - Инжил

Иса оьлимге бериледи

¹ Сонъ Пилат Исады ыслап камышыламага буйырды.

² Аскершилер шоькирли коьгем бутакларыннан таж оьрип, Исадынъ басына салдылар, Ога карагошкыл-кызыл аба кийдирдилер.

³ Ога ювыкласып: «Яшасын Ювыт Патшасы!» – деп, ягына шала эдилер.

⁴ Пилат яне тыска шыгып, оларга айтты: «Мине, Онда эш бир айып таппаганымды билдируьв уьшин, Оны сизинъ алдынъызга шыгараман».

⁵ Сол заманда, басына шоькирли таж эм карагошкыл-кызыл аба кийип, Иса тыска шыкты. Пилат: «Мине сосы Киси!» – деди.

⁶ Бас дин куллыкшылар эм саклавшылар Исады коьрип: «Кашка керинъиз Оны!» – деп кышкырдылар. Пилат: «Оны оьзинъиз алынъыз да керинъиз, неге десе Онда бир айыплык та таппайман!» – деди.

⁷ Ювытлар: «Бизде йорык бар, сол йорык бойынша Ол Оьзин Алладынъ Улы деп санаганы уьшин, оьлмеге тийисли».

⁸ Пилат бу соьзлерди эситкеннен сонъ тагы да бек коркты.

⁹ Ол тагы да Преториумга кирип Исадан: «Сен кайдансынъ?» – деп сорады. Иса ога явап бермеди.

¹⁰ Пилат: «Сен мени мен соьйлемессинъме? Сени босатпага да, кашка кермеге де эркинлигим болганын Сен анъламайсынъма?» – деп сорады.

¹¹ Иса: «Эгер дейим сага йогардан берилмеген болса, Меним уьстимнен эш бир эркинлигинъ болмаяк эди. Соны уьшин Мени сага сатканнынъ куьнасы сеникиннен де уьйкен», – деп яваплады.

¹² Сонъ Пилат Оны босатпага каьрледи, ама ювытлар: «Оны босатсанъ, сен кесардынъ досы тувылсынъ. Оьзи оьзин патша деп атаган аьр ким – кесардынъ душпаны», – деп кышкыра эдилер.

¹³ Пилат бу соьзлерди эситкеннен сонъ, Исады тыска шыгарды эм Литостротон – еврейше Габбата – деп аталган ерде болган оьким шыгарув орынга олтырды.

¹⁴ Сол куьн Пасха байрамы алдындагы юма куьн алтыншы саьат эди. Пилат ювытларга: «Мине Патшанъыз!» – деди.

¹⁵ Олар кышкырдылар: «Аькет Оны! Ал Оны, кашка кер!» Пилат: «Патшанъызды керейимме?» – деп сорады. Бас дин куллыкшылар: «Бизим кесардан баска патшамыз йок!» – деп явап бердилер.

¹⁶ Сонъ Пилат Исады, кашта керилсин деп, оларга тапшырды. (Аскершилер) Исады алып кеттилер.

Исады кашка керуьв

¹⁷ Оьзининъ кашын коьтерип, Иса шахардан шыгып, еврейше Голгота – Бас суьек – атлы ерге келди.

¹⁸ Сонда Исады эм Оны ман бирге тагы да эки кисиди эки янына, а Исады ортага салып, кашка кердилер.

¹⁹ Пилат язув яздырып, оны каштынъ уьстине какпага буйырды. Онда «Назаретши Иса – Ювыт Патшасы» деп, язылган эди.

²⁰ Сол язувды коьп ювытлар окыды, неге десе Иса керилген ер шахарга ювык эм де еврейше, грекше эм латынша язылган эди.

²¹ Ювыт бас дин куллыкшылары Пилатка: «„Ювыт Патшасы“ деп тувыл, а „Ол Оьзи: Мен Ювыт Патшасыман, дейди“ деп яз», – дедилер.

²² Пилат: «Мен не язган болсам, яздым», – деп явап берди.

²³ Аскершилер Исады кашка кергеннен сонъ, Онынъ кийимлерин алып, аьр аскершиге бир уьлис этип, доьртке боьлдилер. Исадынъ узын коьйлегин де алдылар. Коьйлек тигиссиз, басыннан тутас токылган бир кийим эди.

²⁴ Соьйтип, олар бирбирисине: «Муны йыртпаяк, а сыбага салайык, кимге туьсер», – дедилер. Бу: „Кийимлеримди боьлистилер эм абам уьшин сыбага тасладылар“, – деген Кие Язув толар уьшин болды. Аскершилер язылганды толтырдылар.

²⁵ Иса керилген каштынъ янында анасы, анасынынъ синълиси, Клеопадынъ хатыны Марьем эм магдалашы Марьем тура эдилер.

²⁶ Иса, анасын эм сонда турган суьйикли соктасын коьрип, анасына: «Мине бу улынъ!»

²⁷ А соктасына: «Мине бу ананъ!» – деди. Сол заманнан алып сокта Исадынъ анасын оьз уьйине алды.

Исадынъ оьлими

²⁸ Сонъ Иса, аьр не зат энди тамам болганын билип, Кие Язув толар уьшин: «Сувсадым», – деди.

²⁹ Сонда ашыган шагыр ман толган шоьлмек туры эди. Аскершилер губкады шагырга малып, иссоп таякка тагып, Онынъ авызына аькеттилер.

³⁰ Иса шагырды ялап карады: «Тамам болды!» – деди, басын ийди, ян берди.

³¹ Сол куьн юма куьн болганлыктан, ювыт басшылары илеслерди шабат куьнде кашта калдырмас уьшин – ол шабат куьни айлак маьнели куьн болган себепли – Пилаттан, сыйракларын сындырып, илеслерин тасламага тиледилер.

³² Сонъ аскершилер келип, Иса ман бирге кашка керилгенлерден бириншисининъ де, экиншисининъ де сыйракларын сындырдылар.

³³ Исадынъ янына келгенде, Онынъ оьлгенин коьрип, сыйракларын сындырмадылар.

³⁴ Ама аскершилердинъ биреви суьнъги мен Онынъ янбасына сукты эм тезден оннан кан ман сув акты.

³⁵ Муны коьрген киси шаатлык эткен, онынъ шаатлыгы тувра эм ол туврасын айтканын биледи. Сиз ынанар уьшин шаатлык этеди.

³⁶ Бу баьри зат, «Онынъ эш бир суьеги сынмас» деген Кие Язув толар уьшин болды.

³⁷ Кие Язувлардынъ баска бир еринде «Олар суьнъги сугылганга караяклар» деп те язылган.

Исады кабырга салув

³⁸ Сонъ, Исадынъ соктасы болган, ама ювыт басшыларыннан коркып, муны ясырып турган араматияшы Юсуп, Пилаттан Исадынъ илесин алмага ызын сорады. Пилат ызын берди. Юсуп барып Исадынъ илесин каштан алды.

³⁹ Озган кеше Иса янында болган Никодим де келди, оьзи мен юз литрага ювык мир мен алоэ аькелди.

⁴⁰ Соьйтип олар, Исадынъ илесин алып, оны аьруьв ийисли майлар ягылган кетен кумашка орадылар: ювытлардынъ кабырга салув аьдети сондай эди.

⁴¹ Иса кашка керилген ерде бир бав эм бавда аьле де эш бирев орынластырылмаган кабыр бар эди.

⁴² Сол куьн ювытлар шабат куьнине аьзирленетаган юма куьни болганы уьшин Исады сонда койдылар, неге десе кабыр ювыкта эди.