Яхья 15 - Инжил

Юзим тереги мен бутаклар

¹ «Мен – акыйкат юзим терегимен, а Атам – юзимши, – деп айтты Иса. –

² Ол Менде болган емиссиз бутаклардынъ баьрисин кеседи, а емис берген аьр бутакты, тагы да емисли болсын деп, тазалайды.

³ Айткан соьзим аркалы энди тазасыз.

⁴ Мага байланып калынъыз, Мен де сизге байланып каларман. Бутак юзим терегине байланып калмаса, оьзи оьзиннен емис бералмас. Солай ок сиз де Мага байланып калмасанъыз, емис бералмассыз.

⁵ Мен – юзим тереги, а сиз – бутаклары. Ким Мага байланып калса эм Мен ога байланып калсам, ол коьп емис берер, неге десе Менсиз бир зат та эталмассыз.

⁶ Ким Мага байланып калмаса, бутактай, тыска атылар эм курар. Ондай бутакларды йыядылар эм отка атып ягадылар.

⁷ Эгер Мага байланып калсанъыз эм Меним соьзлерим сизде калса, сол заманда тилеген не затынъызды да аларсыз.

⁸ Эгер сиз коьп емис аькелип, Меним сокталарым болсанъыз, сонда Меним Атам данъкланар.

⁹ Атам Мени суьйгенше, Мен де сизди суьемен. Меним суьйимимде калынъыз.

¹⁰ Мен Атамнынъ парызларын толтырып, Онынъ суьйимин алгандай, сиз де Меним парызларымды толтырсанъыз, Меним суьйимимди аларсыз.

¹¹ Меним куванышым сизде болсын эм сизинъ куванышынъыз толы болсын деп, буларды сизге айттым.

¹² Мине Меним парызым: Мен сизди суьйгендей, бир биринъизди суьйинъиз.

¹³ Дослары уьшин янын берген аьдемнинъ суьювиннен уьйкен суьюв йок.

¹⁴ Меним сизге буйырганларымды этсенъиз, сиз – Меним досларым.

¹⁵ Мен энди сизди кулларым деп атамайман, неге десе кул оьз бийининъ не эткенин билмейди. Керисинше, Мен сизди досларым деп атадым, неге десе Атамнан эситкенлеримнинъ баьрин де сизге билдирдим.

¹⁶ Сиз Мени сайламадынъыз, сизди Оьзим сайладым. Барып, емис беринъиз, емисинъиз де дайым калсын деп, сизди сайлап, куллыкка салдым. Меним атым ман Атадан не тилесенъиз, Ол соны сизге берер уьшин эттим.

¹⁷ Бир биринъизди суьйинъиз – Меним сизге парызым сол.

Дуныядынъ коьрип болмавы

¹⁸ Эгер дуныя сизди коьрип болмаса, билинъиз: ол сизден алдын Мени коьрип болмаган.

¹⁹ Сиз бу дуныядан болсанъыз, дуныя оьзиннен болганларды яратар эди; тек сиз бу дуныядан тувылсыз, Мен сизди дуныядан сайлап айырдым, соны уьшин дуныя сизди коьрип болмайды.

²⁰ „Кул оьзининъ бийиннен уьйкен тувыл“ деген соьзлеримди эсинъизде тутынъыз. Эгер Меним артыма туьскен болсалар, сизинъ артынъызга да туьсееклер; эгер Меним уьйреткенимди толтырган болсалар, сизинъ уьйреткенинъизди де толтыраяклар.

²¹ Булардынъ баьрин де Меним атым уьшин сизге этееклер, неге десе Мени Йибергенди танымайдылар.

²² Мен келип оларга айтпаган болсам, олардынъ куьналары болмас эди, а энди куьналарын кеширеек бир затлары да йок.

²³ Мени коьрип болмаган, Меним Атамды да коьрип болмайды.

²⁴ Мен олардынъ арасында баска бирев де этпеген затларды ислемеген болсам, олардынъ куьналары болмас эди; а энди коьрдилер эм Мени де, Атамды да коьрип болмадылар.

²⁵ Бу, оларга буйырылган Тауратта „Мени бир себепсиз коьрип болмадылар“ деген соьз толсын деп, болды.

²⁶ Мен сизге йибереек Юбантувшы – Атадан шыгатаган акыйкатлык Рухы – келген заманда, Ол Мага шаатлык этер.

²⁷ Сиз де шаатлык этерсиз, неге десе биринши куьнлерден алып Мени мен биргесиз.