Яхья 13 - Инжил

Иса сокталарынынъ аякларын ювады

¹ Пасха байрамына бир куьн калган эди. Иса бу дуныяды койып, Атасына кайтпага вакыт еткенин билетаган эди. Бу дуныяда Онынъ ягы болганларды айлак суьетаган эди. Энди оларды ахырына дейим суьйгенин коьрсетти.

² Ибилис, байрам зияпети болган заманда Шимоннынъ улы Юда Искариоттынъ юрегине Исады сатпага ой салды.

³ Иса Атасынынъ Онынъ колына баьри затты да бергенин, Оьзининъ де Алладан шыгып келгенин эм Аллага кайтаягын билетаган эди.

⁴ Ол астан турды, Оьзининъ абасын шешти, бетявлык алып, белине байлады.

⁵ Сонъ кумганга сув куйды, сокталарынынъ аякларын ювып, белине байланган бетявлык пан суьртип баслады.

⁶ Ол Шимон Петердинъ касына келгенде, Петер: «Раббий! Меним аякларымды Сен юваяксынъма?» – деп сорады.

⁷ Иса явапка: «Сен соьле Меним не зат этетаганымды анъламайсынъ, заман озса, анълаяксынъ», – дегенди айтты.

⁸ Петер: «Сен меним аякларымды бир заманда да ювмаяксынъ!» – деди. Иса: «Эгер дейим аякларынъды ювмасам, Менде пайынъ болмаяк», – деди.

⁹ Петер: «Раббий, тек аякларымды ювып калмай, колларымды да, басымды да юв!» – деди.

¹⁰ Иса булай айтты: «Шомылган аьдем савлай таза, ол тек аякларын ювмага керек. Сиз тазасыз, ама баьринъиз тувыл».

¹¹ Иса Оны ким сатаягын билгеннен себеп, баьриси де таза тувыл деп, билдирди.

¹² Иса сокталарынынъ аякларын ювып кутылганнан сонъ, кийинип, сыпырада орнына кайтты: «Меним сизге не зат эткенимди анъладынъызба?» – деп сорады.

¹³ «Мине сиз Мени Устаз деп те, Раббий деп те атайсыз эм тувра этесиз, неге десенъ Мен – эм Устаз, эм де Раббий.

¹⁴ Сонынъ уьшин, Мен, Раббий эм Устаз бола турып, аякларынъызды ювган болсам, сиз де бир биринъиздинъ аякларынъызды ювмага керексиз.

¹⁵ Мен сизге, эткенимди сиз де этинъиз деп, коьрим коьрсеттим.

¹⁶ Сизге дурысын айтаман: кул оьзининъ бийиннен уьйкен тувыл, элши оны йибергеннен уллы тувыл.

¹⁷ Сиз бу затларды билгенинъизге коьре, толтырсанъыз – бактылысыз!

Исады сатаяк аьдем

¹⁸ Мен баьринъиз акында айтпайман. Мен Оьзим сайлаганларымды билемен. Тек „Мени мен бирге оьтпек ашайтаган Мага кол коьтерген“ деген Кие Язув толтырылмага керек.

¹⁹ Мен айткан ислер толган вакытта, Ким болганыма ынанарсыз деп, сизге баьри заттынъ акында эртерек айтаман.

²⁰ Сизге дурысын айтаман: ким Мен йибергенди кабыл этип алса, Мени де алар, эм ким Мени кабыл этип алса, сол Мени Йибергенди де алар».

²¹ Соьйтип соьйлегеннен сонъ Исадынъ коьнъили кайгылы болып: «Сизге дурысын айтаман: биринъиз Мени сатаяк», – деп беркитти.

²² Сокталар, Исадынъ ким акында соьйлегенин анъламай, бир бирлерине карадылар.

²³ Сокталарынынъ бириси – Исадынъ айлак суьйгени – сыпыра янында Исадынъ касында янтайган эди.

²⁴ Шимон Петер: «Ол кимнинъ акында айтады, соратага», – деп, ога ымлады.

²⁵ Ол да Исадынъ коькирегине ювыклап: «Раббий, ким ди ол?» – деп сорады.

²⁶ Иса: «Мен бир кесек оьтпекти малып кимге берсем, эне – сол», – деди де, бир кесек оьтпекти тепшекке малып, Шимон улы Юда Искариотка берди.

²⁷ Оьтпекти алганнан сонъ ок Юдадынъ ишине шайтан кирди. Иса: «Ислеек болатаган исинъди тез болып исле», – деди.

²⁸ Ама сол соьзлердинъ маьнесин олтырувшылардынъ биреви де анъламады.

²⁹ Юдада ортак акша кассасы болганнан себеп, кайбиревлер Иса ога байрамга керек болган яракларымызды сатып алмага яде ярлыларга не болса да бир затлар шашпага буйрык береди деп ойладылар.

³⁰ Юда, кесек оьтпекти алганлай, уьйден шыгып кетти. Туьн эди.

Янъы парыз

³¹ Юда шыгып кеткенде, Иса: «Энди Аьдем Улы данъкланды, Оны ман Алла да данъклы болды.

³² Эгер Алла Оны ман данъкланган болса, Алла да Оны Оьзи мен данъклы этер. Аьдем Улы тез арадан данъклы болар.

³³ Балаларым! Мен сизи мен энди узак заман болмам. Мени излерсиз, ювытларга не айткан болсам, соьле сизге де соны айтайым: Мен кетеек ерге сиз келалмассыз.

³⁴ Сизге янъы парыз беремен: бир биринъизди суьйинъиз. Мен сизди суьйгендей, бир биринъизди солай суьйинъиз.

³⁵ Эгер дейим бир биринъизди суьйсенъиз, Меним сокталарым экенинъизди баьриси де билер», – деди.

Петер Исадан басын алаяк

³⁶ Шимон Петер: «Раббий! Сен кайда барасынъ?» – деп сорады. Иса: «Мен бараяк ерге сен артымнан баралмассынъ, ама сонъында келерсинъ», – деп яваплады.

³⁷ Петер: «Раббий! Не уьшин Сенинъ артынънан соьле ок келалмайман? Сенинъ уьшин янымды береекпен», – деди.

³⁸ Иса: «Меним уьшин янынъды береексинъме? Сага дурысын айтаман: кораз кышкырганша, Меннен уьш кере басынъды алаяксынъ», – деп яваплады.