Яхья 12 - Инжил

Бетхинийде Исага май ягув

¹ Пасхага алты куьн калганда, Иса Оьзи тирилткен Лазар яшаган ерге, Бетхинийге, келди.

² Мунда Исага деп зияпет аьзирледилер. Марта сыпыра курып юрди. Сыпырадынъ янында Иса ман олтырганлардынъ ишинде Лазар да бар эди.

³ Сол вакытта Марьем, ишинде бир литра таза эм баалы нард майы болган савытты алып, Исадынъ аякларын майлады. Сонъ оьз шашы ман суьртип баслады. Уьйдинъ иши майдынъ ийис-кокысына толды.

⁴ Исадынъ сокталарынынъ бириси, сонъында Оны саткан Юда Искариот, булай айтты:

⁵ «Бу май неге уьш юз динарга сатылып, акшасы ярлыларга уьлестирилмеди?»

⁶ Буьйтип ол ярлылар уьшин яны авырып тувыл, карак болганы уьшин айтты. Ога ортак акша кассасы тапшырылган эди, а ол оьз керегине оннан акша алатаган эди.

⁷ Иса: «Бу хатынга тийменъиз. Ол бу майды Меним коьмилеек куьниме саклай эди.

⁸ Ярлылар аьр заманда да сиз бен бирге болаяклар, а Мен сиз бен аьр заман да болмаякпан», – деди.

⁹ Коьплеген ювытлар, Исадынъ сонда болганын билип, Онынъ янына йыйылдылар. Бир Иса уьшин тувыл, Ол оьлилерден тирилткен Лазарды да коьрмеге келген эдилер.

¹⁰ Дин куллыкшылары болса Лазарды да оьлтирмеге соьз беркиттилер,

¹¹ неге десе ол аркалы коьп ювытлар барып, Исага ынана эдилер.

Иса Ерусалимге киреди

¹² Эртеси куьн Пасха байрамына келген коьлем халк Исадынъ Ерусалимге келеятырганын эситти.

¹³ Олар пальма бутакларын алып Исадынъ алдына шыктылар: «Осанна! Раббийдинъ аты ман келеятырган Исраилдинъ патшасы муьбарек болсын!» – деп бакыра эдилер.

^14-15 Иса яс эшекти тапты эм Кие Язувларда, «Сионнынъ кызы, коркпа! Мине патшанъ яс эшекке атланып, келеятыр» деп язылгандай, сол эшекке минди.

¹⁶ Басында Исадынъ сокталары бу болган затты анъламадылар. Тек сонъында, Иса данъкланганнан сонъ, бу соьзлердинъ Онынъ акында язылганын эм бу затларды Ога эткенлерин эслерине туьсирдилер.

¹⁷ Иса Лазарды кабырдан шакырып, оьлилерден тирилткен вакытта, Оны ман бирге болган коьлем халк не болганын хабарлай эдилер.

¹⁸ Халк Исадынъ бу аьлемет нышанды коьрсеткенин эситип, Онынъ алдына шыкты.

¹⁹ Парисейлер бир бирлерине: «Коьресизбе? Бизге бир зат та ярдам этпейди. Мине, дуныя Онынъ артыннан барады!» – дедилер.

Иса оьлеегин алдыдан билдиреди

²⁰ Сол байрамга Аллага табынувга келгенлердинъ ишинде бир неше грек те бар эди.

²¹ Олар Галилеядагы Бетсайдадан болган Пилиптинъ касына барып: «Бийим, биз Исады коьрмеге суьемиз», – деп тиледилер.

²² Пилип Эндрейдинъ касына барып, оны ман бирге Исага янасып, сол тилекти билдирди.

²³ Иса явапка: «Аьдем Улынынъ данъкланаяк заманы келип калды.

²⁴ Сизге дурысын айтаман: ерге туьскен бийдай урлыгы оьлмесе, ялгыз калар; эгер дейим оьлсе, коьп онъыс берер.

²⁵ Ким яшавын суьйсе, сол оны йойтар; а ким бу дуныяда яшавына эс бермесе, сол оны оьмирине саклар.

²⁶ Ким Мага куллык этпеге суьйсе, Меним артымнан ызласын. Мен кайда болсам, кулларым да сонда болаяк. Эм ким Мага куллык этсе, Атам оны оьрметлер.

²⁷ Соьле Меним яным бек кайгырады. Мен не зат айтайым: „Атам! Мени бу азап саьатиннен сакла“, – деп пе? Тек Мен сол саьатти сынар уьшин келип турыман.

²⁸ Эй, Атам! Оьз атынъды данъкла!» – деди. Сол вакытта коьктен: «Мен данъкладым эм тагы да данъклаякпан», – деген аваз келди.

²⁹ Сонда турган эм авазды эситкен халктынъ бирерлери, коьк гуьрилдеди деп, баскалары, Иса ман маьлек соьйледи деп, айттылар.

³⁰ Иса: «Бу аваз Меним уьшин тувыл, сизинъ уьшин болды.

³¹ Энди бу дуныяга оьким заманы етти, энди бу дуныядынъ басшысы тыска куваланып шыгарылаяк.

³² Мен ерден коьтерилген заманда, баьри аьдемлерди Оьзиме тартаякпан», – деди.

³³ Иса сол соьзлерди айтып, кайсы оьлим мен оьлеегин анълатты.

³⁴ Халк: «Биз Тауратта, Масих дайым яшаяк деп, окыганмыз. Сен, „Аьдем Улы йогарга коьтерилмеге керек“ деп, неге айтасынъ? Ким ди Ол – Аьдем Улы?» – дегенди сорады.

³⁵ Сонда Иса булай явап берди: «Бир кесек заманды сизи мен энди де ярык болаяк. Каранъалык сизди капламас уьшин ярык сизде болган заманда юринъиз. Каранъалыкта юрген аьдем кайда барганын билмейди.

³⁶ Ярыктынъ уллары болар уьшин ярык сизде болган заманда, ярыкка ынанынъыз». Соьзин кутылганнан сонъ Иса олар билмеген ерге кетти.

Ювыт басшылардынъ ынанмавы

³⁷ Иса олардынъ коьз алдында коьп аьлемет нышанларды коьрсетсе де Ога ынанмадылар.

³⁸ Соьйтип, Ешая пайхамбардынъ: «Раббий, айтканымызга ким ынанды? Раббийдинъ куьдирети кимге ашылды?» – деген соьзлери толды.

^39-40 Соннан себеп ынаналмадылар. Ешая баска ерде айткандай: «(Алла) олардынъ коьзлерин сокыр эткен, юреклерин сезимсиз эткен. Солай болмаса олар коьзлери мен коьрер, юреклери мен анълар эм Мага кайтар эдилер, (дейди Алла) Мен де оларды савартар эдим».

⁴¹ Ешая, Исадынъ данъкын коьрген себепли, Онынъ акында бу соьзлерди айткан эди.

⁴² Болса да басшылардынъ коьбиси Ога ынанган эдилер, тек синагоглардан кувылмас уьшин парисейлерден коркканнан ынанганларын ашык айтпадылар.

⁴³ Неге десе Алладынъ данъклавыннан эсе, аьдемлердинъ данъклавын бек суьйген эдилер.

⁴⁴ Иса: «Эгер аьдем Мага ынанса, ол тек Мага ынанмай, Мени Йибергенге де ынанады.

⁴⁵ Мага караган Мени Йибергенди коьреди.

⁴⁶ Мен бу дуныяга, Мага ынанган аьдем каранъалыкта калмасын деп, ярык болып келгенмен.

⁴⁷ Соьзлеримди тынълап, тек Мен айтканды этпейтаган аьдемлерге оьким шыгармайман. Бу дуныяды шуьшлемеге тувыл, куткармага келгенмен.

⁴⁸ Мени эм соьзлеримди унамаганларга бар тоьреши: Мен айткан соьз сонъгы куьнде оларга оьким шыгарар.

⁴⁹ Мен Оьзимнен соьйлемеймен. Не айтаягымды эм не соьйлеегимди Мени йиберген Атам Оьзи буйырады.

⁵⁰ Билемен, Онынъ буйырыгы оьмирлик яшавды береди. Сол себеп Мен не зат айтсам да, соны Атамнынъ буйрыгы ман айтаман», – деди.