Яхья 10 - Инжил

Суьруьвши мен суьрим

¹ Сизге дурысын айтаман: ким койлар авласына капыдан кирмей, ама кайдай болса да баска бир йол ман кирген – кырсыз эм тонавшы.

² Ама ким капыдан киреди, сол койлардынъ койшысы.

³ Каравыл ога капыды ашады. Койлар койшыдынъ давысын эситедилер, ол койларын, атын айтып, шакырып, шыгарады.

⁴ Койларынынъ баьрисин шыгарганда, олардынъ алдында барады, койлар да, давысын танып, артыннан иередилер.

⁵ Койлар эш бир заманда да келетеннинъ артыннан бармаяклар, онынъ давысын танымаган себепли оннан кашаяклар», – деди.

⁶ Иса сосындай тенълестируьвди кулланды, ама олар не зат акында айтканын анъламадылар.

⁷ Сонда Иса тагы: «Сизге дурысын айтаман: Мен койлардынъ капысыман.

⁸ Мага дейим келгенлер – баьриси кырсыз эм тонавшылар. Койлар оларды тынъламадылар.

⁹ Мен капыман. Ким Меннен киреди, сол куткарылаяк. Ол киреек, шыгаяк эм отлак табаяк.

¹⁰ Кырсыз тек урламага, оьлтирмеге эм бузбага келеди, а Мен аьдемлерге яшавды, толы яшавды таптырмага келгенмен.

¹¹ Мен танъ койшыман. Танъ койшы оьзининъ койлары уьшин яшавын береди.

¹² Ялшы койлардынъ койшысы эм иеси болмаган себепли боьри келгенин коьрсе, койларды таслап, кашады. Сонда боьри оларды талап шашады.

¹³ Ялшы кашып кетеди, неге десе ялга алынган эм койлардынъ каьрин шекпейди.

¹⁴ Мен танъ койшыман: койларымды таныйман, койларым да Мени таныйдылар.

¹⁵ Солай ок Атам да Мени таныйды, Мен де Атамды таныйман. Мен янымды койларым уьшин беремен.

¹⁶ Менде сосы авладан болмаган баска койлар да бар, оларды да аькелмеге керекпен. Олар да Меним давысыма тынълавлы болаяклар, тек бир суьрим, тек бир койшы болаяк.

¹⁷ Сонынъ уьшин Атам Мени суьеди, неге десе, кайтарадан алаяк болып, янымды беремен.

¹⁸ Эш бирев де Меннен янымды тартып алмайды, оны разы болып беремен. Оны бермеге эм кайтарадан алмага куватым бар. Бу буйырыкты Атамнан алганман», – деди.

¹⁹ Сосы соьзлерден сонъ ювытлардынъ ойы тагы да боьлинди.

²⁰ Коьплери: «Ол йинли, акылыннан тайган. Оны неге тынълайсыз?» – дедилер.

²¹ Баскалары: «Бу йинлидинъ соьзлери тувыл. Йин сокырдынъ коьзлерин ашпага боларма?» – дейтаган эдилер.

Ювытлардынъ ынанмавы

²² Ерусалимде Алла уьйининъ ашылганын эске туьсируьв байрамы эди. Кыс эди.

²³ Сол заманда Иса Алла уьйининъ каралдысында, Сулейменнинъ колоннадасында айланатаган эди.

²⁴ Онынъ тоьгерегине ювытлар йыйылдылар. «Сен анъламаслыкта бизди не шаклы тургыстаяксынъ, – дедилер олар. – Эгер Сен Масих болсанъ, айт та кой бизге».

²⁵ Иса яваплады: «Сизге айткан эдим, ама ынанмайсыз. Мага Атамнынъ аты ман этетаган ислерим шаатлык этедилер.

²⁶ А сиз ынанмайсыз, неге десе, Мен сизге айтканша, Меним койларым тувылсыз.

²⁷ Койларым давысыма эс бередилер. Мен оларды таныйман, олар да Мага иередилер.

²⁸ Оларга оьмир яшавды беремен. Олар эш бир заманда да йойылмаяклар, эш бирев оларды колымнан алалмаяк.

²⁹ Оларды Мага берген Атам баьрисиннен де йогары, эш бирев оларды Атамнынъ колыннан алалмаяк.

³⁰ Мен эм Атам – бир».

³¹ Сол вакыт ювытлар, Оны оьлтиреек болып, тагы да тасларга узалдылар.

³² Иса: «Сизге Атамнынъ тапшырувы ман коьп яхшы ислерди коьрсеттим. Сол ислердинъ кайсысы уьшин Мага тас атаяк боласыз?» – деп сорады.

³³ Ювытлар явапка: «Сени яхшы ислер уьшин тас атып оьлтиреек болмаймыз, ама ассылык эткенинъ уьшин, неге десе, аьдем болып, Оьзинъди Алла этип коьрсетесинъ», – дедилер.

³⁴ Иса: «Аьше, Тауратынъызда, „Мен айтканман – сиз аллаларсыз“ деп, язылмаганма?

³⁵ Алла кимлерге соьзин йиберген болса, соларга „аллалар“ деп айтады. Кие Язув да куватсыз болалмас.

³⁶ Атам Мени бу куллыкка багыслап, дуныяга йиберди. Солай болганда, Мен „Алла Улыман“ дегеним уьшин Мага калай, „Ассылык этесинъ“ деп, айтпага боласыз?

³⁷ Эгер Атам тапшырган ислерди этпесем, Мага ынанманъыз.

³⁸ Ама этетаган болсам, Мага ынанмасанъыз да Мен эткен ислерге ынанынъыз. Солай этип Атам Менде, Мен де Атамда болганымды анъларсыз», – деди.

³⁹ Олар тагы да Оны ыслаяк болып эдилер, тек Иса олардынъ колларыннан сыпырылып кашып кутылды.

⁴⁰ Иса Йорданнынъ аргы ягына, Яхъя басында аьдемлерди сувда шомылдырып тазалаган ерге кетти эм сонда калды.

⁴¹ Ога коьп аьдемлер келдилер. «Яхъя аьлемет нышанлар этпесе де онынъ Иса акында айтканларынынъ баьриси туьз болып шыкты», – дедилер.

⁴² Коьплер сонда Исага ынандылар.