Яхья 1 - Инжил

Соьз аьдем болды

¹ Бас деп Соьз бар эди, Соьз Аллада эди, эм Соьз Алла эди.

² Ол алды ман Аллада болган эди.

³ Не зат яшайтаган болса, баьриси Ол аркалы бар болган, Ол болмай, болган затлардынъ эш биреви де яшап басламаган.

⁴ Онынъ ишинде яшав бар эди эм сол яшав – аьдемлердинъ ярыгы эди.

⁵ Ярык каранъалыкта яркырайды эм каранъалык оны бийлалмайды.

⁶ Алладан йиберилген аьдем бар эди. Онынъ аты Яхъя эди.

⁷ Ол шаат болып келди. Ярык акында шаатлык этип, баьрисин Ога ынандырар уьшин келген эди.

⁸ Ол оьзи ярык тувыл эди, ама ярыкты шаатлар уьшин йиберилген эди.

⁹ Дуныяга келетаган аьр аьдемди ярыкландыратаган акыйкат ярык бар эди.

¹⁰ Ярык дуныяда эди, дуныя Ол аркалы болып басланган эди, ама дуныя Оны танымады.

¹¹ Ол оьз юртына келди эм оьзиндикилер Оны хош коьрип йолыкпадылар.

¹² Ама ким Оны йолыкты эм Онынъ атына ынанды, солардынъ баьрисине де Алладынъ балалары болмага эркинлик берди.

¹³ Олар не каннан, не инсан суьйиминнен, не эрдинъ суьйиминнен тувыл, а Алладан тувганлар.

¹⁴ Соьз инсан болды эм бизим арамызда, шапагатка эм акыйкатлыкка толып, яшады. Биз Онынъ данъкын коьрдик, Атасыннан ялгыз тувганнынъ данъкын коьрдик.

¹⁵ Онынъ акында Яхъя, бегитип, шаатлайтаган эди: «Бу – сол мен айткан: „Меним артымнан келеятырган меннен йогары турады, неге десе Ол меннен де алдын болган“».

¹⁶ Онынъ шетсиз кыйырсыз ийгилигиннен баьримиз де артлы артыннан шапагатын аламыз.

¹⁷ Муса аркалы Таурат берилген эди, а Иса Масих аркалы шапагат пан акыйкатлык келдилер.

¹⁸ Эш бирев де бир заманда да Аллады коьрмеген, Оны Атадынъ юрегине энъ ювык болып, Оьзи де Алла болувшы, ялгыз Улы билдирди.

Яхъя пайхамбардынъ шаатлавы

¹⁹ Ерусалимдеги ювыт басшылар Яхъяга дин куллыкшыларын эм левитлерди, онынъ ким экенин соратып, йиберген заманда, Яхъядынъ шаатлыгы булай эди.

²⁰ Ол басын алмай, туврасыннан айтып: «Мен Масих тувылман», – деп ашыклады.

²¹ Олар Яхъядан сорадылар: «Сонда кимсинъ сен? Ильяс?» «Йок», – деди ол. «Аьше, биз саклайтаган пайхамбарсынъма?» «Йок», – деп яваплады Яхъя.

²² «Кимсинъ, аьше, сен? – деп сорадылар олар тагы да, – бизди йибергенлерге биз явап этер уьшин оьзинънинъ акында неди айтарсынъ?» – дедилер.

²³ Яхъя Ешая пайхамбардынъ соьзлери мен яваплады: «Мен шоьлде: „Раббийге йолды туьз этинъиз“, – деп, шакыратаганнынъ давысыман».

²⁴ Йиберилгенлер парисей куьбиннен эдилер.

²⁵ Яхъяга: «Эгер сен не Масих, не Ильяс, не де биз саклайтаган пайхамбар болмасанъ, сонда сен не уьшин аьдемлерди сувда шомылдырып тазалайсынъ?» – деп сорадылар.

²⁶ Яхъя: «Мен сизди сув ман тазалайман, ама сизинъ аранъызда Сол, сиз энди де билмейтаган, турады.

²⁷ Меннен сонъ Келеек – Ол. Мен Онынъ шарыкларынынъ бавын шешпеге де тийисли тувылман», – деди.

²⁸ Бу ислер Яхъя аьдемлерди шомылдырып тазалайтаган Йордан сувынынъ аргы ягасындагы Бетхинийде бола эдилер.

²⁹ Эртеси куьн Яхъя ога келеятырган Исады коьрди эм: «Мине Алладынъ Козысы, дуныядынъ куьнасын Оьзине алатаган!

³⁰ Мен Онынъ акында айткан эдим: „Меним артымнан меннен йогары туратаган бир Аьдем келеди“.

³¹ Мен Оны оьзим танымаганман, ама Оны Исраилге коьрсетер уьшин, мен аьдемлерди сувда шомылдырып тазаламага келгенмен», – деди.

³² Яхъя соьзлерин деп беркитти: «Мен Алла Рухынынъ коьктен коьгершин кебинде Ога туьскенин эм Онынъ уьстинде калганын коьргенмен.

³³ Мен Оны танымас та болар эдим, эгер мени аьдемлерди сувда шомылдырып тазаламага йиберген Алла мага айтпаса: „Кимге туьсип эм Кимде Рух токталганын коьрсенъ, Сол аьдемлерди Кие Рух пан тазалаяк“.

³⁴ Мен Оны коьрдим эм Ол Алладынъ Улы экенлигине шаатлык этемен», – деди.

Исадынъ биринши сокталары

³⁵ Экинши куьн Яхъя оьз сокталарынынъ экеви мен тагы да онда тура эди.

³⁶ Келеятырган Исады коьрип, ол: «Мине Алладынъ Козысы!» – деди.

³⁷ Яхъядынъ сокталарынынъ экеви, бу соьзлерди эситип, Исадынъ артыннан иерди.

³⁸ Иса бурылды да олардынъ Онынъ артыннан келеятырганын коьрип: «Неди излейсиз?» – деп сорады. «Равви, Сен кайда яшайсынъ?» – дедилер. Равви соьздинъ маьнеси «устаз».

³⁹ «Келинъиз, оьзинъиз коьрерсиз», – деди Иса. Олар барып Иса яшаган ерди коьрдилер эм ол куьн Оны ман турдылар. Оныншы саьатке ювыклаган эди.

⁴⁰ Яхъядынъ айткан соьзлерин эскергенлердинъ биреви Шимон Петердинъ кардашы Эндрей эди.

⁴¹ Ол, оьзининъ кардашы Шимонды коьрип, ога: «Биз Масихти таптык!» – деди. Масих соьздинъ маьнеси «майланган».

⁴² Оны да Исага етип аькелди. Иса Шимонга карап: «Шимон, Юныс улы, сени Кефа деп атаяклар», – деди. Кефа аттынъ маьнеси «тас».

Иса Пилип пен Натанелди шакырады

⁴³ Экинши куьн Иса Галилеяга бармага токтасты. Ол Пилипти табып: «Мени мен кел!» – деди.

⁴⁴ Пилип сол Эндрей мен Петердинъ шахары Бетсайдадан эди.

⁴⁵ Ол Натанелди тапты да: «Биз Мусага буйырылган Тауратта язылганга, пайхамбарлар язганга растык. Ол – назаретши Иса, Юсуптынъ улы», – деди.

⁴⁶ Натанел: «Аьше, Назареттен бир ийги зат боларма экен?» – деп, яваплады. «Бар да кара», – деди Пилип.

⁴⁷ Иса оьзине келеятырган Натанелди коьргенде: «Мине акыйкат исраилши, онда бир кишкей кылыплылык та йок», – деди.

⁴⁸ «Мени Сен кайдан билесинъ?» – деди Натанел. Иса явапка: «Сени Пилип шакырганга дейим, Мен сенинъ ынжыр теректинъ туьбинде олтырганынъды коьргенмен», – деди.

⁴⁹ Сол вакытта Натанел айтты: «Устаз, Сен уьшини мен де Алла Улысынъ, Исраил патшасысынъ!»

⁵⁰ «Сен, Мен сени ынжыр теректинъ туьбинде коьргенмен дегеним уьшин, ынанасынъ. Сен оннан да уьйкен затларды коьрерсинъ», – деди Иса.

⁵¹ «Сизге дурысын айтаман: сиз ашылган коьклерди эм Аьдем Улына туьсеятырган эм коьтерилеятырган Алла маьлеклерин коьрерсиз», – деп, тагы да косты.