Урымшылар 9 - Инжил

Алладынъ сайлаганлары

¹ Масихке байыр болган биревге тийислисинше, туврасын айтаман, оьтирик соьйлемеймен. Кие Рух аькимлигинде болган ырызым да – ога шаат.

^2-3 Кайгым меним бек уьйкен, юрегимде тынмаган бир авырув бар. Кардашларымнынъ, ырувдасларымнынъ орнына мен оьзим Алла тарабыннан язаланып, Масихтен айырылганымды да тилер эдим.

⁴ Олар – исраилшилер: Алла оларды Оьзининъ уллары этти, данъкын коьрсетти, олар ман антласувлар беркитти, Тауратты, табынув йорыкларды, ваьделерди берди.

⁵ Уллы ата-бабалар – олардынъ аталары, Масих те олардынъ ырувыннан тувган. Ол – баьрисиннен де уьйкен, оьмирге де шуькирге тийисли Алла. Амин.

⁶ Ама Алла Оьзининъ соьзин толтырмады деп, айтпайман. Исраилшилердинъ баьриси де шынты Исраил тувыллар.

⁷ Эм Ибрагимнинъ тувдыкларынынъ баьриси де онынъ балалары тувыллар. (Алла ога айткандай:) «Сенинъ тувдыкларынъ тек Исхактан тувганлар болаяклар».

⁸ Суьйткенде, табиат йорыгы бойынша тувганлар болмай, Алладынъ ваьдеси бойынша тувганлар Онынъ балалары деп саналаяклар.

⁹ Неге десе Алла: «Мен келеек йыл бу вакытта кайтаякпан, Сарада ул болаяк», – деген соьзлер мен ваьде эткен.

¹⁰ Бу да сонъы тувыл. Ата-бабамыз Исхактан пишеси Рабият эгизлер мен авыраяклы болды.

^11-12 Балалар аьле де тувмай не ийгилик, не де яманлык этпеген заманларында, Алла Рабиятка: «Уьйкенинъ кишкейинънинъ кулы болаяк», – деген. Соьйтип, Алла эгизлерден бирин сайлаганы ман Оьзининъ мырады олардынъ этеек бир затына таянмаганын эм Оьзи кимди суьйсе, соны шакырганын коьрсетти.

¹³ Кие Язувда айтылгандай: «Мен Эсавды тувыл, Якупты суьйдим».

¹⁴ Муннан кайдай ой шыгараяк? Алла аьдилликсизбе? Эш болмаяк!

¹⁵ Алла Мусага: «Кимди языксынмага суьйсем, соны языксынарман. Кимди ярлыкамага суьйсем, соны ярлыкарман», – деген.

^16-17 Соьйтип, аьдемнинъ сайланганы оьзининъ тилеклерине эм куьресуьвине тувыл, а Алладынъ языксынувына байланады. Кие Язувда Алла пергаунга: «Сен аркалы куьдиретимди коьрсетер эм атымды буьтин дуныяга белгили этер уьшин сени патша эттим», – дейди.

¹⁸ Соьйтип, Алла кимди суьйсе, соны языксынар, суьйгенин де ийнат этип кояр.

¹⁹ Сен меннен: «Аьше, сол заманда Ол кимди болса биревди калай шуьшлер? Ким Онынъ ыхтыярына карсы шыгар?», – деп сорарсынъ.

²⁰ Аьдем, Алла ман эриспеге сен ким болгансынъ? Исленген зат оны ислегенге: «Сен мени булай неге эткенсинъ?» – деп айтаякпа?

²¹ Шоьлмекшидинъ бир ок балшыктан эм де баалы, эм де ушшыз шоьлмек этпеге эркинлиги йок па, аьше?

²² Алла, Оьзининъ ашувын коьрсетпеге эм куьдиретин билдирмеге суьйип, йойылмага белгиленген, ашувына тийисли шоьлмеклерге уьйкен сабырлык пан тоьзген болса, не айтаяк?

²³ Алла данъклы болмага аьзирлеген эм языксынаяк аьдемлерине Оьзининъ данъклы байлыгын билдирер уьшин солай эткен болса, не айтаяк?

²⁴ Эм сол аьдемлер – бизбиз. Ол бизди тек ювытлардан тувыл, баска миллетлилерден де шакырды.

²⁵ Ошея пайхамбардынъ китабында Алла билдиргендей: «Меним халкым болмаганды Оьз халкым деп, суьйикли болмаганды суьйиклим деп, айтарман.

²⁶ Эм тап сол: „Меним халкым тувылсынъыз“, – деп айтылган ерде, олар яшав беруьвши Алладынъ уллары деп те аталаяклар».

²⁷ Ешая пайхамбар Исраил акында булай кышкырып айтады: «Исраил улларынынъ саны денъиз ягасындагы кумдай болса да бек азы куткарылаяк.

²⁸ Неге десе Раббий ер юзинде Оьзининъ шалт эм кескин оькимин толтыраяк».

²⁹ Ешая эртеден айтканындай: «Эгер дейим Куьдиретли Раббий бизге бир-неше тувдык калдырмаган болса, биз Содомдай болар, Гоморага усар эдик».

Исраилдинъ имансызлыгы

³⁰ Энди не зат айтайым? Алладан акланувды излемеген баска миллетлилер акланувды алдылар. Иманлары ман акланадылар.

³¹ Ама Таурат аркалы акланувды излеген исраилшилер Тауратты толтырмага етисалмадылар.

³² Неге етисалмадылар? Неге десе акланувды, иманга тувыл, оьзлерининъ эткен ислерине таянып, изледилер. Солай этип олар «абынув тасына» суьриндилер.

³³ Кие Язувда булай язылган: