Урымшылар 16 - Инжил

Тилеклер мен саламлар

¹ Кенкрия иман ямагатынынъ ярдамшыларыннан бири болган (иман) карындасымыз Фиба ман сизди таныстырмага суьемен.

² Аллага багысланган аьдемлерге тийислише, оны Раббийдинъ аты ман кабыл этип алынъыз, бир кереклиси болса, ярдам этинъиз. Ол оьзи коьплерге ярдамласкан, олардынъ ишинде мен де барман.

³ Иса Масихке мени мен бирге кызмет кылган Приска ман (эри) Аквилага салам.

⁴ Олар меним уьшин яшавларын йоймага болаякларын биле турып, коркпадылар. Тек мен тувыл, а баьри баска миллетлилердинъ иман ямагатлары оларга сав болынъыз деп айтадылар.

⁵ Меним саламымды олардынъ уьйинде йыйылатаган иман ямагатына да беринъиз. Асия элинде биринши болып Масихке ынанган баалы досым Эпенетке де салам беринъиз.

⁶ Сиз уьшин коьп ислеген Марияга салам.

⁷ Мени мен бирге тутнакта болган ырувдасларым Андроникке эм Юнияга салам. Олар элшилер арасында белгили аьдемлер эм Масихке меннен алдын ынанганлар.

⁸ Раббийдинъ йолында барган баалы досым Амплиятка да салам.

⁹ Мени мен бирге Масихке кызмет кылатаган Урбанга эм баалы досым Стахиске салам.

¹⁰ Масихке алаллыгы тергелген Апеллеске салам. Аристобулдынъ уьйдегилерине салам.

¹¹ Меним ювыгым Иродионга салам. Наркистинъ уьйдегилериннен Раббийге байыр болганларга салам.

¹² Раббий уьшин ислеген Трифена ман Трифосага салам. Раббий уьшин коьп кызмет кылган баалы Персидага салам.

¹³ Раббийдинъ сайлап алган кулы Руфка эм Руфтынъ мага да ана болган анасына салам.

¹⁴ Асинкритке, Флегонга, Эрмеске, Патробаска, Эрмаска эм олар ман бирге болган баска кардашларымызга салам.

¹⁵ Филологка эм Юлияга, Нерейге эм онынъ карындасына, Олимпаска эм оны ман бирге болган баьри имандасларымызга салам.

¹⁶ Бир биринъизди, Аллага багысланганларга тийислише оьбип, саламланъыз. Масихтинъ баьри иман ямагатларыннан салам.

¹⁷ Тилеймен, кардашлар, эрисуьвлер аькелген, сиз алган тувра окув ман келиспей, баскаларды йолдан тайдырган аьдемлерден сак болынъыз. Олардан эрек турынъыз.

¹⁸ Сондай аьдемлер Раббийимиз Масихке тувыл, оьзлерининъ асказанына куллык этедилер. Анъкылдакларды аьруьв соьзлери мен, комлавлары ман алдайдылар.

¹⁹ Раббийге тынълаганынъызды баьриси де биледи. Сога коьре мен сизинъ уьшин куванаман. Ама яхшылык ягыннан акыллы, яманлык яныннан аьйлесиз болувынъызды суьемен.

²⁰ Тынышлыктынъ булагы – Алла тезден ибилисти аягынъыздынъ астына таслаяк. Раббийимиз Исадынъ шапагаты сизи мен болсын.

²¹ Меним кызмет досым Тимотей сизге салам береди. Ювыкларым Лукий, Ясон, Сосипатер де салам бередилер.

²² Мен, сосы хатты кагытка туьсирген Тертий, Раббийге байыр бирев болып, сизди саламлайман.

^23-24 Уьйинде иман ямагаты йыйылатаган конакбайым Гай да салам йибереди. Шахар казнашысы Эрасттан эм кардашымыз Куарттан салам.

²⁵ Аллага данък! Мен яятаган Ийги Хабар – Иса Масих акында билдируьв аркалы, оьмирлик заманлардан бери тасаланып калган сырдынъ ашылувы ман сизинъ иманынъызды беркитпеге Алладынъ куьши бар.

²⁶ Сол сыр энди ярыкка шыкты эм оьмирлик Алладынъ эмирине коьре пайхамбарлардынъ язувлары аркалы, баьри миллетлерге, иман этип Аллага бойсынсынлар деп, билдирилди.

²⁷ Акыллылыктынъ булагы болган бир Аллага Иса Масих аркалы оьмирлерге данък болсын! Амин.