Урымшылар 14 - Инжил

Иманы берк болганлар ман болмаганлар

¹ Иманы берк болмаганды оьзинъизге алынъыз, тек онынъ караслары акында оны ман эриспенъиз.

² Айтпага, ким болса да бирев, баьри затты да ашамага болаяк деп, санайды. Баска бирев, иманы берк болмаган, тек ясылша ашайды.

³ Баьри затты ашаган ашамаганга мисетсинмей карамасын, ашамаган да ашаганды бетлемесин, неге десе оны Алла кабыл этти!

⁴ Ят кисидинъ кулын бетлемеге сен ким болгансынъ?! Сол кулдынъ тек Иеси тувра яде терис эткенин айтар. Эм сол кул тувра болып шыгар, неге десе Иесининъ оны тувра шыгармага куьши бар.

⁵ Бирев, куьнлердинъ ишинде маьнели куьнлер бар деп, санайды. Баска биревге баьри куьнлер де бирдей. Аьр ким де оьз акылы ынандыргандай этсин.

⁶ Бир куьнди айырып сыйлаган, Раббийди сыйлайды. Ашаган да Раббийди сыйлап, ашайды, неге десе ас уьшин Аллага шуькир этеди. Ашамаган да, Раббийди сыйлап, ашамайды. Ол да Аллага шуькир этеди.

⁷ Неге десе бирев де тек оьзи уьшин яшамайды, бирев де тек оьзи уьшин оьлмейди.

⁸ Эгер дейим биз яшайтаган болсак, Раббий уьшин яшаймыз. Эгер дейим оьле болсак, Раббий уьшин оьлемиз. Тири болсак та, оьли болсак та биз – Раббийдикимиз.

⁹ Неге десе Масих оьлилерге де, тирилерге де иелик суьрер уьшин оьлди эм янъыдан яшап баслады.

¹⁰ Суьйткенде, неге иман кардашынъды бетлейсинъ? Сен ше? Неге кардашынъды кем коьресинъ? Биз баьримиз де Алла оькимининъ алдына шыгаякпыз.

¹¹ Кие Язув айтады да: «Мен яшавым ман ант этемен, – дейди Раббий, – Меним алдымда аьр бир аьдем тизине шоьнъкеек, аьр бир тил Аллага мактав соьзин айтаяк».

¹² Соьйтип, аьр биримиз Алла алдында оьзи акында явап береек.

¹³ Энди бир биримизге оьким шыгармаяк. Онынъ орнына иман кардашынъызды састыргандай, йолдан тайдыргандай затлар этпеске карарлы болынъыз.

¹⁴ Оьз-оьзиннен бир ас та арам болмаганын билемен. Раббий Иса мени сога толы ынандырды. Ама аьдем оьзи бир затты арам деп санаса, сол зат ога арам болады.

¹⁵ Ама ашаган ырызкынъ кардашынъды кайгыртса, сол заманда суьюв йорыклары ман яшамайсынъ. Сол кардашынъды ырызкынъ ман йойма, онынъ уьшин Масих яшавын берген.

¹⁶ Соьйтип, сиз ийгилик деп санаган зат яманланмасын.

¹⁷ Неге десе Алладынъ патшалыгы ас-сув ишуьв тувыл, ол – туврашылык, тынышлык эм Кие Рух берген суьйиниш.

¹⁸ Эгер дейим инсан Масихке солай кызмет кылса, Аллады разы этеди эм аьдемлерге ярайды.

¹⁹ Солай этип биз тынышлык аькелген эм бир биримизди иман ягыннан куьшлендирген затларга ымтылмага керекпиз.

²⁰ Ас уьшин Алладынъ исин бузба. Баьри аслар – алал, ама ашаган асы ман баскаларды йолдан тайдыратаган аьдем яманлык этеди.

²¹ Кардашынъды йолдан тайдыраякка себеп болмас уьшин, энъ де ийгиси – эт те еме, шагыр да ишпе, баска затты да этпе.

²² Бу затлар акында неге ынансанъ, сол сени мен Алла арасында калсын. Ким тувра деп санаган затын этип, оьзин терис коьрмесе, сол – наьсипли.

²³ Ама ол, бир зат ашап болаякпа экен деп, шеклене турып, кене де ашаса, ога оьким кесилер, неге десе иманына коьре этпейди. Иман ман этилмеген аьр зат та – куьна.