Матай 4 - Инжил

Исадынъ сыналувы

¹ Оннан сонъ Алладынъ Рухы Исады ибилиске сынатпага шоьлликке аькетти.

² Онда кырк куьн эм кырк кеше ораза тутканнан сонъ Иса бек ашыкканын сезди.

³ Сонда азгырувшы Ога ювыкласып: «Сен Алладынъ Улы болсанъ, сосы тасларга оьтпек болмага буйыр», – деди.

⁴ Иса ога явапка: «„Аьдем тек бир оьтпек пен яшамаяк, ама Алладынъ авызыннан келген аьр соьз бен яшаяк“, – деп те язылган», – деди.

⁵ Оннан сонъ ибилис Исады кие шахарга алып келди. Оны Алла уьйининъ бийиклевине салып, Ога:

⁶ «Сен Алладынъ Улы болсанъ, туьбине атыл! Аьше: „Алла Сени Оьз маьлеклерине аманат этер“, эм „Олар, аягынъды таска да тийгистпей, Сени колларында аькетерлер“, – деп язылган», – деди.

⁷ Иса ога явапка: «Сондай болып: „Раббий Алланъды сынама“, – деп те язылган», – деди.

⁸ Сонъында ибилис Исады айлак бийик тавга алып келди, оннан Исага дуныядынъ баьри эллеринде болган ярасыклыкларды коьрсетти:

⁹ «Эгер Сен аягыма йыгылып, мага бас ийсенъ, солардынъ баьрисин де Сага берермен», – деди.

¹⁰ Иса ога явапка: «Меннен тай, шайтан! „Раббий Алланъа бас ий эм тек Ога кылын“, – деп язылган», – деди.

¹¹ Сонда ибилис Оны калдырды. Исага маьлеклер келип, Ога ярдам эттилер.

Иса Ийги Хабарды айтып баслайды

¹² Яхъядынъ тутнакка салынганын эситкенде, Иса Галилеяга кайтты.

¹³ Ол Назаретти калдырды эм Завулон ман Напталийдинъ ерлериндеги коьлдинъ касында орынласкан Капарнаумда ерлести.

¹⁴ Соьйтип, Ешая пайхамбардынъ билдирген йорувы толтырылды:

¹⁵ «Денъизге баратаган йолдагы, Йордан сувынынъ аргы ягындагы Завулон ман Напталий ери, баска миллетлер турувшы Галилея!

¹⁶ Каранъалыкта яшайтаган халк уллы ярык коьрди. Оьлим куьлеткисининъ кушагындагы кыралда яшайтаганларга саьвле яркырады».

¹⁷ Сосы вакыттан алып Иса: «Тевбе этинъиз, Алладынъ Патшалыгы энди ювыкта», – деп, Алладынъ соьзин айтып баслады.

Исадынъ биринши сокталары

¹⁸ Бир кере Галилея коьлининъ бойы ман бараятырганда, Иса эки кардашты коьрди: сонъында Петер деген ат берилген Шимонды эм онынъ кардашы Эндрейди. Олар балыкшы болып, тап сол вакытта коьлге йылымды атып туры эдилер.

¹⁹ «Мени мен келинъиз, – деди оларга Иса, – Мен сизди, балык ыслагандай, аьдем коьнъилин авламага уьйретермен!»

²⁰ Кардашлар, сол саьатлей йылымларын калдырып, Исадынъ ызыннан кеттилер.

²¹ Бираз барганнан сонъ, Ол Зебедей уллары Якуп пан Яхъяды коьрди. Кайыкта аталары Зебедей мен йылымларын ямай эдилер. Иса оларды да шакырды.

²² Сол саьатлей олар, кайыгын да, аталарын да калдырып, Исадынъ артыннан иердилер.

Исадынъ халкка кылынувы

²³ Иса буьтин Галилеяды айланды, синагогларда окытты, Алла Патшалыгынынъ акында Ийги Хабарды айтып юрди эм аьдемлерди туьрли авырувлардан эм сакатлыклардан сав этти.

²⁴ Онынъ хабары буьтин Сирияга яйылды. Исага кайдай туьрли маразлыларды да аькелетаган болдылар: куьшли авырувдан кыйналатаганларды, йинлилерди, талма маразлыларды, паралич сокканларды. Эм Ол баьрисин де савартатаган эди.

²⁵ Исадынъ ызыннан, топарласып, Галилеядан, Декаполистен, Ерусалимнен, Юдеядан эм Йорданнынъ артындагы ердинъ тоьгерегиннен коьп аьдемлер келе эдилер.