Матай 27 - Инжил

¹ Танъ атканда баьри бас дин куллыкшылар ман халктынъ аксакаллары Исады оьлтирмеге деген токтас алдылар.

² Исады байлап, тоьре Пилатка аькетип бердилер.

Юда оьзин оьзи асады

^3-4 Исады саткан Юда, Ога оьким шыгарылатаганын коьрип, оькинип, отыз куьмисти бас куллыкшыларга эм аксакалларга кайтарып: «Туврашыл бир Аьдемнинъ канын сатып, куьналы болдым», – деди. Олар Юдага: «Бизим онда не ишимиз бар? Оьзинъ кара», – дедилер.

⁵ Юда куьмислерди Алла уьйинде ерге таслап, шыгып кетти де оьзин оьзи асты.

⁶ Бас дин куллыкшылар куьмислерди алып: «Кан ишкен бу куьмислерди Алла Уьйининъ казнасына салмага тийисли тувыл», – дедилер.

⁷ Кенъес этип, сол акшага, онда тыс элден келген аьдемлерди коьмуьв уьшин, шоьлмекшидинъ данъылын сатып алдылар.

⁸ Сонынъ уьшин бу данъыл буьгуьнге дейим «Канлы данъыл» деп аталады.

⁹ Соьйтип, Еремия пайхамбардынъ: «Олар отыз куьмис акшады – Исраил халкы сол Аьдем уьшин берген баады – алдылар.

¹⁰ Раббийдинъ мага айтканынша, „сол акшады шоьлмекшидинъ данъылы уьшин бердилер“ дегени толтырылды».

Иса тоьре Пилаттынъ алдында

¹¹ Иса тоьрединъ алдында турды. Тоьре Ога: «Сен Ювыт Патшасысынъма?» – деп сорады. Иса ога: «Сен айткандай», – деди.

¹² Бас дин куллыкшылар ман аксакаллар Оны айыплаган да, Ол бир явап та бермеди.

¹³ Пилат Ога: «Сени калай коьп шуьшлеп шаатлык эткенлерин эситесинъме?»

¹⁴ Иса онынъ бир соьзине де явап этпеди, тоьре ога бек сейирсинди.

¹⁵ Халктынъ тилеги мен аьр Пасха байрамга тоьрединъ тутнакта олтырганлардынъ бирисин босататаган аьдети бар эди.

¹⁶ Сол вакытта олардынъ Барабба деген бир белгили кыянатшысы тутнакта олтыра эди.

¹⁷ Олар йыйылганда, Пилат: «Мен сизге кимди босатсам суьесиз – Бараббады ма яде Масих атлы Исады ма?» – деди.

¹⁸ Неге десе Пилат олардынъ Исады куьншилик пен ыслап бергенлерин билетаган эди.

¹⁹ Пилат оьким еринде олтырып турган заманда, хатыны ога: «Ол туврашыл Аьдемге бир зат этпе, неге десенъ мен бу кеше туьсимде Онынъ уьшин коьп кыйналганман», – деп айтып, аьдем йиберген.

²⁰ Ама бас дин куллыкшылар ман аксакаллар: «Бараббады босат, Исады оьлтирт», – деп тилемеге халкты козгадылар.

²¹ Сол заманда тоьре оларга: «Сиз экевининъ кайсысын эркин этсем суьесиз?» – деп сорады. Олар «Бараббады», – дедилер.

²² Пилат оларга: «Солай болса Масих атлы Исага мен не этейим?» – деди. Баьри де: «Кашка керилсин!» – дегенди айттылар.

²³ Тоьре: «Не уьшин? Ол не яманлык эткен?» – деди. Олар: «Кашка керилсин!» – деп оннан да бек кышкырыстылар.

²⁴ Пилат не этсе де болмаягын, козгалув уьйкен болып барганын коьрди. Сув алып, халктынъ алдында колларын ювды да: «Бу туврашыл Аьдемнинъ канынынъ тоьгилуьвинде меним шуьшим йок, оьзинъиз каранъыз», – деди.

²⁵ Баьри халк явап этип: «Онынъ каны бизге эм балаларымызга туьссин!» – дедилер.

²⁶ Сонда Пилат оларга Бараббады босатты, Исады болса камышылатып, кашка керилсин деп, (аскершилерге) тапшырды.

Аскершилердинъ мыскыллавлары

²⁷ Тоьрединъ аскершилери Исады Преториумга аькетип, савлай аскерши боьлигин Онынъ тоьгерегине йыйдылар.

²⁸ Оны шешиндирип, Ога кызыл аба кийдирдилер.

²⁹ Шоькирли коьгем бутакларыннан таж оьрип, Онынъ басына салдылар, Онынъ онъ колына таяк бердилер, сонъ алдына шонъкайып, Оны мыскыллап: «Яшасын Ювыт Патшасы!» – деп кышкырдылар.

³⁰ Ога туькирдилер эм таягын алып басына соктылар.

³¹ Оны мыскыллаганларыннан сонъ, уьстиннен кызыл абады шешип, Оьзининъ кийимлерин кийгисттилер де кашка кермеге алып кеттилер.

Исады кашка керуьв

^32-33 Йолда олар Шимон атлы бир киренешиге расып, Исадынъ кашын ога коьтертип, маьнеси «Бас суьек ер» болган Голготага аькеттирдилер.

³⁴ Исага ишпеге ювсан карыстырылган шагырды бердилер. Иса, оны увыртлап карап, ишпеге унамады.

³⁵ Аскершилер Оны кашка кергеннен сонъ, сыбага таслап, Онынъ кийимлерин боьлистилер.

³⁶ Сонъ онда олтырып, Исады каравыллап турдылар.

³⁷ Басынынъ уьстине, Онынъ шуьшин билдирип, «Бу – Ювыт Патшасы Иса» деген язув илдилер.

³⁸ Иса ман бирге эки йолбасарды да кашка кердилер: бирин – Онынъ онъ ягына, экиншисин – сол ягына.

³⁹ Озып бараятканлар, басларын шайкап, Исады яманлап:

⁴⁰ «Эй Сен, Алладынъ уьйин бузып, уьш куьнде янъыдан туьзуьвши! Оьзинъ-Оьзинъди куткар! Сен Алладынъ Улы болсанъ, каштан туьс!» – дедилер.

⁴¹ Сондай этип бас дин куллыкшылары да дин аьлимлери, аксакаллар, парисейлер мен бирге селеке этип:

⁴² «Баскаларды куткаратаган эди, а Оьзи Оьзин куткаралмайды! Исраилдинъ Патшасы Ол болса, энди каштан туьссин, сонъ биз Ога ынанармыз.

⁴³ Аллага сенген эди: Алла Ога разы болса, энди Оны куткарсын! Ол „Мен Алладынъ Улыман“ деп айткан, сайсы», – дедилер.

⁴⁴ Солай этип, Иса ман кашка керилген йолбасарлар да Оны корладылар.

Исадынъ оьлими

⁴⁵ Алтыншы саьаттен тогызыншы саьатке дейим буьтин кырал уьстин каранъалык бийледи.

⁴⁶ Тогызыншы саьатке ювык заманда, Иса уьйкен давыс пан: «Элохи, Элохи! Лема шавактани?» – деп кышкырды. Бу соьзлердинъ маьнеси: «Аллам, Аллам! Сен Мени неге атып койдынъ?»

⁴⁷ Сол ерде турганлардан бир кавымлары муны эситип: «Ильясты шакырады», – дедилер.

⁴⁸ Олардан бирев сол саьат ювырып барып, губкады алды да, оны ашыган шагырга малды да таякка тагып, Исага ишпеге берди.

⁴⁹ Баскалары: «Токта, Ильяс Оны куткармага келеек болса коьреек», – дедилер.

⁵⁰ Иса яне куьшли давыс пан кышкырып, ян берди.

⁵¹ Сол вакыт Алла уьйиндеги перде йогардан тоьменге дейим йыртылып экиге айырылды; ер де сенъкилдеди, каялар да ярылдылар.

⁵² Кабырлар да ашылып, оьзлерин Аллага багыслаган, оьлген аьдемлердинъ коьбиси тирилдилер.

⁵³ Иса тирилгеннен сонъ, олар кабырларыннан шыгып, кие шахарга (Ерусалимге) кирип, коьплерге коьрингенлер.

⁵⁴ Юзбасшы эм оны ман бирге Исады саклаганлар ер сенъкилдегенин эм баьри болган затларды коьргенде, бек коркып: «Шынтылай да Бу Алладынъ Улы болган экен!» – дедилер.

⁵⁵ Сол ерде эректен карап турган коьп хатынлар бар эди. Булар Галилеядан шыгып, Исага ярдам этпеге ызыннан келген эдилер.

⁵⁶ Олардынъ арасында магдалашы Марьем, Якуп пан Юсуптынъ анасы Марьем эм Зебедей улларынынъ анасы бар эдилер.

Исады кабырга салув

⁵⁷ Кеш болганда Исадынъ сокталарынынъ бири, араматияшы Юсуп атлы бир бай аьдем, келди.

⁵⁸ Ол Пилаттынъ янына барып, Исадынъ илесин тиледи. Пилат оьлиди бермеге буйырды.

⁵⁹ Юсуп илести алып, оны таза кетен кумаш пан кебинледи,

⁶⁰ Сонъ оьзининъ каяда уьнъилип этилген янъы кабырына салды, кабырдынъ авызын, уьйкен тас авдарып, япты.

⁶¹ Магдалашы Марьем мен баска Марьем де онда эдилер. Олар кабырдынъ касында олтырып турдылар.

Кабырда саклавшылар

⁶² Юмадынъ эртеси куьнинде бас дин куллыкшылар ман парисейлер Пилатка йыйылып:

⁶³ «Аьпенди! Сол алдавшыдынъ сав заманында, „Уьш куьннен сонъ тирилеекпен“ деп, айткан соьзи эсимизге туьсти.

⁶⁴ Сол себептен уьшинши куьнге дейим кабырын сакламага буйырык бер. Сокталары кеше келип, Оны урлап, халкка „оьлилерден тирилген“ деп айтпасынлар. Сол заманда арттагы алдавы, алдынгыннан да яман болар», – дедилер.

⁶⁵ Пилат оларга: «Саклавшыларынъыз бар. Барынъыз, билгенинъизше сакланъыз», – деди.

⁶⁶ Олар барып, кабырдынъ алдына саклавшыларды салдылар, кабырдынъ тасына да мухыр бастылар.