Матай 24 - Инжил

Ахырзаманнынъ нышанлары

¹ Сонъ Иса Алла уьйининъ каралдысыннан шыгып кетеятырганда, Онынъ сокталары сол уьйдинъ меканларын коьрсетер уьшин, касына келдилер.

² Иса: «Булардынъ баьрин де коьресизбе? Сизге дурысын айтаман: мунда тас уьстинде тас та калмаяк, баьриси де шашылаяк», – деди.

³ Ол Зейтун тавынынъ бавырында олтырган заманда, сокталар оьзлери ялгыз Онынъ касына келип: «Бизге айттага, бу затлар кашан болаяк эм Сенинъ келуьвинъ мен бу оьмирдинъ ахыры кайдай нышан ман белгиленеек?» – деп тиледилер.

⁴ Иса явапка булай деди: «Сак болынъыз, ким де болсын бирев сизди адастырмасын.

⁵ Неге десе коьплер Меним атым ман: „Масих менмен“, – деп келееклер эм коьплерди адастыраяклар.

⁶ Согыслардынъ давысларын, согыслардынъ хабарларын эситерсиз. Каранъыз, коркпанъыз, неге десе бу затлар болмага керек, тек бу аьли де заманнынъ ахыры тувыл.

⁷ Миллет – миллетке, патшалык – патшалыкка коьтерилеек, туьрли ерлерде ашлыклар эм ер сенъкилдевлер болаяк.

⁸ Булардынъ баьриси де азаплардынъ биринши белгилери.

⁹ Сол заманда сизди азапка берееклер, оьлтирееклер эм де Меним атым уьшин сизди баьри миллетлер коьрип болмаяклар.

¹⁰ Сол заманда коьплер йолдан таяяклар, бир бирлерин сатаяклар эм бир бирлерин коьрип болмаяклар.

¹¹ Коьп ялган пайхамбарлар шыгаяклар, коьплерди адастыраяклар.

¹² Йорыксызлык коьбейген сайын коьплерде суьйим сувыяк.

¹³ Ама ким сонъына дейим шыдаса, сол куткарылаяк.

¹⁴ Эм де Алла Патшалыгынынъ бу Ийги Хабары буьтин дуныяда баьри миллетлерге шаатлыкка билдирилеек. Сол заман оьмирдинъ ахыры болаяк.

¹⁵ Соьйтип, Даниял пайхамбар айткан, аьлеклик аькелеек шийкендирген заттынъ кие ерде турганын коьргенинъизде – окувшы анъласын! –

¹⁶ сол вакытта Юдеядагылар тавларга кашсынлар.

¹⁷ Ким уьйининъ тоьбесинде болса, уьйиндеги затларды алар уьшин тоьменге туьспесин.

¹⁸ Ким кырда болса, абасын алар уьшин кери кайтпасын.

¹⁹ Сол куьнлерде авыраяклы хатынлар ман бала эмгисткен аналарга бек кыйын болаяк.

²⁰ Кашкынлыгынъыз кыста яде шабат куьн болмасын деп, дува этинъиз.

²¹ Неге десе ол заманда дуныядынъ басыннан алып соьлеге дейим болмаган, муннан сонъ да болмаяк уллы кайгы келеек.

²² Сол куьнлер кыскартылмаган болса, бир аьдем де куткарылмас эди. Ама сайланганлар уьшин сол куьнлер кыска этилинеек.

²³ Сол вакытта ким болса да сизге: „Масих мине мунда!“ яде „Масих онда!“ – десе, ынанманъыз.

²⁴ Неге десе ялган масихлер эм ялган пайхамбарлар шыгаяклар. Амал болса, сайланганларды да адастырув уьшин уллы нышанлар коьрсетип, аьжейип ислер этееклер.

²⁵ Каранъыз! Мен сизге алдыдан айттым.

²⁶ Сонынъ уьшин: „Мине, Ол шоьлде“ деселер, шыкпанъыз. „Мине, Ол уьй ишинде“ деселер, ынанманъыз.

²⁷ Неге десе айындырык куьнтувардан келип, куьнбатарда да коьрингендей, Аьдем Улынынъ келгени де солай ок болаяк.

²⁸ Илес кайда болса, кувалдылар да сонда йыйылар.

²⁹ Сол кайгылы куьнлерден сонъ ок, куьн каранъаланаяк эм ай оьзининъ ярыклыгын бермеек. Юлдызлар коьктен туьсееклер, коьктеги куьшлер шайкалаяклар.

³⁰ Сол вакытта коькте Аьдем Улынынъ нышаны коьринеек эм баьри ер уьстиндеги ырувлар йылаяклар. Олар коьктеги булытлардынъ уьстинде куьдирети эм уллы данъкы ман келеятырган Аьдем Улын коьрееклер.

³¹ Ол Оьзининъ маьлеклерин уьйкен давыслы зурна ман йибереек; олар Онынъ сайлаганларын дуныядынъ доьрт ягыннан, коьктинъ бир шетиннен ана бир шетине дейим йыяяклар».

Ынжыр теректинъ дериси

³² «Ынжыр теректен дерис алынъыз: онынъ бутаклары юмсайып, япыраклар йибергенде, энди яз ювыклаганын билесиз.

³³ Соьйтип, сиз де бу затлардынъ баьри де болатаганларын коьргенде, (сол заман) ювыкта, эсик алдында, экенин билинъиз.

³⁴ Сизге дурысын айтаман: бу несил йогалып кетпей, бу затлардынъ баьриси болаяк.

³⁵ Коьк пен ер йогалып кетерлер, тек Меним соьзлерим йогалмаслар».

Куьни эм саьати белгисиз

³⁶ «Сол куьннинъ эм саьаттинъ акында бирев де билмейди: не коьктеги маьлеклер, не Улы, тек Ата биледи.

³⁷ Нухтынъ куьнлери калай болган болса, Аьдем Улынынъ келгени де солай ок болаяк.

³⁸ Нух кемеге минген куьнге дейим, аьдемлер сав дуныяды сув алаяктан алдын ашадылар, иштилер, хатын алып, киевге бардылар.

³⁹ Сав дуныяды сув алып, баьрисин де йок эткенге дейим, аьдемлер келеекте не болаягы акында ойланмадылар. Аьдем Улы келгенде де сосындай болаяк.

⁴⁰ Ол заманда эки аьдем далада болаяк: бири алынаяк, экиншиси калдырылаяк.

⁴¹ Эки хатын туьйирмен тартып тураяк: бири алынаяк, экиншиси калдырылаяк.

⁴² Сонынъ уьшин сак болынъыз, уйкламанъыз, неге десе Раббийинъиздинъ кайсы саьатте келеегин билмейсиз.

⁴³ Ама муны билинъиз: эгер уьйдинъ иеси урлавшыдынъ кайсы заманда келеегин билген болса, уйкламай сак болып, уьйин тонатпас эди.

⁴⁴ Сол себептен сиз де аьзир болып турынъыз, неге десе Аьдем Улы сиз куьтпеген вакытта келер.

Сенимли эм сенимсиз кул

⁴⁵ Сенимли эм акыллы кул ким экен? Ол – бийи ыргатларына тамадалык этип, заманында оларга ас уьлестирмеге деп салган кул.

⁴⁶ Бийи келип, кулын солай ислегенлей тапса, сол кул – бактылы.

⁴⁷ Сизге дурысын айтаман, бийи ога буьтин мал-муьлкине тамадалыкты тапшырар.

⁴⁸ Ама сол кул, огырсыз болганнан себеп, ишиннен „Бийим тезден келмес“ деп,

⁴⁹ оьзининъ йолдасларын тоьбелеп, ишкишилер мен ашап, ишип басласа,

⁵⁰ сол кулдынъ бийи, ол куьтпей турган куьнде эм ойламаган саьатте келер,

⁵¹ оны бек каты язалар эм экиюзлилер мен бирдей этер. Онда йылав эм тислерди кыршылдатув болар».