Матай 22 - Инжил

Неке кыюв тойдынъ акында таварых

¹ Иса халкты таварыхлар ман уьйреткенин бардыра берди:

² «Алладынъ Патшалыгы улына неке кыюв той эткен бир патшага усайды.

³ Ол оьзининъ кулларын неке кыюв тойга конакларды шакырмага деп йиберген, тек олар келмеге унамаганлар.

⁴ Сонда ол: „Мине зияпетимди аьзирледим: бугаларым, асыраган бузавларым сойылган, баьри де аьзир, неке кыюв тойга келинъиз деп, конакларга билдиринъиз“, – дегенди айтып, баска кулларын йибереди.

⁵ Олар болса, шакырувга эс бермей, кими сабанына, кими сатув-алувына кетедилер.

⁶ Баскалары онынъ кулларын ыслап тоьбелейдилер эм оьлтиредилер.

⁷ Оны эситкенде, патша ашувланып, оьзининъ аскерин йибереди, кыянатшыларды оьлтиртеди, шахарларын да яктыртады.

⁸ Сонъ кулларына: „Той асы аьзир, а шакырылганлар ога тийисли болмадылар,

⁹ Сиз энди йоллар айкаскан ерлерге барынъыз, сонда кимди тапсанъыз да, баьрисин де неке кыюв тойга шакырынъыз“, – дейди.

¹⁰ Соьйтип куллар, йолларга шыгып, баьри тапкан аьдемлерин: яманларды да, яхшыларды да йыядылар эм той уьйи конаклардан толады.

¹¹ Патша конакларга карамага кирип, онда той кийим киймеген бир аьдемди коьрип,

¹² Ога: „Дос! Той кийимсиз сен мунда калай киргенсинъ?“ – дейди. Киси уьндемейди.

¹³ Ол заманда патша куллыкшыларына: „Онынъ колларын, аякларын байлап, тыс каранъалыкка тасланъыз. Онда аьдемлер йылап, тислерин кыршылдатаяклар“, – дейди.

¹⁴ Сога коьре, шакырылганлар коьп, сайланганлар аз».

Урым императорына ясак

¹⁵ Сонъ парисейлер кетип, Исады соьзлери мен кайтип ыслайык экен деп, кенъес эттилер.

¹⁶ Олар Исага оьзлерининъ сокталарын эм патша Иродтынъ аьдемлерин йиберип: «Устаз! Сен туьз соьзли болып, Алладынъ йолына туьз уьйреткенинъди билемиз. Ким де болсын онынъ ойлаганына эс бермейсинъ, неге десе кимге де болсын сога ярамага куьреспейсинъ.

¹⁷ Айт бизге: Сен кайтип ойлайсынъ? Кесарга ясак тоьлемеге тийислиме яде тийисли тувылма?»

¹⁸ Иса болса олардынъ яман ниетлерин билип: «Неге сынайсыз Мени, экиюзлилер?

¹⁹ Ясакка берилетаган акшады Мага коьрсетинъиз», – деди. Исага бир динар аькелип бердилер.

²⁰ Иса: «Мунда кимнинъ суьврети эм кимнинъ аты язылган?» – деп сорады.

²¹ «Кесардыкы», – дедилер. Иса: «Солай болса, кесардыкын кесарга, Алладыкын Аллага беринъиз», – деди.

²² Муны эситкенлей, парисейлер сейирсинип, Исады калдырып кеттилер.

Тирилуьв акында сорав

²³ Оьлгенлер тирилмес деп айтатаган садукейлер сол куьн Исага келип, булай деп сорадылар:

²⁴ «Устаз! Муса (Тауратта): „Баласы болмай, ким оьлсе, кардашы онынъ пишесин алып, оьлген кардашы уьшин тукым тувдырсын“, – деп айткан.

²⁵ Бизде ети кардаш бар эди. Бириншиси уьйленди, баласы болмай, пишесин экинши кардашына калдырып, оьлип кетти.

²⁶ Экиншиси де, уьшиншиси де, етиншисине дейим де соьйтип болды.

²⁷ Баьрисининъ артыннан хатын да оьлди.

²⁸ Солай болганда кыямет куьнинде сол хатын кайсысынынъ пишеси болаяк экен? Неге десе ол баьрисининъ де пишеси болган».

²⁹ Иса оларга явапка: «Не Кие Язувларды, не Алладынъ куьдиретин билмейсиз, онынъ уьшин янъыласыз.

³⁰ Неге десе тирилгеннен сонъ уьйленеек те, байга бараяк та тувыллар, олар Алладынъ коьктеги маьлеклериндей болаяклар.

³¹ А оьлгенлердинъ тирилуьви акында Алладынъ сизге айтканын окымагансызба?

³² Алла: „Мен Ибрагимнинъ, Исхактынъ эм Якуптынъ Алласыман“ деген. Алла оьлгенлердинъ тувыл, тирилердинъ Алласы», – деди.

³³ Халк соны эситкенде, Онынъ уьйретуьвине сейирсинди.

Энъ маьнели парыз

³⁴ Парисейлер, Иса садукейлердинъ авызларын тыйганын эситкенлей, бирге йыйылдылар.

³⁵ Сонъ олардынъ бири, Таурат аьлими, Оны сынап:

³⁶ «Устаз! Тауратта энъ маьнели парыз кайсы?» – деп сорады.

³⁷ Иса ога: «„Раббий Алланъды буьтин юрегинъ, янынъ, акылынъ ман суьй“.

³⁸ Бу – биринши эм де энъ маьнели парыз.

³⁹ Экиншиси ога усайды: „Ювыгынъды оьзинъди суьйгендей суьй“.

⁴⁰ Савлай Таурат та, пайхамбарлардынъ окувлары да бу эки парызга негизленедилер».

Масих кимнинъ улы?

⁴¹ Парисейлер йыйылганда Иса:

⁴² «Масихтинъ акында сиз кайтип ойлайсыз? Ол кимнинъ Улы?» – деп сорады. Ога: «Дауттынъ», – дедилер.

⁴³ Иса: «Аьше неге Даут, Кие Рух пан коьнъилленип, Ога „Бий“ дейди?» – деп сорады. –

⁴⁴ «Даут: „Раббий меним Бийиме: Мен душпанларынъды аягынънынъ астына салганга дейим онъ янымда олтыр, деп айткан“, – деди.

⁴⁵ Соны ман, Даут Оны „Бий“ деп атайтаган болса, Ол Дауттынъ улы калай болар?»

⁴⁶ Сонъ бир аьдем де Исага бир соьз де айталмады. Сол куьннен баслап бир аьдем де Ога сорав бермеге йигери батпады.