Матай 20 - Инжил

Юзим бавдагы исшилер акында таварых

¹ «Алладынъ Патшалыгы эртенъ мен эртенъликте юзим бавына ялшылар алмага шыккан уьй иесине усайды.

² Ол исшилер мен, бир куьнге бирер динар тоьлемеге деп, ярасып, оларды оьзининъ юзим бавына йиберди.

³ Уьшинши саьатке ювыклаганда ол шыгып, майданда бос турган баска аьдемлерди коьрди.

⁴ Оларга да: „Келинъиз сиз де Меним юзим бавыма, сизге тийислисин берермен“, – деди. Олар бардылар.

⁵ Тагы да алтыншы эм тогызыншы саьатке ювыклаганда шыгып соьйтип этти.

⁶ Сонъында он биринши саьатке ювык заманда шыгып, бос турган баска аьдемлер тапты да оларга: „Сав куьнди сиз мунда бос неге турасыз?“ – деди.

⁷ Олар ога: „Бизди бирев де ялга алмаган“, – дедилер. Уьйдинъ иеси оларга: „Сиз де меним юзим бавыма келинъиз, куллыгынъызга коьре мен тоьлермен“, – деди.

⁸ Кас каралганда юзим бавынынъ иеси оьзининъ ис юргистуьвшисине: „Исшилерди шакыр да, сонъында келгенлерден баслап, бириншилерге дейим, олардынъ кыйын акларын бер“, – деди.

⁹ Он биринши саьатлерде келгенлер бирер динар алдылар.

¹⁰ Биринши болып келгенлер олардан коьп алармыз деп саклаган эдилер. Тек олар да бирер динар алдылар.

¹¹ Куллык акларын алганлай, олар уьйдинъ иесине разы болмаганларын айтып басладылар:

¹² „Бизден сонъ келгенлер бир саьат ислегенлер, а сен оларды бизи мен – куьннинъ кыздырувына тоьзип ислегенлер мен – тенъ эттинъ“, – дедилер.

¹³ Юзимши олардынъ биревине яваплап: „Досым, мен мунда янъылыс этпеймен: сен мени мен бир динарга яраспаганма эдинъ?

¹⁴ Оьзинъдикин ал да кет; мен бу арттагыларга да сага бергенимди бермеге суьемен.

¹⁵ Мен оьзимнинъ акшамды суьйгенимше кулланмага эркин тувылманма? Йок десе меним юмартлыгым уьшин куьнлейсинъме?“ – деди.

¹⁶ Арттагылар мине сондай алдыда, а алдыдагылар артта болаяклар».

Иса оьлип тирилеегин уьшинши кере билдиреди

¹⁷ Ерусалимге бара турганда Иса он эки соктасын йолдынъ бир янына шыгарып оларга:

¹⁸ «Мине биз Ерусалимге бараятырмыз. Онда Аьдем Улы бас дин куллыкшылары ман дин аьлимлерининъ колына берилеек. Олар Оны оьлтирмеге оьким шыгараяклар.

¹⁹ Оны маскаралап, камышыламага эм кашка кермеге баска миллетлилерге тапшыраяклар, тек Ол уьшинши куьнинде тирилеек», – деди.

Зебедей улларынынъ тилеги

²⁰ Сол заманда Зебедей улларынынъ анасы уллары ман Исадынъ касына келди. Ога бас ийип, тилеги бар экенин айтты.

²¹ Иса: «Сен не тилейсинъ?» – деди. Кыскаяклы: «Меним бу эки улыма Патшалыгынъда бирине онъ янынъда, экиншисине сол янынъда олтырмага разылыгынъды бер», – деп тилек салды.

²² Иса явапка: «Не тилегенинъизди билмейсиз. Мен ишеек аяктан ишпеге, Мен шомылдырылаяк сувда шомылдырылмага боларсызба?» Олар: «Болармыз», – дедилер.

²³ Сонъ Иса оларга: «Элбетте, Мен ишеек аяктан ишеексиз, [Мен шомылдырылаяк сувда шомылдырылаяксыз]. А онъ янымда эм сол янымда олтырувга эркинлик беруьв Меним колымда тувыл. Ол орынлар Атам кимлерге аьзирлеген болса, соларга байыр», – деди.

²⁴ Муны эситип, калган он сокта эки кардашка ашувландылар.

²⁵ Иса оларды касына шакырып, булай айтты: «Сиз билесиз, миллетлердинъ басшылары халкты юмсайдылар, уьйкен аьдемлери де оларды бойсындырадылар.

²⁶ Сизинъ аранъызда сондайлар болмасын. Керисинше, сизинъ аранъызда уьйкен болмага суьйген – ыргатынъыз болсын.

²⁷ Сизинъ аранъызда биринши болмага суьйген – кулынъыз болсын.

²⁸ Сондай болып Аьдем Улы да Оьзине куллык эттирер уьшин тувыл, Оьзи куллык этпеге, курман болып коьплерди куткарып, Оьзининъ янын бермеге келген».

Эки сокырдынъ коьзлери ашылады

²⁹ Олар Ериходан шыкканда, коьп халк Исадынъ артыннан барды.

³⁰ Онда йолдынъ янында олтырган эки сокыр, Исадынъ оьтип бараятырганын эситип: «Даут Улы, Бийимиз, бизди языксын!» – деп кышкырып басладылар.

³¹ Халк болса, оларды тыйып, уьндетпеске шалысты, а олар: «Даут Улы, Бийимиз, бизди языксын!» – деп тагы да бек кышкырыкладылар.

³² Иса токтап, оларды шакырып: «Мен сизге эткендей не зат тилейсиз?» – деп сорады.

³³ Олар: «Бийимиз! Коьзлеримиз ашылсын деп тилеймиз», – дедилер.

³⁴ Иса, языксынып, олардынъ коьзлерине тийди. Сол саьат сокырлардынъ коьзлери ашылдылар эм экеви де Онынъ артыннан кеттилер.