Лука 23 - Инжил

Иса тоьре Пилаттынъ алдында

¹ Йыйылганлардынъ баьриси коьтерилип, Исады Пилат алдына алып келдилер.

² «Ол бизим халкымызга бузгынлык салады, Ол кесарга ясак бермеге коймайды, Оьзине де Масих Патша дегенди айтады», – деп, Исады шуьшлеп басладылар.

³ Пилат Оннан: «Сен Ювыт Патшасысынъма?» – деп сорады. Ога яваплап: «Сен айткандай», – деди.

⁴ Пилат бас дин куллыкшыларына эм халкка: «Мен бу Аьдемнинъ бир терислигин де таппайман», – деди.

⁵ Ама олар: «Ол, Галилеядан баслап булайга дейим, буьтин Юдеяда окувын яйып, халкты козгайды», – деп кадалдылар.

⁶ Пилат Галилея дегенлерин эситкенлей: «Ол Галилеядан ма?» – деп сорады.

⁷ Исадынъ Иродка бойсынган ериннен болганын билгенде, Пилат оны Иродка йиберди. Сол куьнлерде Ирод оьзи де Ерусалимде эди.

⁸ Ирод, Исады коьрип, бек шатланды, неге десе ол коьптен бери Оны коьреек болып, Онынъ этеек бир аьлемет нышанын коьрермен, – деп уьмитленди.

⁹ Ол Исага коьп соравлар берди, тек Иса ога бир зат та айтпады.

¹⁰ Сонда болган бас дин куллыкшылары эм дин аьлимлери болса, баьри куьшлерин салып, Исады терислемеге шалыстылар.

¹¹ Ирод оьзининъ аскершилери мен Ога мисетсинмей карап, Оны маскаралап кутылганнан сонъ, коьркли, ярасык кийим кийгистип, Пилатка кайтарып йиберди.

¹² Сол куьн Ирод пан Пилат дос болдылар. Оннан алдын олар явласкан эдилер.

Оьлтирилмеге талапланган Иса

¹³ Пилат болса бас дин куллыкшыларды, басшыларды эм халкты йыйып,

¹⁴ оларга айтты: «Сиз бу Кисиди: „Халкты азгырады“, – деп, айыплап аькелдинъиз. Ама мен Оны сизинъ алдынъызда тешкердим, сиз Ога айткан терисликлердинъ бирин де таппадым.

¹⁵ Ирод та таппаган, неге десе Ирод Оны бизге кери йиберди. Ога оьлим язасын бергендей эш бир зат та этпеген.

^16-17 Сонынъ уьшин мен, Оны тоьбелетип, эркин этейим», – деди.

¹⁸ Ама буьтин халк: «Ога оьлим! А бизге Бараббады эркин эт!» – деп, кышкырып баслады.

¹⁹ Барабба деген аьдем шахарда козгалув яратканы эм аьдем оьлтиргени уьшин тутнакка туьскен эди.

²⁰ Исады эркин этпеге суьйип, Пилат тагы да давысын коьтерди.

²¹ Ама халк: «Оны кашка кер, кашка кер!» – деп кышкырысты.

²² Пилат уьшинши кере йыйылганларга: «Не уьшин? Ол не яманлык эткен? Оьлтирмеге тийисли бир терислик те таппаганман, сол себепли мен, Оны тоьбелетип, эркин этейим», – деди.

²³ Аман да олар тагы да кышкырыклап, Исадынъ кашка керилуьвин талапладылар; олардынъ эм бас дин куллыкшылардынъ давыслары баьрин де енъди.

²⁴ Эм Пилат олар тилегенин этейим деген ойга келди.

²⁵ Козгалыс яраткан эм аьдем оьлтирген уьшин тутнакка туьскенди, олар тилегенше, босатты; Исады болса олардынъ ыхтыярына тапшырды.

Исады кашка кередилер

²⁶ Аскершилер Исады алып барган заманларында, сабаннан келеяткан Шимон атлы бир киренешиди токтатып, ога кашты коьтертип, Исадынъ артыннан аькеттирдилер.

²⁷ Исадынъ артыннан бек коьп халк та, Онынъ уьшин коькирегин согып йылайтаган хатынлар да бара эдилер.

²⁸ Иса болса оларга бурылып: «Эй, Ерусалим кызлары! Мен уьшин йыламанъыз, тек оьзинъиз бен балаларынъыз уьшин йыланъыз», – деди.

²⁹ «Неге десенъиз: „Наьсиплидилер каратонлар, бала таппаган карынлар эм эмгистпеген тоьслер“, – деп айтар куьнлер келедилер.

³⁰ Сол заманда тавларга: „Бизим уьстимизге авынъыз!“, а тоьбешиклерге: „Бизди капланъыз!“ – деп айтып баслаяклар.

³¹ Эгер ясылланатаган терек пен солай этиле болса, сонда курганы ман не болар?»

³² Иса ман бирге оьлтирмеге эки кыянатшыды алып бара эдилер.

³³ Бас суьек атлы ерге келгенлеринде, онда Исады да, кыянатшыларды да кашка кердилер: бирин – Онынъ онъ ягына, экиншисин – сол ягына.

³⁴ Иса болса айтты: «Эй, Ата! Сосыларды ярлыка, неге десе не ислейтаганларын да билмейдилер». Аскершилер, сыбага таслап, Исадынъ кийимлерин боьлисе эдилер.

³⁵ Халк токтап карай эди. Басшылар да, селеке этип, куьлип: «Баскаларды куткаратаган эди: эгер Алла сайлаган Масих Ол болса, Оьзин-Оьзи куткарсын!» – деп айттылар.

³⁶ Солардай болып, аскершилер де мыскылладылар. Олар Исага ашыган шагырдан берип:

³⁷ «Сен Ювыт Патшасы болсанъ, Оьзинъди-Оьзинъ куткар!» – дей эдилер.

³⁸ Исадынъ уьстинде: «Бу – Ювыт Патшасы», – деген язув бар эди.

³⁹ Кашка керилген кыянатшылардынъ бириси де Оны яманлап: «Сен Масих болсанъ Оьзинъди де, бизди де куткар!» – деп айта эди.

⁴⁰ Экиншиси болса: «Сен де сондай болып язаланып турганлай, Алладан коркпайсынъма?» – деп, оны тыймага шалысты.

⁴¹ «Бизге туьз язалав кесилген. Биз эткен ислеримизге тийислисин алганмыз. Ол болса эш бир яманлык та этпеген».

⁴² Эм Исага: «Сен Патша болып кери келген заманда, мени эсинъе туьсир!» – деди.

⁴³ Иса да ога: «Сага дурысын айтаман: буьгуьн ок сен Мени мен бирге еннетте болаяксынъ», – деди.

Исадынъ оьлими

⁴⁴ Куьндиздинъ алтыншы саьатине ювыклаган эди, тогызыншы саьатке дейим буьтин кыралда каранъа болып калды.

⁴⁵ Куьн каранъаланды эм Алладынъ уьйиндеги перде ортасыннан йыртылды.

⁴⁶ Иса, давысын коьтерип: «Ата! Мен сенинъ колынъа янымды тапшыраман!» – деди. Эм соны айтканнан сонъ, ян берди.

⁴⁷ Бу болган затларды коьрген юзбасшы Аллады данъклады эм: «Акыйкатлай да, бу Аьдем туврашыл болган экен», – деди.

⁴⁸ Бу тамашады карамага йыйылган буьтин халк, болган затларды коьрген сонъ, коькиреклерине сога-сога кайтты.

⁴⁹ Тек Исады таныйтаганлардынъ баьриси де, эм Галилеядан Онынъ ызыннан келген хатынлар да баьри затка эректен карап турдылар.

Исады кабырга салув

⁵⁰ Сол заманда межлистинъ агзаларыннан, Юдеядынъ Араматия шахарыннан Юсуп атлы огырлы эм туврашыл бирев,

⁵¹ калганлардынъ бегиминде эм ислеринде катнаспаган, Алладынъ Патшалыгын саклаган бир киси,

⁵² Пилаттынъ янына келип, Исадынъ суьегин тиледи.

⁵³ Суьекти туьсирип алып, кетен кумаш пан кебинледи эм аьли бирев де салынмаган, каяда уьнъилип этилген кабырга салды.

⁵⁴ Ол куьн юма эди, шабат куьни етип келе эди.

⁵⁵ Кене болса да Иса ман бирге Галилеядан келген хатынлар артларыннан барып, кабырды карап, Онынъ суьеги онда койылганын коьрдилер.

⁵⁶ Кайтып келип, ийисли-кокыслы майлар эм бальзамлар аьзирледилер де шабат куьнин Алладынъ парызына коьре тыншаювда озгардылар.