Лука 22 - Инжил

Юда Исады сатады

¹ Пасха деп аталатаган ашымаган оьтпеклер байрамы ювыклай эди.

² Бас дин куллыкшылары эм дин аьлимлери Исады кайтип болса да йок этуьв амалын излестиретаган эдилер, неге десе халктан корктылар.

³ Он экидинъ бириси болган Искариот атлы Юдага шайтан кирди.

⁴ Ол бас дин куллыкшылары ман Алла уьйининъ каравыл басшыларына барып, Исады оларга калай ыслатаягын соьйлести.

⁵ Олар кувандылар эм ога акша бермеге разылыгын билдирдилер.

⁶ Юда соьз берди эм, халк болмай, Исады оларга ыслап берер уьшин онъайлы кезуьв излеп баслады.

Сонъгы ас

⁷ Пасха козысы шалынмага тийисли болган ашыткысыз оьтпек байрамынынъ биринши куьни етти.

⁸ Иса: «Барынъыз, бизге ашарга Пасха асын аьзирленъиз», – деп, Петер мен Яхъяды йиберди.

⁹ Олар Исадан: «Асты каерде аьзирлемеге буйырасынъ?» – деп сорадылар.

¹⁰ Иса: «Сиз шахарга кирсенъиз, сизге шоьлмек пен сув алып бараятырган киси расар. Онынъ артыннан барынъыз да, ол кирген уьйге киринъиз.

¹¹ Сол уьйдинъ иесине: Устаз сеннен: „Мен сокталарым ман бирге Пасха асын ашаяк боьлме кайдады? деп сорайды“ – дерсинъиз.

¹² Ол сизге йогарыда ярастырылган уьйкен боьлмеди коьрсетер, сонда асты аьзирлерсинъиз», – деди.

¹³ Олар кеттилер де, аьр неди де Иса айтканша табып, Пасха асын аьзирледилер.

¹⁴ Заманы еткенде, Иса элшилери мен бирге сыпырадынъ янына орынласты.

¹⁵ Оларга: «Мен азап шегеегимнен алдын сосы Пасха асын сизи мен бирге емеге бек суье эдим.

¹⁶ Сизге айтаман: Энди Мен Пасха асын, ол Алла Патшалыгында толы маьнесине еткенге дери, ашамаякпан».

¹⁷ Сонъ Иса аякты алып, шуькир дувасын этип: «Муны алынъыз да оьз ара уьлесинъиз.

¹⁸ Неге десе Алла Патшалыгы келгенге дейим Мен энди юзим емисиннен этилгенди ишеек тувылман деп, сизге айтаман», – деди.

¹⁹ Сонъ оьтпекти алып, шуькир дувасын этип, оны сындырды да: «Бу – сизинъ уьшин берилген шаркым; Мени эскеруьв уьшин булай этинъиз», – деп, сокталарына узатты.

²⁰ Солай этип астан сонъ аякты та алып: «Бу аяк – сизинъ уьшин тоьгилген Меним каным ман бегитилген янъы антласув», – деди. –

²¹ «Эм мине Мени сататаганнынъ колы Меники мен бирге сыпырада.

²² Олай болса да, Аьдем Улы, Ога белгиленгендей, кетеди, тек Оны сатаяк аьдемге кайгы!»

²³ Олар: «Бизим арамызда ол затты кайсымыз этер экен?» – деп, бири-бириннен сорап басладылар.

Ким энъ уьйкен?

²⁴ Сокталар арасында кайсымыз энъ уьйкен деп саналмага болаяк деген эрисуьв шыкты.

²⁵ Сол заманда Иса айтты: «Миллетлердинъ патшалары халкты юмсайдылар эм аькимлери ийгилик этуьвшилер деген атты юргистедилер.

²⁶ Сиз олардай болманъыз. Керисинше, сизинъ аранъыздагы энъ уьйкенинъиз кишкей болмага керек эм басшылык эткенде кулдай болсын.

²⁷ Неге десе ким уьйкен: сол сыпыра янында олтырганма яде ога кылынатаганма? Олтырган тувылма? А Мен сизинъ аранъызда кулдайман.

²⁸ Олай болса да сиз Мени мен баьри кыйынлыкларымда да бирге болгансыз.

²⁹ Атам Мага бир патшалык бергендей, Мен де сизге бир патшалык беремен.

³⁰ Патшалыгымда Меним сыпырамнан ашаяк-ишеексиз эм де, Исраилдинъ он эки ырувына оьким этпеге такка олтыраяксыз», – деди.

Иса Петердинъ Оннан басын алаягын билдиреди

³¹ «Шимон, Шимон! Шайтан сизди, бийдайды элегендей этип, элемеге суьйген эди.

³² Ама Мен, иманынъ кемимесин деп, сенинъ уьшин дува эттим. Эм сен (Аллага) кайтып келгенде тувганларынъда да иманды бегит», – деди Иса.

³³ Петер Исага: «Раббий! Мен Сени мен тутнакка да, оьлмеге де аьзирмен», – деп яваплады.

³⁴ Ама Иса: «Петер, сага айтаман, буьгуьн кораз кышкырганша, танымайман деп, Меннен уьш кере басынъды алаяксынъ», – деди.

³⁵ Сонъында Иса: «Мен сизди бокшасыз, артпаксыз, машпаксыз йиберген заманда, бир заттан болса да етиспевликлер сездинъизбе?» – деди. «Эш бир заттан да болмады», – деп, явап бердилер сокталары.

³⁶ Сонда Иса: «Ама энди бокшасы болган оны алсын, артпагын да алсын; а кимде йок болса, сол абасын сатып, кылыш алсын.

³⁷ Сизге айтаман: „Ол кыянатшыларга саналды“, – деп язылган соьзлер Меним уьстимде толтырылаяк. Неге десе Меним акымда язылганлар ахырына келеятырлар», – деди.

³⁸ Сокталар Ога: «Раббий! Мине мунда эки кылыш бар», – дедилер. Иса оларга: «Етер!» – деди.

Иса Зейтун тавда

³⁹ Сонъ Иса шыгып, аьдетинше, Зейтун тавга кетти; Оны ман бирге сокталары да бардылар.

⁴⁰ Онда барып еткенлей, Иса оларга: «Азгырувга туьсип олтырмас уьшин дува этинъиз», – деди.

⁴¹ Оьзи де, олардан тас атым кадер шетке кетип, тизиннен шоьгип:

⁴² «Атам! Эгер Сен ийги коьрсенъ, бу ашы аякты Меннен аькет, тек Мен суьйген зат тувыл, Сен суьйген зат болсын», – деп тиледи. [

⁴³ Сол вакытта Исадынъ янына коьктен маьлек келип, Ога куват берди.

⁴⁴ Яны кыйналганлыктан, Иса мукаятланып тилек тиледи эм Онынъ тери, кан тамшыларындай болып, ерге тамдылар.]

⁴⁵ Иса, тилек эткен орныннан турып, сокталарына келгенде, олардынъ кайгырувдан уйклап ятканын коьрди.

⁴⁶ «Неге уйклайсыз? Турынъыз эм азгырувга туьспес уьшин дува этинъиз», – деди.

Иса ысланады

⁴⁷ Иса айта турганнынъ арасында, бир коьп кисилер келдилер, олардынъ алдында он экидинъ бириси Юда келе эди. Ол Исады оьбер уьшин янына келди.

⁴⁸ Иса, болса, ога: «Юда! Аьдем Улын оьбуьв мен сатасынъма?» – деди.

⁴⁹ Исадынъ янында болганлар, истинъ кайда барганын коьрип, Ога: «Раббий! Кылышты алаякпа?» – деп сорадылар.

⁵⁰ Олардынъ бириси, бас дин куллыкшыдынъ кулын согып, онынъ онъ кулагын шапты.

⁵¹ Сонда Иса: «Бу затты койынъыз, токтанъыз!» – деди де, кулдынъ кулагына колын тийгистип, сав этти.

⁵² Иса Оьзин аькетпеге келген бас дин куллыкшыларга, Алла уьйининъ каравыл басшыларына эм аксакалларга: «Йолбасарга шыккандай, кылышлар эм казыклар ман шыктынъыз!

⁵³ Мен аьр куьн сайын сиз бен бирге Алла уьйинде болатаган эдим эм сиз Мага кол коьтермединъиз. Ама энди сизинъ заман, каранъалык бийлеген кезуьв», – деди.

Петер Исадан басын алады

⁵⁴ Соннан сонъ олар Исады тутып бас дин куллыкшыдынъ уьйине алып келдилер. Петер болса эректен карап, ызыннан барды.

⁵⁵ Каралдыдынъ ортасында йыйылганлар, от ягып, баьриси бирге олтырганда, Петер де олардынъ арасына кирип олтырды.

⁵⁶ Бир таьвке кыз Петердинъ от янына олтырганын коьрди де, ога тигилип карап: «Бу аьдем де Оны ман бирге эди», – деди.

⁵⁷ Ама Петер: «Хатын, мен Оны танымайман», – деп, Исадан басын алды.

⁵⁸ Бираздан сонъ баска бирев оны коьрип: «Сен де олардансынъ», – деди. Ама Петер: «Тувылман, эй, аьдем!» – деди.

⁵⁹ Бир саьат кадер заман оьткенде, тагы да олардынъ бириси: «Уьшини мен де, бу да Оны ман бирге эди, неге десе ол – галилеяшы», – деп, катырып айтты.

⁶⁰ Ама Петер: «Эй, аьдем, мен сенинъ не зат айтатаганынъды анъламайман», – деди. Сол саьатлей, сосы соьзлерди айтаятырганда, кораз кышкырды.

⁶¹ Сол заманда Раббий, бурылып, Петерге карады, Петер де Раббийдинъ ога: «Кораз кышкырганша, сен Меннен уьш кере басынъды алаяксынъ», – деп айткан соьзлерин эсине туьсирди.

⁶² Петер тыска шыгып, оьксип-оьксип йылады.

⁶³ Исады ыслап турган аьдемлер, Оны маскаралап, тоьбелей эдилер.

⁶⁴ Коьзлерин байлап, Оннан: «Пайхамбарлык эт, сени ким сокты, айт», – деп сорайтаган эдилер.

⁶⁵ Олардан баска да коьп яман соьзлер айтып, Исады мыскылладылар.

Иса межлис алдында

⁶⁶ Танъ атканда, халктынъ аксакаллары, бас дин куллыкшылары эм дин аьлимлери йыйылдылар эм Исады оьзлерининъ межлисине алып кеттилер.

⁶⁷ «Бизге айт, Сен Масихсинъ ме?» – деп кадалып сорадылар. Иса оларга: «Эгер сизге айтсам, сиз ынанмассынъыз.

⁶⁸ Эгер сизден сорасам да, сиз Мага явапламаяксыз эм Мени босатпаяксыз.

⁶⁹ Эндиден арбатын Аьдем Улы куьдиретли Алладынъ онъ ягында олтыраяк», – деди.

⁷⁰ Сонда баьриси Ога: «Соны ман, Алладынъ Улы сенсинъ ме?» – дедилер. Иса оларга явапка: «Сиз айткандай, Менмен!» – деди.

⁷¹ Олар болса: «Бизге энди тагы да кайдай шаатлык керек? Биз оьзимиз Онынъ авызыннан эситтик», – дедилер.