Лука 20 - Инжил

Исадынъ куваты акында сорав

¹ Куьнлердинъ бирисинде Иса Алла уьйинде халкты уьйретип эм Ийги Хабарды айтып турганда, Онынъ касына халк аксакаллары ман бирге бас дин куллыкшылары эм дин аьлимлери келдилер де

² Оннан: «Бизге айттага, Сен буларды кайсы куват пан этесинъ? Сондай куватты Сага ким берген?» – деп сорадылар.

³ Иса явапка булай айтты: «Мен де сизден бир зат сорайым, Мага айтынъыз:

⁴ Яхъядынъ аьдемлерди сувда шомылдырувы коьктен болганма, яде аьдемненме?»

⁵ Олар болса оьз ара соьйлесип: «„Коьктен“, – десек, Ол: „Аьше, сиз ога неге ынанмадынъыз?“ – деп айтар.

⁶ А эгер „Аьдемнен“, – десек, буьтин халк бизди тас пан сыбалар, неге десе олар Яхъя пайхамбар экенине ынанадылар», – дедилер.

⁷ Сонъында олар: «Биз кайдан экенин билмеймиз», – деп явапладылар.

⁸ Иса да оларга: «Мен де буларды кайсы куват пан этетаганымды сизге айтаяк тувылман», – деди.

Яман юзимшилер акында таварых

⁹ Оннан сонъ Иса халкка бу таварыхты айтып баслады: «Бир аьдем юзим бавын олтыртады эм оны юзимшилерге ялга берип, узак заманга тыс элге кетеди.

¹⁰ Емис йыюв заманы еткенде, ол бавдынъ юзиминнен уьлисин йиберсинлер деп, кулын юзимшилерге йибереди; тек олар кулын тоьбелеп, бир зат та бермей артына кайтарадылар.

¹¹ Тагы да баска бир кулын йибереди, ама олар оны да, тоьбелеп эм корлап, бир зат та бермей артына кайтарадылар.

¹² Ол яне уьшиншисин йибереди, тек олар оны да яралап, кувып шыгарадылар.

¹³ Сонда юзим бавдынъ иеси: „Мен не этейим экен? Суьйикли улымды йиберейим, белки, оны коьрип, уялырлар“, – дейди.

¹⁴ Ама юзимшилер, ясты коьрип, оьз ара: „Бу – муьлктинъ асабасы. Кел оны оьлтиреек, муьлк бизге калсын“, – деп кенъеседилер.

¹⁵ Эм оны бавдан тыска шыгарып, оьлтиредилер. Энди олар ман юзим бавынынъ иеси не этер экен?

¹⁶ Ол келип, сол юзимшилерди оьлтирер, юзим бавын да баскаларга берер». Муны тынълаганлар: «Олай болмас!» – дедилер.

¹⁷ Иса десенъ оларга тигилип карап, айтты: «„Уьй курувшылар яравсыз деп таслаган тас муьйистинъ негизин салган тасы болды“, – деп язылган не затты анълатады?

¹⁸ Сол тастынъ уьстине ким йыгылса – шашылар, а кимнинъ уьстине сол тас туьссе – эзилер».

¹⁹ Сол вакытта дин аьлимлери эм бас дин куллыкшылары, Иса бу таварыхты олар акында айтканын анълап, Оны тутув амалын излей эдилер, ама халктан корктылар.

Урым императорына ясак

²⁰ Исады сынап, соьзинде бир терисликти тапкандай эм, терисликти табып, Оны тутып, тоьрединъ карарына эм куватына бергендей, туврашыл болып кылпысыган, тилши аьдемлерди йибердилер.

²¹ Олар Исадан сорадылар: «Устаз! Биз Сенинъ дурыс соьйлевинъди эм уьйретуьвинъди, биревдинъ хаьтерине карамайтаганынъды, Алладынъ йолына туьз уьйретуьвинъди билемиз.

²² Кесарга ясак тоьлейтаганымыз тийислиме яде тийисли тувылма?»

²³ Иса болса олардынъ аьйлежигенлерин анълап айтты:

²⁴ «Мага бир динар коьрсетинъиз: мунда кимнинъ суьврети эм кимнинъ аты язылган?» «Кесардыкы», – деп явапладылар.

²⁵ Сонда Ол: «Солай болса, кесардыкын кесарга, а Алладыкын Аллага беринъиз», – деди.

²⁶ Олар Онынъ халк алдында айтатаган соьзлеринде ябыскандай зат табалмадылар эм, Онынъ явабына сейирсинип, тындылар.

Тирилуьв акында сорав

²⁷ Оьликлер тирилмес деп айтатаган садукейлердинъ кайбирлери Исага келип, булай сорадылар:

²⁸ «Устаз! Муса (Тауратта) бизге: „Биревдинъ пишели кардашы баласыз оьлсе, ол тул хатынды алып, кардашы уьшин тукым тувдырсын“, – деп язган.

²⁹ Ети кардаш бар эди. Бириншиси хатын алды да, баласыз оьлип кетти.

³⁰ Сол хатынды экиншиси

³¹ эм уьшиншиси алды, сондай болып етисининъ баьриси де, бала калдырмай, оьлдилер.

³² Баьрисиннен сонъ хатын да оьлди.

³³ Солай болганда, кыямет куьнинде ол кайсысынынъ пишеси болаяк экен? Неге десе ол етевининъ де пишеси болган».

³⁴ Иса оларга явап этип айтты: «Бу оьмирдинъ аьдемлери уьйленедилер, киевге де шыгадылар.

³⁵ Келеек оьмирге етип, оьлилерден тирилмеге тийисли деп саналганлар болса, уьйленмеек те, байга бараяк та тувыллар.

³⁶ Эм энди оьлмеге де болалмайдылар, неге десе олар, маьлеклердей, тирилген аьдемлер болып, Алладынъ балалары боладылар.

³⁷ А оьлгенлердинъ тирилеегин Муса да куьйген коьгемлик акындагы боьликте коьрсеткен. Онда Муса Раббийди: „Ибрагимнинъ, Исхактынъ эм Якуптынъ Алласы“, – деп атаган.

³⁸ Алла оьлгенлердинъ Алласы тувыл, тирилердинъ Алласы эм Ога баьриси де тири!»

³⁹ Дин аьлимлерининъ бирерлери Ога: «Устаз! Сен ийги явап бердинъ», – дедилер.

⁴⁰ Соннан сонъ эш бирев де Ога сорав бермеге йигери батпады.

Даут Улы акында сорав

⁴¹ Иса: «Масих – Дауттынъ Улы деп, неге айтадылар?» – деп сорады.

^42-43 «Даут оьзи Забур китабында: „Раббий меним Бийиме: Мен душпанларынъды аягынънынъ астына салганга дейим онъ ягымда олтыр, деп айткан“, – деп язады.

⁴⁴ Соны ман, Даут Оны „Бий“ деп атайтаган болса, Ол Дауттынъ Улы калай болар?»

Дин аьлимлерининъ экиюзлилиги

⁴⁵ Буьтин халк тынълаган вакытта, Иса сокталарына айтты:

⁴⁶ «Дин аьлимлериннен сакланынъыз. Олар узын кийимлер кийип юрмеге, майданларда салам алмага, синагогларда энъ йогары орынларда эм тойларда тоьрде олтырмага суьедилер.

⁴⁷ Тул хатынлардынъ уьйлерин оьзлерине байырлап, коьзбайлавышка узын дувалар окыйдылар. Ондайлар катырак шуьшлерине еткерилееклер».